2 TIMOTE 1 - Bafia Nouveau Testament

Pol à tògsii Timote

¹ Mɛ̀ Pol ànɛ ǹɗì ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll, ɓi nkàg wu cɛɓ wu wu ri ɓi Yeesus Kiris,

² ǹkàni Timote à man wɛm̀ à nɗem, Bɛ̀ll Seŋi wìs, rì Yeesus Kiris Kan wìs, ɓɛɛ fa wɔ̀ geesɛ̀n ɗì rìcenɛ̀n, rì fyòoog

Pol à faa nyi deɓ yi nkɔ̀nɛ̀n, à fa Bɛ̀ll ɓìtògsɛ̀n

³ Ǹfaa Bɛ̀ll ànɛ nkìki kisay ɓitògsɛ̀n; kìsay kiǹ, ki ri rìkɛ̀n ɗi beèbɛ̀y ɗì kìsay ki ɓɛ̀seŋi ɓɛ̀m ɓɛ ɓɛsɛ̀ɛ̀ ɓɛ kighà nyi; nkìki kɔ rì nɗem wu sɛɛghi sɛɛghi, fɔlɔɔ nnɛ ǹfɔli ɓi wɔ rìɓùŋ yɛ̀ɛ ìru yɛ̀ɛ ŋwos ɓi bɔ̀ŋzɛ̀n yɛm̀;

⁴ ɓisuulɛ ǹti ǹ-yiìyìtì misì mɔɔ fɔɔnnɛ ǹɗì rì coo zày ìnɛ lɛ di màa ghɛɛ̀dii wɔ̀ fɔlɔɔ nnɛ ǹɗem wɛ̀m wɛɛ rongi rì kìnyàà lɛ pisa.

⁵ N-yiiyitì girig rìgherɛ̀n ɗi kɛ̀ɛ̀ ìghèy azi ɗi ɗi ri wɔ̀ ɓi nɗem, rìkuu ɗi righerɛ̀n ɗiǹ ɗyɛɛ̀ɗi gaa à ǹsɛ̀ɛ̀mɛn anɛ lɛ Lɔyis à ɓaghà rì ɗyɔ, Enis à jɛɛ wɔ̀ɔ̀ ri ɗyɔ, lɔŋ yɛ̀ɛ ǹɗem wɛ̀m wùcèm wu gherɛɛ lɛ ɗi ri girig fɔlɔɔ a lɔ̀ŋkɔɔ.

⁶ Kìɓan kiǹ kɛɛ̀ki ǹtɔɔgh wɔ̀ lɛ, u lɔŋ̀zi tì ɗuu ɗi ɓi rìfa ɗi Bɛ̀ll ɗi ù tekà yɛ̀ɛ ǹsaghìghà wɔ̀ ɓyàg ɓi nyòò.

⁷ Lɛ àa ǹghay à kìɗyɔn innɛ Bɛ̀ll à faghà ɓìsi, lɔŋ ǹghay à ìtèɗ, rì ǹkɔ̀nɛ̀n rì ɗyomzɛ̀n innɛ à faghà.

⁸ Fɔɔnnɛ kɔ̀ɔ wog ntoòrìɗ lɛ u tɛɛ̀zi kìɓan ki Kan wìs, nsoò lɛ ki màànɛ ǹɗì kìmbùŋ ɓisu wii. Kìɓan kifog ɓi-tèɗ wu Bɛ̀ll, wogha rìkɛŋ ɓisuu Syeesyee à Ɓɔlɛ ǹɗaŋ ri mɛ̀,

⁹ Bɛ̀ll yɛɛ kweɗkà ɓìsi, à ki reŋi ɓisi ǹɗeèghreŋi wu wu ri wùtɛnɛn, àa ɓisuu mɛkìkìì mis, lɔŋ ɓisuu fèg wìì a nyimiɗ rì geesɛ̀n yìì inɛ à kìghà ɓìsi ɓi Yeesus Kiris; à kìghà kìɓan kiǹ di ɓyààmɛ̀n ɓi a rìtumɛ̀n ɓi ka yin.

¹⁰ Geesɛ̀n ìnɛn yɛ̀ɛ mɛ rèsɛn ɓigomìnɛ ɓi rìyù ɗi nkòrì wìs Yeesus Kiris ànɛ à ɓigtɛ̀ngà rì rìwu, à kpaŋzì lɛ rì cɛɓ rì rìɓa ɗi lɛ mum kɛ̀ɛ bwɛ̀y, ɓi kìtɛɛtɛn, ɓi bee ì Syeesyee à Ɓɔlɛ.

¹¹ Syeesyee à Ɓɔlɛ ànɛ̀n innɛ ɓɛ rɛsìghà mɛ̀ lɛ nlaàlamɓɛ̀n m̀ɓa ǹkɛ̀nì-fìtom rì ǹɗèsàg ànɛ miì.

¹² Ɓisu wìn miì nnɛ nwowog mɛtɔɓ yɛ̀ɛ mɛ, wɔ̀lɛ ki faa ɓi mɛ ntoòrìɗ ɓisuulɛ ǹ-yii roànɛ ǹgherɛ̀ngà; ǹɗem wɛ̀m wùcèm wu yii saaɗ wu ki gherɛn lɛ à rì rì ìtèɗ wulɛ à ɓèŋ com ki à tɛfɛ̀ngà rì mɛ̀, à kpaŋ ŋwos anɛ̀n.

¹³ Tera ɓɛ̀kɔɔ̀kɔɔ̀ ɓɛ ɓiɓan ɓɛ ù wokà a lɔ̀ŋkɛm̀, ɓɛɛ ɓa wɔ̀ kìrèmzɛnà ù ki sììrɛn ɓi ntyweeyi rì ǹkɔ̀nɛ̀n, ɓi tì rì rì ɓyɔ ɓi Yeesus Kiris ɓiɗùm.

¹⁴ Ɓèŋa syeesyee à rìrèsàg ànɛ ù rì rì nyi, rì nghɛɓsɛn wu Kitɛntɛ̀ɛ̀n ki Nghay ki ki ri ɓi ɓìsi.

¹⁵ Ù yii lɛ ɓum ɓɛ̀cèm ɓɛ ɓɛ ri a Azii ɓɛ nagà mɛ̀, ɓumɓɛ lɛ rì Fizyɛl rì Ɛrimozyɛn ɓɛ ri ɓi bàlì ì ɓumɓɛ̀n.

¹⁶ Kan à ghɛ̀ɛ̀sɛɛ kì rèsii ǹɗem wii wu nyìinyìg ɓi naa ì ɓum ì Onezifɔɔr ɓisuulɛ ɓyaàmɛ̀n lɛɛ̀gwey, a fɔɔsag mɛ nɗem, kɛ̀ɛ wog ntoòrìɗ ri naà-zày ìnɛ ǹɗì miì.

¹⁷ Yɛ̀ɛ à kpagà a Rom, à ghagsɛ̀ngà mɛ̀ rì rìkaa, rì kìɗìg à ki ghɛn mɛ.

¹⁸ Kan à ghɛ̀ɛ̀sɛɛ kì kìi lɛ Bɛ̀ll a resi nyi kìrɔɔ-ǹɗem wìì ŋwos anɛ̀n. Ɓìsay ɓìcèm ɓi Onezifɔɔr à kìghà mɛ̀ a Efɛɛzɛ, wɔ̀ yɛɛ raŋ̀zii ɓyɔ kì yiì ù cee ɓum ɓɛ̀cèm.