2 TÈSÀLÒNÌSYƐŊ 1 - Bafia Nouveau Testament

Pol ɓɛ togsii ɓɔ

¹ Mɛ̀ Pol, ɓɛɛ̀ Silas, rì Timote, tì kàniì ɓumɓɛ ɓi Kìseŋi ki ɓɛgherɛ̀n ki a Tesalonika, ki ki ri ki Bɛ̀ll à Seŋi wìs, ɓi Yeesus Kiris à Kan wìs.

² Bɛ̀ll Seŋi rì Kan Yeesus Kiris ɓɛɛ fa mìni lɛ rì geesɛ̀n, rì fyòoog.

Rìgherɛ̀n ɗi ɓumɓɛ a Tesalonika ɗyɛɛ̀ tɔɔtɔ̀ɔ̀ nsoò yɛ̀ɛ ɓɛɛ̀ yeeyeèsì ɓɔ

³ Ɓɔɔsoŋ̀, tì ghɛ̀ɛ̀sɛɛ kì fafaa Bɛ̀ll ɓìtògsɛ̀n ɓisu win tyɛ̀ ki fɔy; tì ghɛ̀ɛ̀sɛɛ kì kìkii fɔlɔɔ ɓisuulɛ rìgherɛ̀n ɗin ɗyɛɛ̀ tɔɔtɔ̀ɔ̀, ǹkɔ̀nɛ̀n ànɛ à rì ɓi nyìinyìm wìn a tèèghtèghɛ̀n.

⁴ Fɔlɔɔ nnɛ ti kaakalɛ̀n Ɓìseŋi ɓi ɓɛgherɛ̀n Bɛ̀ll rìɓa ɗin, ɓisuu kisììrì kin, rì rìgherɛ̀n ɗin ɓi mɛ̀tɔɓ mɛ̀cèm, rì rìkɛŋ ɗìcèm ɗi ɓi wowòg ɓì ki nìniɗ mɛrem.

⁵ Kìɓan kiǹ kɛɛ̀ rèresi lɛ, Bɛ̀ll à ti à yɔ̀mgì ɓum yɛ̀ɛ saaɗ à rì. Fɔlɔɔ yɛɛ ɓiì kìi lɛ ɓi ɓa ɓumɓɛ ɓɛ ghɛɛ̀sɛɛ kì terì kìlɔ̀ŋ ki Bɛ̀ll ki ɓi wuwu mɛtɔɓ miì.

⁶ Lɛ ɓi san ànɛ yɛ̀ɛ Bɛ̀ll ki ri lɛ saaɗ lɛ Bɛ̀ll a yeèsi girig ɓumɓɛ ɓɛɛ̀ yeeyeèsì mìni,

⁷ à fa mìni ɓɛ ɓi wowog rikɛŋ rìfɔɔsɛ̀n ǹɗaŋ ri ɓìsi; à ɓiì kìi fɔlɔɔ yɛ̀ɛ Kan Yeesus à ɓiì rèsɛɛ yi aɗyoo, nɗaŋ ri ɓum ɓii ɓɛ titom ɓɛ ɓɛ ri rì ìtèɗ,

⁸ ɓi nɗòò wu ɗuu, lɛ a pɔnɔsi lɛ, rì ɓumɓɛ ɓɛ yii ɓi Bɛ̀ll, rì ɓɛ̀roɓɛ ɓɛ ti ɓɛ̀ kɛɛ̀ wog rikpaa ɗi Syeesyee à Ɓɔlɛ à Kan wìs Yeesus.

⁹ Pɔnɔsì ànɛ ɓɛ ri ɓiì terì, à rì rìɗyaŋ ɗi fiɗyàɓ fikɔ̀ɔ̀, ɓɛ kɛɛ̀ wuɓsɛn ìsu wu Bɛ̀ll, ɓɛ̀ kɛɛ̀ ki wuɓsɛn kitɛɛtɛn ki rikem ɗii,

¹⁰ yɛ̀ɛ à ri yù ɓi ŋwos anɛ̀n lɛ a kem̀ ɓi ɓum ɓii, ɓɛ ki sɛsɛg nyi rì mis ɓi ɓɛ̀roɓɛ ɓɛ gherɛ̀ngà nyi ɓɛ̀cèm; mìnii gherɛ̀ngà gì kɔm̀ ɓɔlɛ ànɛ tì kalìghà mìni.

¹¹ Kìɓan kiǹ kɛɛ̀ki ɓìsiì ɓɔ̀ɔɓɔ̀ŋzì Bɛ̀ll cààmɛ̀n kìcèm ɓisu win lɛ, di Bɛ̀ll wìs a ki lɛ ɓi ɓa ɓumɓɛ ɓɛ ghɛɛ̀sɛɛ rì ǹɗeèghreŋi wii; à kì tì lɛ ɓi ɓa rì bee i ǹkìyɛn ɓiɓan ɓi syeesyee ɓìcèm ɓi ɓi kɔ̀nkɔ̀n, à ki kì lɛ kìsay ki rìgherɛ̀n ɗin ɗyɛɛ̀ kìkì kɛɛ ɓa lɛ syeesyee.

¹² Fɔlɔɔ nnɛ ɗii ɗi Kan wìs Yeesus ɗi ɓiì kemì ɓi mìni, mìnii kem ɓi nyi, lɛ geesɛ̀n ì Bɛ̀ll wìs, rìì Kan Yeesus Kiris.