2 PYƐƐRI 1 - Bafia Nouveau Testament

Pyɛɛri à tògsì ɓum ɓɛ à kàni

¹ Mɛ̀ Simɔn Pyɛɛri ànɛ ǹɗì ǹkìì-kìsay, ǹki ɓa ti nkɛ̀nì-fìtom a Yeesus Kiris, ǹkàni ɓumɓɛ Bɛ̀ll à faghà rìkuu ɗi ntyweeyi ɗifog rì ɗinkis, ɓisu saaɗ à Yeesus Kiris à Bɛ̀ll wìs rì ǹghɛɓsì wìs.

² Geesɛ̀n rì fyòoog ɓyɛɛ teghɛn a lɔ̀ŋkin lɛɛ̀gwey lɛ rìyi ɗi ɓì yii lɛ rì Bɛ̀ll rì Yeesus Kiris à Kan wìs.

Ɓìsyɔ̀ɔ̀ ɓi ɓɛ̀kìristɛ̀n ɓɛ ghɛ̀ɛ̀sɛɛ kì ɓaà rì ɓyɔ

³ Ìtèɗ wu Kan wu wu riì yɛ̀ɛ Bɛ̀ll wu faghà ɓìsi com kìcèm ki ki ri lɛ ki ghɛɓsì ɓìsi lɛ ti ghɛɓ cɛɓ ki lɛ ti falɛn rì Bɛ̀ll ɓi rìkì ɗi à kìghà lɛ ti yi roànɛ à reŋìghà ɓìsi lɛ ti kaɓɓɛn rìkem ɗii, rì syeesyee wìì a kìsyɔ̀ɔ̀.

⁴ Fɔlɔɔ nnɛ à faghà ɓìsi ɓyoo ɓisyeesyee rì gìn yi mɛkàg lɛ, i ɓì teri ɓyom ɓi à kàkà, ɓì ɓa rì ìtèɗ wulɛ ɓi ghɛŋi ɓìɓeɓtàg ɓi ɓiɓan ɓi ɓyɛɛ̀ yooyogsì ɓum ɓyɛɛ ri ɓìcakɛn ɗi ziinɛ, ɓi yu kì terì gàɓ ɓi rìɓa ɗii ɗi à rì Bɛ̀ll.

⁵ Ɓisu wìn miì nnɛ ɓì ghɛɛ̀sɛɛ kì foŋì ìtèɗ win wucèm lɛ, ɓi ɓɔɓtɛn syeesyee à kìsyɔ̀ɔ̀ ɓi rìgherɛ̀n ɗin, ɓì ɓɔ̀ɓtɛ̀n rìyi ɓi syeesyee à kìsyɔ̀ɔ̀,

⁶ ɓi rìyi ɗìn aɗyoo, ɓì ɓɔ̀ɓtɛ̀n tì rìnìɗ ɗi nɗem; ɓi rìnìɗ ɗi nɗem ɗìn, ɓì sagtɛ̀ntì kìsììrì; ɓi kìsììrì kiǹ, ɓì foŋdì rìfalɛ̀n ɗi ɓi rìgherɛ̀n;

⁷ ɓi rìfalɛ̀n ɗi ɓi rìgherɛ̀n, ɓì ɓɔ̀ɓtɛ̀ntì kìrɔɔrɛɛ ki ɓi rìgeni; ɓi kìrɔɔrɛɛ ki ɓi rìgeni kìn, ɓì foŋ̀dì ǹkɔ̀nɛ̀n.

⁸ Ɓisuulɛ i ɓì rì rì ɓìɓan ɓiǹ, nni ɓi ghɛnɛɛ a lɔ̀ŋkin lɛɛ̀gwey, ɓì yin lɛ ɓì rɔ̀ɓ lɛ ɓì kìi ɓi lɛ ɓi ɓa ɓumɓɛ ɓɛɛ̀ sasày ɓɛ ki wumwum ɓiɗùn, ɓi rìyi ɗi ɓì yii Kan wìs Yeesus Kiris.

⁹ Kìɓan kifog, ŋwaànɛ à tàŋi ɓìɓan ɓiǹ à rì ɗyaŋɗyàŋ ànɛ a mɔmɔɓ m̀mɔmɔɓɛn, à ɗimzɛ̀n lɛ ɓìɓe ɓii ɓi abɛ̀y ɓi ti ɓì sòòyɛn.

¹⁰ Kìɓan kiǹ kɛɛ̀ki mìni ɓɛ̀geni ɓɛ̀m, ɓì ghɛ̀ɛ̀sɛɛ kì tèèsii nyoo lɛ ɓi siìrag ǹɗeèghreŋi win ɗi rìɓɔ̀n ɗi Bɛ̀ll à ɓɔ̀ngà mìni; i ɓì kìi fɔlɔɔ, ɓyàa kpì ɓi ɓi kìɓe.

¹¹ Fɔlɔɔ anɛ̀n nnɛ rìɗiŋì ɗin ɗi ɓi kìlɔ̀ŋ ki fiɗyàɓ fikɔ̀ɔ̀, ki Kan wìs rì ǹghɛɓsì wìs Yeesus Kiris, ɗi ri ɓiì ɓaà kɛ̀ɛ̀ maa ntɔɓ nsoò lɛsàg.

¹² Kìɓan kiǹ kɛɛ̀ki ǹɗì lɔŋ mini ɓiì yiiyitàg ɓìɓan ɓiǹ cààmɛ̀n kìcèm kaa soo rì lɛ ɓì mɛ yi ɓyɔ, ɓì ki ɓa ɓɛsììrɛn lɛ syeesyee ɓi saaɗ ànɛ ɓì tekà.

¹³ Mɛ̀ɛ ǹghɛɛ lɛ ki ri lɛ syeesyee lɛ cààmɛ̀n kìcèm ki ǹkaka ɓi ziinɛ, nki lɛ ǹɗem win wɛ̀ kɛɛ̀ wu ɓi rìyitì ɗi ǹɗì mìni ɓiì yiiyitàg ɓìɓan ɓiǹ,

¹⁴ ɓisuulɛ ǹ-yii lɔŋ yɛ̀ɛ Kan wɛ̀m Yeesus Kiris àa nɗèsii mɛ̀ lɛ rìpɛ̀sɛ̀n ɗyɛm̀ ɗi ɓi ziinɛ ɗi ti jàŋbog.

¹⁵ Kìɓan kifog ǹɗì ɓiì kaà bee inɛ lɛ ajɛ̀m ì rìpɛ̀sɛ̀n ɗyɛm̀, ɓi rɔɓ kìyitaagh ɓiɓan ɓiǹ ɓi ɓyààmɛ̀n ɓi ɓi ghɛɛ̀sɛɛ.

¹⁶ Lɛ yɛ̀ɛ tì rèsìghà mìni kìɓan ki lɛ Kan wìs Yeesus Kiris à rì ɓiì sugtii yi, à ɓay rì ìtèɗ, tì ɓaàdɛ̀ngà ɓi ɓi mɛ̀kànkàn mɛ ɓum ɓɛ konaagh kì syaàgh, tì rèsìghà lɔŋ mini kìɓan kiǹ ɓisuulɛ ɓìsiìɓɔmiɗ tì ghɛngà rìgwey ɗii fɛlɛ rì mis mìs.

¹⁷ Ɓisuulɛ à tekà lɛ rì ǹnyaasɛ̀n rì rìkem yɛ̀ɛ Bɛ̀ll à Seŋi wìs ɓi cààmɛ̀n ki jɛ̀ɛ̀ ìnɛ ì ɓaghày ɓi jàŋ inɛ rìkem ɗi Bɛ̀ll ɗi ɗi cee ɗi ri, lɛ: Roànɛ à rì man wɛm̀ à nɗem ànɛ à ti à rɔɔghì mɛ̀.

¹⁸ Tì wokày jɛ̀ɛ̀ ìnɛn di ì tòòghrɛɛ yì ɓi ɗyoo yɛ̀ɛ tì ɓaghà rì nyi ɓi dòn ìnɛ ì rì ǹtɛnɛn aɗyòò.

¹⁹ Fɔlɔɔ nnɛ tì ɓiisɛɛ tì kìgherɛɛ rikpaa ɗi ɓɛ̀kpaŋzì-ɓìɓan lɛ ɗi ri saaɗ; saaɗ ànɛ̀n innɛ ɓi kookonàg yɛ̀ɛ ɓi ranɗam mɛreè lɛ ɓi wog lɛ à rì fɛlɛ yɛ̀ɛ lamɓà ànɛ a ròòroo ɓi jàŋ inɛ ì rì birìm, à kpaŋ yɛ̀ɛ duri i ɓiì tanì, fyɛy fi duriɓuɓ fi kpeŋzì mɛ̀rem min.

²⁰ Kìɓan ki asu ki ɓì ghɛ̀ɛ̀sɛɛ kì yiì ki ri lɛ, kɛ̀ɛ̀ kìɓan kidɛŋ ki ɓɛ̀kpaŋzì-ɓìɓan ɓɛ resìghà ki ki ri kìkànɛn, ki mum à rì lɛ à wog azi anɛ miì yɛ̀ɛ nyii kɔni lɛ a wog,

²¹ ɓisuulɛ ɓum ɓɛ ti kɛ̀ ɓɛɛ̀ kpaŋzi-ɓiɓan ɓi Bɛ̀ll ɓi rìkɔ̀n ɗyaa ɗi ɓɔmiɗ, kìɓan kifog ɓum ɓɛ toòghrɛ̀ngà ɓi ɗii ɗi Bɛ̀ll lɛ Kìtɛntɛ̀ɛ̀n ki Nghay ki tinìghà ɓɔ lɛ ɓɛɛ toòghrɛn.