Bìoball air-loidhne

2 KƆ̀RƐ̀ŊTYƐŊ 5 - Bafia Nouveau Testament

¹ Lɛ tì yii lɛ, i kìlaa ki ti ghɛghɛɓ miì fɛ ɓi ziinɛ, kɛɛ ri nyoo yìs ki waàrɛɛ, tì rì rì ɓìtèetèɗ ɓi mɛɛ aɗyoo ɓi Bɛ̀ll à togà, ɓyɛɛ ri fìɗyàɓ fikɔ̀ɔ̀; mɛɛ mɛn mɛ yin mɛɛ mɛ ɓum ɓɛ toŋi rì ɓyàg ɓyaa.

² Kìɓan kiǹ kɛɛ̀ki ɓìsiì ɓemɓem ɓi kìlaa ki tì rì miì, rì coo zày ìnɛ lɛ di tyàa ɗiŋii ɓi mɛɛ mɛ aɗyoo, mɛɛ lɔgtɛn mɛm̀bog,

³ di ki ki ɓaa lɛ, ɓɛ ghɛɛ lɛ, tì rì ɓɛ̀waatɛn ɓilàà, tì yin nyoo zɛy.

⁴ Lɛ cààmɛ̀n kìcèm ki tì rì ɓi kìlaa ki, tì rì rì bemeg, mɛ̀tɔɓ mɛ laatàg ɓìsi, ki yin ɓaà loo lɛ ti kaakaa lɛ di tyàa ghasɛɛ rì nyoo yìs ìnɛ fɛ, wɔ̀lɛ ti kɔ̀ngi lɛ di tyàa ɓɔ̀ɓtɛɛ kìlaa ɓi kimbog, lɛ di cɛɓ kɛɛ miǹ com ki ki ri lɛ ki wu.

⁵ Bɛ̀ll nyimiɗ yɛɛ pegsɛ̀ngà lɛ ɓìsii ri ɓiì lɔ̀ɔ̀ghrɛɛ ɓi rìkuu ɗi rilɔ̀ɔ̀ghrɛ̀n ɗiǹ, fɔlɔɔ nnɛ à faghà ɓìsi Ǹghay wìì ɓi sìg à kìrèmzɛnà ki kɛɛ resi lɛ, à ɓèŋɓeŋi ɓìrɔɔ ɓidɛŋ ɓisu wis.

⁶ Fɔlɔɔ nnɛ tì rì miì ɓɛ̀ronɛn ri ìtèɗ ɓi nɗem cààmɛ̀n kìcèm, tì yii lɛ cààmɛ̀n kìcèm ki tì kaka ɓi nyoo ìnɛ tì rì rì yɔ̀, tì kaka ɓɛ̀ràɓsɛn ɗi mɛɛ mɛ Kan;

⁷ lɛ ɓìsii yin ɓiì kɛ̀ɛ̀kɛɛ lɛ yɛ̀ɛ ti seesee ɓyom, ti kɛ̀ɛ̀kɛɛ lɛ rìgherɛ̀n.

⁸ Ìtèɗ wu ri ɓìsi wu ronɛn ɓi mɛ̀rem lɛ pisa, fɔɔnnɛ tì rì lɛ tì ɓiìsɛ̀n kì ghɛɛ̀ kìrɔɔ lɛ ti caɗ nyoo ìnɛ tì rì ìnɛ rì yɔ̀, ti kɛǹ kì kɔ̀rii jàŋbog rì Kan.

⁹ Kìɓan ki asu ki tì ɓiisɛɛ kì kaakaa ki ri lɛ, ti puɓsi nyi nɗem, tyàa soo kaka ɓi nyoo ìnɛ tì rì ìnɛ rì yɔ̀, tyàa soo ki ghasɛɛ rì yɔ̀.

¹⁰ Ɓisuulɛ ɓìsi ɓɛ̀sɛ̀ɛ̀ ɓɛ̀cèm, tì ghɛ̀ɛ̀sɛɛ kì rɛlii ɓi mis mɛ Kiris lɛ a yɔm̀ ɓìsi, fɔlɔɔ nnɛ mum ǹcèm à ɓiì terì mɛ̀lèɓ mɛ mɛ ghɛɛ̀sɛɛ rì nyi, ɓi ɓìɓan ɓi à kìghà, nsoò ɓi syeesyee nsoò ɓi ɓeɓtɛn cààmɛ̀n ki à ɓaghà di a ka ghɛghɛɓ ɓi nyoo ì mɛ̀mùù.

Ɓum ɓɛ mɛ sugti kiràrɛɛ ri Bɛ̀ll lɛ Kiris

¹¹ Nni yɛ̀ɛ tì yii com ki ki ri lɛ rìrisì ɗi Kan, nnɛ ti kaakaa bee inɛ lɛ ti syoŋ̀ ɓum. Bɛ̀ll à yii ɓìsi lɛ syeesyee, ǹki rì rì ntyweeyi lɛ nsoò mìni, ɓì yii girig ɓìsi ɓi mɛ̀rem min ɓiɗùm.

¹² Tì yiìdi ɓiì tɔtɔɔgh ti nyɔɔnyɔn à rìtɔg lɛ ɓi ghaɓ ɓìsi; wɔ̀lɛ ti kɔ̀nkɔn lɛ di tyàa faa mìni bee inɛ ɓi saàsànɛ̀n ɓum kìɓan kis, fɔlɔɔ nnɛ ɓì rì ɓiì ɓaa rì com ki ɓì rì lɛ ɓì ɓàg ɓumɓɛ ɓɛɛ̀ teeterɛ̀n rìkem ɓi ɓìɓan ɓi ɓum ɓɛɛ̀ seesèè, rìkem ɗìn ɗyɛ̀ kɛɛ̀ ɓa ɓi ɓìɓan ɓi ɓi ri ɓi kɔɔ̀kɔɔ̀.

¹³ Ɓisuulɛ i tì rì ɓìyèg, tì rì ɓìyèg ɓisuu Bɛ̀ll; i tì ki rì rì Syeesyee à ɗyomzɛ̀n tì rì fɔlɔɔ ɓisu win.

¹⁴ Lɛ ǹkɔ̀nɛ̀n à Kiris à ɓanɓani ɓìsi rì ìtèɗ ɓisuulɛ ɓìsiì fèki lɛ, i mum bog à wughà ɓisuu ɓum ɓɛ̀cèm, di ɓum ɓɛ̀cèm ɓɛ ri min ɓilòŋ.

¹⁵ À wughà ɓisuu ɓum ɓɛ̀cèm lɛ di ɓumɓɛ ɓɛ kaka cem ɓɛ̀ kɛɛ̀ ghɛghɛɓ ti ɓisu waa wu ɓɔmiɗ, ɓɛɛ ghɛɓ lɔŋ ɓisuu roànɛ à wughà, à ki ghèmɓɛn ɓisu wàà.

¹⁶ Fɔlɔɔ nnɛ à tumɛ̀n ɓigomìnɛ ɓìsii yitii tì ɓi mum ɓi rìyi ɗi ɓi mɛ̀mùù; nsoò tì yighà Kiris ɓi rìyi ɗi ɓi mɛ̀mùù, tì yitii tì ɓi nyi ɓi rìkuu ɗi riyi ɗìn, ɓigomìnɛ.

¹⁷ I mum à ti ɓi Kiris ɓiɗùm, à ti nyɔɔnyɔn à mum, lɛ tìɗyàɓ ti ɓiɓan ti mɛ ghaàgh, ɓyom ɓi nyɔn ɓyɛɛ ti.

¹⁸ Ɓìɓan ɓiǹ ɓìcèm ɓi riì yɛ̀ɛ Bɛ̀ll ànɛ à kìghà lɛ paàzì ànɛ lɛ rì ɓìsi rì nyi a leg lɛ Kiris; nnyɛɛ ki faghà ɓìsi kìsay lɛ ɓum ɓɛɛ leg ɓi kìɓan ri nyi.

¹⁹ Ɓisuulɛ Bɛ̀ll à ɓaghà ɓi Kiris, à kaakàà lɛ paàzì ànɛ lɛ rì nyi rì ɓum ɓɛ̀cèm a pegsɛn, kɛ̀ɛ fiɓi ɓiɓe ɓyaa; nnyɛɛ faghà ɓìsi ìtèɗ wu làalamɓɛ̀n pègsɛ̀n à kìɓan ki lɛ rì Nyi rì ɓum.

²⁰ Ɓi ɗii ɗi Kiris innɛ tì rì ɓɛ̀romɛn fɔɔnnɛ Bɛ̀ll nyimiɗ yɛɛ̀ feèfègsì mìni ɓi myɔm mis; tì ɓɔ̀ŋzaagh mìni ɓi ɗii ɗi Kiris lɛ ɓi gherɛn lɛ ɓi pegsɛn kìɓan ki lɛ rì mìni rì Bɛ̀ll.

²¹ Roànɛ à kìghà ɓi kiɓe nsoò ŋwos bog, Bɛ̀ll à ghaasìghà nyi kìɓe ɓisu wis, lɛ di ti ghɛn kìrɔɔ ɓi kìsay ki Bɛ̀ll à kìghà lɛ ti ɓa ɓum ɓɛ saaɗ ɓi mis mìì.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan