Bìoball air-loidhne

2 TÈSÀLÒNÌSYƐŊ 3 - Bafia Nouveau Testament

Pol à tɔɔgh ɓɔ lɛ, ɓɛɛ ɓɔŋzag Bɛ̀ll ɓisu waa, ɓɛ ki sasay ri ɓyàg

¹ Ɓɔɔsoŋ̀! ǹsiitɛɛ mìni kì kpaà lɛ: Ɓì ɓɔ̀ŋzàg Bɛ̀ll ɓisu wìs, di jɛ̀ɛ̀ ì Kan yɛ̀ɛ kɛn asu ì sààsàà, ì ki keŋkem, fɛlɛ yɛ̀ɛ yɛɛ̀ keŋkem a lɔ̀ŋkin.

² Ɓì ɓɔ̀ŋzàg girig Bɛ̀ll lɛ a kweɗ ɓìsi ɓi ɓyàg ɓi ɓiɓeɓtàg ɓi ɓum ɓi ɓi ri rì rìgɛn, ɓisuulɛ àa ɓum ɓɛ̀cèm ɓɛɛ ri rì rìgherɛ̀n.

³ Wɔ̀lɛ Kan à ti à roòzàg mɛ̀kàg mii; à rì mìni ɓiì faà ìtèɗ, à lɛgsì mìni kìɓeɓtàg ki mum.

⁴ Tì rì rì ǹtyweeyi ri Kan ɓisu win lɛ ɓìɓan ɓi tì tɔɔgh mìni, ɓì ti ɓì kìlàg ɓyɔ ɓì ki rì ɓiì kɛ̀ɛ asu, ɓì kìkì ɓyɔ.

⁵ Kan a ki lɛ mɛ̀rem min mɛɛ tiŋi ɓi nkɔ̀nɛ̀n à Bɛ̀ll, rì rìnìɗ ɗi nɗem ɗi Kiris a falàg.

⁶ Ɓɔɔsoŋ̀! tì tɔɔgh mìni ɓi ɗii ɗi Kan wìs Yeesus Kiris lɛ: Kɛ̀ ɓi wuɓsɛn ɓɛgeni ɓin ɓɛ ɓɛ ri ɓɛ̀ɓɔɓwɛɗ, ɓɛ ɓɛ ɓeni kì nɔ̀ɔ̀tii ɓiɓan ɓi tì rèsìghà mìni.

⁷ Mìniìɓɔmiɗ ɓì yii lannɛ ɓì ghɛ̀ɛ̀sɛɛ kì kìi lɛ ɓi nɔɔ̀ti mɛ̀kòò mis, lɛ ɓìsii ɓaghà ɓi ɓɛ̀ɓɔɓwɛɗ yɛ̀ɛ tì ghɛɓkà a lɔ̀ŋkin.

⁸ Mum à faghà ɓi ɓisi ɓìɗilàg ɓi ti ɗi zɛy, tì sasàlà lɔŋ lɛ rì ìru rì ŋwos, tì wowòg mɛ̀tɔɓ rì kìfɔli lɛ ǹtɛ̀g wis wɛ̀ kɛɛ̀ siŋ wààdɛŋ ɓi nyòò.

⁹ I tì kìghà fɔlɔɔ, ki yin lɛ tì ghɛ̀ɛ̀sɛ̀ngà ɓi lɛ tì tɔg mìni ǹghɛɓsɛn, tì kɔ̀ngà lɔŋ yɛɛri lɛ ti fa mìni kìfèèghrɛnà ki ɓì rì lɛ ɓì nɔ̀ɔ̀tì.

¹⁰ Lɛ yɛ̀ɛ tì ɓaghà a lɔ̀ŋkin, tì siŋdɛ̀ngà mìni lɛ, ŋwaànɛ à kɔ̀ni ɓi lɛ a say, à ghɛ̀ɛ̀sɛɛ ɓi girig lɛ à ɗi.

¹¹ Tì kpaa fɔlɔɔ ɓisuulɛ ti wowog lɛ ɓum ɓɛdɛŋ ɓɛ foo ɓɛɛ̀ ghɛghɛɓ cɛɓ ki iɓwɛɗ, ɓɛ̀ kɛɛ̀ kòm com ki kìyɛn, ɓɛ roòròòtɛ̀n ɓi ɓìɓan ɓi ɓum ɓɛdɛŋ.

¹² Tì tɔɔgh ɓumɓɛ̀n, tì ki reɓ ɓɔ ɓi ɗii ɗi Kan Yeesus lɛ, ɓɛɛ say ɓi fyòoog , ɓɛ ɗi ɓìɗilàg ɓi ɓɔmiɗ ɓɔ yɛɛ reni kìɗìg miì.

¹³ Ɓi san wìn, ɓɔɔsoŋ̀, kɛ̀ ɓi fɔy rikì ɗi kirɔɔ.

¹⁴ I mum à ɓèni kìnɔ̀ɔ̀tii ɓiɓan ɓi tì kpaa mìni ɓi kaàtà ànɛ ɓi, ɓàlina kìɓan kiǹ, ɓì lɛg ŋwaànɛ̀n miì, fɔlɔɔ nnɛ à ɓiì woògh ǹtoòrìɗ ɗi rìɓa ɗii ɗiǹ.

¹⁵ Kɛ̀ ɓi teɗ nyi yɛ̀ɛ bènàbena wiǹ, kìɓan kifog rɔ̀gsɛɛna nyi fɛlɛ yɛ̀ɛ geni wiǹ.

Ɓìtɔkì

¹⁶ Kan ànɛ a falag fyòoog, nnyɛɛ fa mìni fyòoog nyimiɗ ɓyààmɛ̀n ɓìcèm, bee yicèm; Kan a ɓa rì mìni ɓɛ̀sɛ̀ɛ̀ ɓɛ̀cèm.

¹⁷ Mɛ̀ɛmiɗ Pol yɛɛ kaniì ɓìtɔkì ɓi, rì càg kɛm̀; fɔlɔɔ nnɛ ǹti ǹsangì ɓɛ̀kaàtà ɓɛm ɓɛ̀cèm, rìkàn ɗyɛm ɗyɛɛ ri lɔɔ.

¹⁸ Geesɛ̀n ì Kan wìs Yeesus Kiris yɛ̀ɛ ɓa rì mìni ɓɛ̀sɛ̀ɛ̀ ɓɛ̀cèm.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan