2 PYƐƐRI 3 - Bafia Nouveau Testament

Rìsugtìì ɗi Kan

¹ Mìni ɓum ɓɛm ɓɛ nɗem, kaàtà wɛ̀m à kìɓɛ̀ɛ̀ ànɛ ǹkàniì mìni yɛɛ ri lɛ; ɓi kìɓɛ̀ɛ̀rɛn ki ɓɛ̀kaàtà kiǹ, n-yiiyitì mìni ɓìɓan, lɛ nghem̀zi mìni mɛ̀rem yɛ̀ɛ ɓi ɓa rì syeesyee à fèg

² lɛ ɓi yiìyìtàg lɛ rì ɓìɓan ɓi ɓɛkpaŋzì-ɓìɓan ɓɛ ɓɛ ri ɓɛ̀tɛnɛn ɓɛ kpaaghà lɛ ɓi ɓiì kìlɛɛ, rì kìdɔ̀gsɛna ki Kan ànɛ à rì Ǹghɛɓsì-ɓum, kɛɛ̀ki ɓɛ̀kɛ̀nì-fìtom ɓin ɓɛ resìghà mìni.

³ Ka looghna kì yiì lɛ, ɓi mɛ̀ru mɛ siitòn, ɓum ɓɛdɛŋ ɓɛ ɓiì pee yì, ɓɛ ghɛghɛ̀ɓ lɔŋ yɛ̀ɛ mɛ̀rem maa mɛɛ̀ kɔ̀nkɔ̀n, ɓɛ wɔwɛ̀y mìni

⁴ ɓɛ ki kpaakpaa lɛ: Nni ǹkàg wu à kàkà lɛ à ɓiì sugtii yi wɛm̀be min? Lɛ à tumɛ̀n yɛ̀ɛ ɓɛ̀seŋi ɓis ɓɛ cuughà, ɓìɓan ɓìcèm ɓi ri lɔŋ zìŋ ɓi-kɔ̀ɔ̀ yɛ̀ɛ ɓyaà ɓa, à tumɛ̀n yɛ̀ɛ zi i kìlɛ̀ngà.

⁵ Lɛ ɓɛ ti ɓɛ ɗimzàg ɓi rìfee lɛ, ɗyoo rì zi ɓi kilɛ̀ngà abɛ̀y di Bɛ̀ll à tòòghrɛɛ, zi i kpaŋ yì ɓi mɛ̀nig, yɔ̀ nkìyɛn ɗi mɛ̀nig.

⁶ Nni mɛ̀nig mɛ coo don inɛ ì kìlɛ̀ngà mɛɛ ki yogsìghà tì lɛ rì ɗyoo rì zi ɓi ɓi ɓaghà ǹtonto.

⁷ Kìɓan kifog, ɗyoo rì zi ɓi tì seesee ɓi gɛɛ̀nɛ, ɓi ri ɓyom ɓi jɛ̀ɛ̀ ì Bɛ̀ll yɔ̀miɗ inɛ̀n yɛ̀ɛ ɓèŋɓèŋ lɛ ɗuu ɗi ri ɓyɔ ɓiì yogsii ŋwos anɛ ɓɛ ri yɔ̀mi gɛ ɓɛ̀kìì-kìɓe, ɓɛ cuusì ɓɔ.

⁸ Wɔ̀lɛ com ki ɓì ghɛ̀ɛ̀sɛɛ ɓi ki ɗimzɛɛ, mìni ɓum ɓɛm ɓɛ nɗem, ki ri lɛ: Ìru wùfog ɓi mis mɛ Kan wu ri yɛ̀ɛ bèg tɔɔsìm; bèg tɔɔsìm yi ɓa yɛ̀ɛ ìru wùfog.

⁹ Kan à lɛ̀mzii ɓi lɛ a roòzi ǹkàg wu à faghà yɛ̀ɛ ɓum ɓɛdɛŋ ɓɛɛ̀ fèfèg, ki ri yɛɛ ri lɛ, a nìniɗ nɗem rì mìni, lɛ ki kɔni ɓi nyi lɛ mum a ɗyaŋ̀ nsoò bog, rìkɔ̀n ɗii ɗi ri lɛ ɓum ɓɛ̀cèm ɓɛɛ kpaŋ ɓi nɗɛli wulɛ ɓɛɛ lɔɔ̀ghrɛn mɛ̀rem.

¹⁰ Ŋwos a Kan à ɓiì kpaŋì yɛ̀ɛ wiiwìì à ti à yùlàg. Ŋwos anɛ̀n, ɗyoo ɗi ri ɓiì silii ri coo gom, ɗuu ɗi digsì ɓyom ɓi ɓi ɗyoo, zi rì ɓìɓan ɓi miì ɓìcèm ɓi ɗig.

¹¹ Nni yɛ̀ɛ ɓyom ɓìcèm ɓi ghɛɛ̀sɛɛ kì ɗyaŋì fɔlɔɔ, ki ghɛɛ̀sɛɛ lɛ cɛɓ kin, ɗì rìfalɛ̀n ɗin ɗi ɓi rìgherɛ̀n ɓyɛɛ ɓa ɓìtɛnɛn lɛ kɔɔ̀kɔɔ̀.

¹² Mìni ɓɛ ɓi ɓoŋɓòŋ, ɓì ki lolos lɛ di ŋwos a Bɛ̀ll àa kpaŋi, ŋwos anɛ̀n yɛɛ ri ŋwos anɛ ɗuu ɗi ri ɓiì yogsii ɗyoo, ɓyom ɓi ɓi ri ɓi ɗyoo ɓi ghaŋmɛ̀n rìtɔ̀n ɗi nɗòò wu ɗuu.

¹³ Kìɓan kifog ɓìsii ɓoŋɓòŋ lɛ rì ɗyoo ɗi nyɔn rì zi i nyɔn ìnɛ saaɗ à ri ɓa miì, lɔŋ yɛ̀ɛ à kàkà.

¹⁴ Kìɓan kiǹ kɛɛ̀ki, mìni ɓum ɓɛm ɓɛ nɗem, cààmɛ̀n ki ɓi ka ɓoŋɓoŋ ŋwos anɛ̀n, tèèsiina nyoo lɛ ɓi ɓa ɓɛ̀tɛnɛn, kɛ̀ɛ̀ bɛ̀lɛn ɓi mis mɛ Bɛ̀ll, ɓì ki ɓa lɛ fyòoog rì nyi.

¹⁵ Terina rìnìɗ ɗi ǹɗem ɗi Kan wìs lɛ ɗi ri ɓi kìrɔɔ kin lɔŋ yɛ̀ɛ geni wìs a nɗem ànɛ lɛ Pol à kàngà girig mìni ɓi ɗyomzɛ̀n ɗi Bɛ̀ll à faghà nyi.

¹⁶ Fɔɔnnɛ à ti à kìlàg ɓi ɓɛ̀kaàtà ɓii ɓɛ̀cèm ɓɛ à ɓùŋi ɓìɓan ɓin miì, ɓɛ̀kaàtà ɓɛǹ ɓɛ ri rì jɛ̀ɛ̀ yidɛŋ yi yi teri rìwog, yɛɛ̀ yi ɓum ɓɛdɛŋ ɓɛ ɓɛ yii ɓi com, ɓɛ̀ kɛɛ̀ ɓa ɓɛsììrɛn yɛ̀ɛ ki ghɛɛ̀sɛɛ, ɓɛ ti ɓɛ sɛràg kì woògh lɔŋ yɛ̀ɛ ɓɛɛ̀ kiki ri ɓɛ̀kaàtà ɓɛmbòg, kìɓan kiǹ ki ki ɓa ɓisuu riɗyaŋ ɗyàà.

¹⁷ Mìni ɓum ɓɛm ɓɛ nɗem, ɓi ɓɛg wìn mìni yɛɛ mɛ log ki yiì ɓìɓan ɓiǹ lɔɔ abɛ̀y, nni kɔ̀riina rì ɗyomzɛ̀n, di kɛ̀ ɓi càrɛnti lɛ ɓɛ̀kìì-kìɓe ɓɛɛ ɗimzi mìni bee ri ɓìɓeɓtàg ɓyaa ɓi ɓiɓan ɓi ɓɛɛ̀ sɛ̀sɛ̀rì, fɔɔnnɛ kɛ̀ ɓi càɗ lɛ ɓɛɛ pwaŋ mìni ɓi ntyweeyi wu ɓì rɛrɛlii miì lɛ kpegkpeg,

¹⁸ wɔ̀lɛ tɔɔtɔɔna ɓi geesɛ̀n, rì ɓi rìyi ɗi Yeesus Kiris ànɛ à rì Ǹghɛɓsì-ɓum, nyi yɛɛ ghɛɛ̀sɛɛ rì rìkem à tumɛ̀n gɛɛ̀nɛ à kpaŋ fìɗyàɓ fikɔ̀ɔ̀, Ààmɛ̀n.