2 PYƐƐRI 2 - Bafia Nouveau Testament

Ɓɛ̀rèsì-dɔgtɛ̀n yi yi rɔɔtɛɛ ɓi

¹ Ɓɛ̀kpaŋzì-ɓìɓan ɓɛ ɓɛpwàà ɓɛ ɓaghà abɛ̀y ɓi kìlɔ̀ŋ, fɔlɔɔ nnɛ ɓɛ̀pwààpwaà ɓɛ ɓɛrèsàg ɓìdɔ̀gsɛna ɓɛ ri ɓiì ɓaà girig ɓi nyìinyìm wìn; ɓɛ ri ɓiì ɗiŋzii yi ɓìɓeɓtàg ɓi dɔgtɛ̀n ɓi ɓi rìɗyaŋ lɛ ɗyɔ̀ɔ̀ŋ, ɓɛ ki roòzɛn masà ànɛ à kwèɗkà ɓɔ, fɔlɔɔ a kì lɛ ɓɔmiɗ ɓɛɛ syoŋ yì cuu ki kɛ̀ kɛɛ̀ lɛ̀mziì ɓi nyoo yàà.

² Kìgwey ki ɓum ki ri ɓɔ ɓiì nɔ̀ɔ̀tii ɓi kìɓeɓtàg kaa ki cɛɓ, fɔɔnnɛ ɓum ɓɛ ri ɓiì feefengì bee ì saaɗ lɛ rìkì ɗyaa.

³ Lɛ kìsee ki mɔ̀ɔ̀ni ki ɓɛ ri rì kɔ, ɓɛ ri mìni ɓiì kpaakpaa ɓiɓan ɓi ɓɛpwàà lɛ ɓi fafa ɓɔ ɓyom; kìɓan kifog ŋwaànɛ à ghɛ̀ɛ̀sɛɛ ɓɔ kìyɔ̀mi à tighà m̀pègsɛn lɛ a ki kìsay kii fìɗyàɓ, fɔɔnnɛ rìɗyaŋ ɗyaa ɗyaa finɛn yi tì ɓi.

⁴ Ɓisuulɛ i Bɛ̀ll à rɔ̀ɓkà kɛ̀ɛ kèŋi ɓum ɓɛ titom ɓɛ ɓɛ kighà kìɓe, à ràm lɔŋ à ɓangì ɓɔ, à ki pìki ɓɔ ɓi bɛŋ yi yi ri rì birìm, wɔɔ nnɛ ɓɛ kaka ɓɛ̀ɓanɓanɛn ɓɛ ɓoŋɓoŋ ɓɛ̀yɔ̀m ɓɛ Bɛ̀ll;

⁵ i à rɔ̀ɓkà kɛ̀ɛ kèŋi ɓum ɓɛ ǹtonto, kìɓan kifog à ghɛɓsìghà lɔŋ ɓum taàraa yɛ̀ɛ à romgày coo doni mɛnig ɓi zi i ɓɛ̀kìì-kìɓe; Nowe ànɛ à lààlàmɓɛ̀ngà saaɗ à ɓaghà ɓi ɓum ɓɛ kitaàraa ɓɛ̀n;

⁶ i à cɛ̀mgà bàn yi lɛ rì Sɔdɔm rì Gɔmɔɔr lɛ yɛɛ ɗyaŋ, à ki ɓùgsi yɔ lɛ ɓùùghɓùùgh lɛ yɛɛ ɓa kìfèèghrɛnà ɓi ɓɛ̀kìì-kìɓe ɓɛ ɓi mɛ̀ru mɛ asu,

⁷ kìɓan kifog à ghɛɓsìghà Lɔt ànɛ à ɓaghà ŋwaà saaɗ, ànɛ cɛɓ ki tifin ki ɓɛwolì-ɓum ɓɛ a Sɔdɔm rì Gɔmɔɔr ɓɛǹ, ɓɛ wowɔlà rì ǹɗemi-kɛŋɛn

⁸ ɓisuulɛ saaɗ à mum ànɛ̀n à ghɛghɛ̀ɓkà ɓi nyìinyìm wàà, à seesèè ɓìɓan ɓyaa, à ki wowog ɓyɔ mɛ̀ru mɛ̀cèm; ǹɗem wii wu wu ɓaghà lɛ saaɗ wu ɗiìɗìlɛ̀n ɓisuu ɓiɓeɓtàg ɓyaa ɓi ɓiɓan ɓiǹ.

⁹ Fɔlɔɔ a rèsii lɛ Kan à yii rìghɛɓsì ɗi ɓumɓɛ ɓɛ falɛɛ ɓi rìgherɛ̀n di ɓɛ ri ɓi mɛ̀fèèghrɛn, à ki ɓoŋzag ɓiɓeɓtàg ɓi ɓum lɛ ɓyɛɛ ɓoŋ yɛ̀ɛ à rì ɓyɔ ɓiì pɔnɔsii ŋwosi ɓɛyɔ̀m ɓii.

¹⁰ À ɓiisɛ̀n ɓɛ̀roɓɛ ɓɛ ti ɓɛ yɛɛ̀sàg ɓìɓan ɓi tifin, ɓɛ nɔɔ̀nɔ̀ɔ̀tì ɓìɓan ɓi ɓi ti ɓi rɔɔghì mɛ̀mùù, ɓɛ sɛɛtì jɛ̀ɛ̀ ì rìlàmì ì Kan. Ɓɛ tɔɔghraagh mɛ̀rem, ɓɛ ki ɓalag ri kalɛn, ɓɛ̀ kɛɛ̀ risi risɛmgì ɗi ɓyom ɓi ɓyɛɛ̀ ghɛghɛɓ aɗyoo ɓi rìkem.

¹¹ Kɔm̀ lɛ, nsoò ɓum ɓɛ titom ɓɛ ceeghii ɓɛ̀rèsàg ɓɛ ɓɛpwàà lɛ, rì ɓi-tèɗ, rì ɓi nkoŋ, ɓɛ ti ɓɛ̀ kɛɛ̀ sɔmɛn ɓyom ɓìn, ɗì rìkuu ɗi tisɛm ɗiǹ ɓi mis mɛ Kan.

¹² Kìɓan kifog, ɓɛ ri lɔŋ yɛ̀ɛ nyàm yi yi yin ɗi ɗyomzɛ̀n, yɛɛ kilɛ̀ngà lɛ ɓɛɛ ɓaǹɓan di ɓɛɛ̀ wewèy, fɔɔnnɛ ɓɛ ti ɓɛ sɛmgì com ki ɓɛ yii ɓi, ɓɛ ri lɔŋ ɓiì cuù lɛ rìɓa ɗyaa ɗi ɓɛ ri ɓìɗyoŋi.

¹³ Mɛlèɓ mɛ ɓi kìtɛ̀ŋtɛ̀ŋ mɛ ri ɓiì ɓaà lɛ kìtɛ̀ŋtɛ̀ŋ. Kìrɔɔ ki ɓɛ ri lɛ ɓɛ wog ki ri lɛ ɓɛɛ kiki ɓìɓeɓtàg ɓi ɓiɓan ɓi ɓi ti ɓi kɔngì ɓɔ rì ŋwos ɓi nto. Ɓɛ ti ɓɛ ɓutàg kɔm̀ ɗì mìni, ɓɛ teɗ gàɓ ɓi ɓìɗilàg ɓin ɓi rigeni, wɔ̀lɛ rìkɛ̀ɛ̀ ɗyaa ɗi ri ǹtoòrìɗ, ɗi ki ɓa kiɓan ki fiɓàg; ɓɛ ti ɓɛ nyaàràg rì m̀ɓɔ̀ŋɗɛ̀n ànɛ ɓɛɛ̀ ɓɔ̀ŋɓɔŋ ɓum.

¹⁴ Mis maa mɛ ri lɔŋ kizyaa ri kìzyaa, ɓɛ̀ kɛɛ̀ ki wuri rikì ɗi kiɓe; ɓɛ ti ɓɛ wɔɔsàg ɓumɓɛ ɓɛ ri mɛ̀rem lɛ fɛnfɛn ɓi fìram fyaa, mɛ̀rem maa mɛ mɛɛ̀tɛɛ rì zày ì mɔ̀ɔ̀ni, ɓɛ ri ɓum ɓɛ ncɛ̀m.

¹⁵ Yɛ̀ɛ ɓɛ caɗkà bee ì syeesyee ɓɛ kɛǹ kì pasɛɛ ɓi bee i Balam à man à Beɔr ànɛ à keesìghà rìfɔ̀n ɗi mɔ̀ɔ̀ni ɓi bee ì kìtɛ̀ŋtɛ̀ŋ,

¹⁶ kìɓan kifog, ɓɛ fwaadɛ̀ngà nyi ɓi kìɓeɓtàg ki rikì ki à ɓaghà ɓiì kìkii. Lɛ Jàɗki ìnɛ ì ti yɛ̀ kɛɛ̀ tòòghrɛn, ì tòòghrɛ̀n gà yɛ̀ɛ mum, ì rèsì kìyèg ki rikì ki ǹkpaŋzì-ɓìɓan a ɓaghà ɓiì kìkii.

¹⁷ Ɓumɓɛ̀n ɓɛ ri yɛ̀ɛ ɓɛ̀pom ɓɛ mɛnig ɓɛ ɓɛ ri kɛ̀ɛ̀ mɛ̀nig, yɛ̀ɛ ɓìkwìɗ ɓi coo bɛ̀ɓ kɛɛ̀ tyɔtyɔg; Bɛ̀ll à nyamgà ɓɔ ìkɔ̀ɔ̀ ɓi birìm ì kɔɔ̀kɔɔ̀.

¹⁸ Ɓɛ ti ɓɛ kalàg ɓìɓan ɓi ɓidaŋà ɓi ɓi ri kɛ̀ɛ̀ ìsu, ɓɛ ɓaàdɛ̀n ɓi zày ì ɓìɓan ɓi tifin ɓi ɓi mɛ̀mùù lɛ ɓɛɛ yegsi ɓumɓɛ ɓɛ mɛɛ̀ sɔtɛ̀n yi ɓi nyìinyìm à ɓumɓɛ ɓɛɛ̀ ghɛghɛɓ ɓi rìɗim ɓi ɗùm;

¹⁹ ɓɛ kakàg ɓɔ cɛɓ ki rikan, kɔm̀ lɛ ɓɔmiɗ ɓɛ ri ɓɛ̀kpàn ɓɛ ɓiɓe ɓi ɓyɛɛ̀ titini ɓɔ ɓi rìɗyaŋ ɓisuulɛ mum bimiɗ à rì ǹkpàn a com kìcèm ki ki lamii nyi.

²⁰ Fɔlɔɔ yɛɛ ri lɛ i ɓum ɓɛ ghasɛɛ yì rì ɓìɓan ɓi tifin ɓi ɓi ziinɛ lɛ rìyi ɗi ɓɛ yii Ǹghɛɓsì-ɓum, Kan Yeesus Kiris, nnɛ ɓɛ carɛɛ tì lɛ ɓɛɛ sugti ɓi ɓìɓan ɓiǹ ɓyɛɛ lami tì ɓɔ, rìɓa ɗyaa ɗi siitòn ɗi ɓiì ɓeɓtɛɛ ɗi cee ɗi ǹtonto.

²¹ Lɛ ki ɓaghà lɛ ki ɓa tì rì ziŋ ɓi san wàà lɛ ɓɛ̀ kɛɛ̀ yi bee ì saaɗ, à cee lɛ i ɓaa yi yɔ̀, ɓɛɛ lɔɔgh tì jɛ̀m rì kìdɔ̀gsɛna ki tɛnɛn ki ɓɛ faghà ɓɔ.

²² Kìɓan ki ki kighà ɓɔ ki resii saaɗ ànɛ ɓi dàɗkì ìnɛ yɛɛ̀ kpaaghi lɛ: Bu ìi nsugtii tì kì ɗiì ɓyom ɓi ì nlooghii, jèè inɛ ɓɛ wuɓsii lɔŋ a-kɔ̀ɔ̀, ì kɛ̀ɛ̀dì kì tɔɓɓɛɛ ɓi bìbìɗ.