Bìoball air-loidhne

2 KƆ̀RƐ̀ŊTYƐŊ 6 - Bafia Nouveau Testament

¹ Nni yɛ̀ɛ ki ri lɛ ti sasay nɗaŋ ri nyi, tì tɔɔgh mìni lɛ, kɛ̀ ɓi kì ɓaà lɛ geesɛ̀n ì Bɛ̀ll ìnɛ ɓì ghàɓkà yɛ̀ɛ wu zɛy.

² Lɛ a kalag lɛ: M̀ɓàkà bɔ̀ŋzɛ̀n yɔ̀ɔ̀ ɓi syeesyee à cààmɛ̀n; ǹghɛɓsìghà wɔ̀ ŋwosi gòri. Syeesyee à cààmɛ̀n innɛ min lɛ ɓigomìnɛ, ŋwosi gòri innɛ min lɛ ɓigomìnɛ.

³ Ɓìsii kɔni ɓi lɛ di tyàa kɛ̀ɓtii mum fìɓàg nsoò ɓi bee inɛ là, lɛ kìsay kis ki ghɛɛ̀sɛɛ kì ɓaà kɛ̀ɛ̀ kìɓan ki ɓum ɓɛ ri lɛ ɓɛ cɛɛ̀cɛ̀mdɛ̀n ɓìsi miì.

⁴ Wɔ̀lɛ ɓi ɓìɓan ɓìcèm, ɓìsiì rèresi kɔm̀ lɛ tì rì ɓɛ̀kìì-ɓìsay ɓɛ Bɛ̀ll, ɓi coo rinìɗ ɗi nɗem ɗi tì rì rì ɗyɔ ɓi rìkɛŋ, rì ɓi cɛɓ ki nyìinyìg rì ɓi ɓìɓan ɓi ɓyɛɛ̀ falag iris,

⁵ rì ɓi ǹkulɛ̀n, rì ɓi naà-zày, rì ɓìyoòyòò ɓi ɓɛɛ̀ kìki lɛ ɓɛɛ yeesi ɓisi, rì ɓìsay ɓi ɓi fɔɔsɛɛ, rì ɓɛ̀saalo, rì rìcàɗ ɗi ɓisi zày.

⁶ Ti rèresi lɛ tì rì ɓɛ̀kìì-ɓìsay ɓɛ Bɛ̀ll, ɓi rìtɛn, ɓi rìyi ɗi ɓiɓan, ɓi kìɓìɓi kis ki nɗem, ɓi kìpuɓì-nɗem ki tì rì rì kɔ, ɓi Kìtɛntɛ̀ɛ̀n ki Ǹghay, rì ɓi nkɔnɛ̀n ànɛ à yin ri mɛ̀ghèy,

⁷ ɓi jɛ̀ɛ̀ ì saaɗ ìnɛ ti ghaaghagsì, rì ɓi-tèɗ wu Bɛ̀ll, rì ɓi ɓyom ɓi ribaŋì ɓi saaɗ ɓi tì rì rì ɓyɔ, lɛ rì ɓi rooroŋɗɛ̀n wɛ̀y ri ɓyɔ, rì ɓi lɛ ɓɛ gheeghrɛ̀n wɛ̀y miì;

⁸ ɓi rìkem rì ɓi zɛɛtɛn, ɓi mɛ̀sɛɛ̀ghsɛɛgh rì ɓi tìfena; ɓɛ seesèè ɓìsi yɛ̀ɛ ɓɛ̀pwààpwaà kɔm̀ lɛ tì rì ɓumɓɛ ɓɛɛ̀ kpaakpaa saaɗ;

⁹ lɔŋ yɛ̀ɛ ɓumɓɛ ɓɛ yii ɓi, kɔm̀ lɛ ɓum ɓɛ̀cèm ɓɛ yii ɓìsi, ɓɛ seesèè ɓìsi yɛ̀ɛ ɓumɓɛ ɓɛ ti ɓiì wiì kɔm̀ lɛ tì rì cencem, ɓɛ soo ri pɔnɔsi ɓisi ɓɛ̀ kɛɛ̀ weeyi ɓìsi;

¹⁰ ɓɛ soo ri ɓeeɓeɓsì ɓìsi mɛ̀rem, ɓìsii ri lɔŋ kinyàà rì kìnyàà cààmɛ̀n kìcèm, ɓɛ seesèè lɛ tì rì ɓɛ̀soghàsogha, ɓìsii kuùkùmzì ɓum lɛɛ̀gwey, tyàa soo seèsèèrɛ̀n lɛ tì yin ɗi com, tì rì lɔŋ ri ɓyom ɓìcèm.

Rìghasɛ̀n ɗi rì kìɓe

¹¹ Tìi ntòòghrɛɛ rì mìni lɛ fwàafwàày, mìni Ɓɛ̀kɔ̀rɛ̀ŋtyɛŋ, ǹɗem wis wu nɛmɓɛ̀n lɛ vùraŋŋ ɓi ɓɛg wìn.

¹² Kìkpaŋ ki tì nɛmi mìni ɓi mɛ̀rem mis ki tɛɓi ɓi, ki mìnii faa ɓìsi ɓi mɛ̀rem min kɛɛ ri lɛsàg.

¹³ Fɔɔnnɛ ntòtog ri mìni fɛlɛ yɛ̀ɛ ɓì rì ɓɔn ɓɛm, ɓaana rì ǹkɔ̀nɛ̀n ɓi ɓɛg wìs yɛ̀ɛ ànɛ ɓìsii ri rì nyi ɓi ɓɛg wìn; nɛmina girig ɓìsi mɛ̀rem min mɛcèm.

¹⁴ Kɛ̀ ɓi ɓasɛn ɗi ɓumɓɛ ɓɛ yin ɓɛgherɛ̀n lɛ ɓi foŋɗɛn mìniìɓɔmiɗ ɓi kìɓèg ki ki ghɛɛ̀sɛɛ ɓi ri mìni. Cɛ kɛɛ ri lɛ ki raɗ lɛ rì saaɗ rì kìtɛ̀ŋtɛ̀ŋ? Nsoò lɛ cɛ kɛɛ ri lɛ ki raɗ lɛ rì kìtɛɛtɛn rì birìm?

¹⁵ Cɛ kɛɛ ri lɛ ki ki lɛ rì Kiris rì Satàn ɓɛɛ kpaŋ jɛ̀ɛ̀ bog? Nsoò lɛ ɓas aɗi yɛɛ ri lɛ à ɓa lɛ rì ǹgherɛ̀n rì ŋwaànɛ à yin ngherɛ̀n?

¹⁶ Naà-Bɛ̀ll ì wuɓsɛɛ ɓi cɛ ri ɓìnùn ɓi zɛy? Lɛ ɓìsii ri naà-Bɛ̀ll ì Bɛ̀ll ànɛ à rì cem lɔŋ yɛ̀ɛ Bɛ̀ll à kpaaghà lɛ: Ǹkìi gɛ lɛ, ǹkɔ̀rì ǹki kɛ̀ɛ̀kɛɛ ɓi nyìinyìm wàà, m̀ɓaa gɛ Bɛ̀ll wàà, ɓɔɔ ɓa ɓum ɓɛm.

¹⁷ Kìɓan kiǹ kɛɛ̀ki, pɛ̀sɛɛna ɓi nyìinyìm wàà, ɓi kpaŋdɛ̀n daŋdarààŋ, rìkpaa ɗi Kan ɗyɛɛ̀ ɗìn; kɛ̀ ɓi kòm com ki ki ri rì kìsyeg, di fɔɔnnɛ ǹɗì mìni ɓiì ghàɓi ri kìnyàà.

¹⁸ M̀ɓaa gɛ Seŋi wìn, mìnii ɓa mɛ̀ ɓɔn ɓɛ ɓɛ baŋì rì ɓɛ ɓɛ̀yiɓ, fɔɔnnɛ Kan à ìtèɗ wucèm a kpaaghì.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan