Bìoball air-loidhne

2 KƆ̀RƐ̀ŊTYƐŊ 3 - Bafia Nouveau Testament

¹ Ɓìtòkì ɓiǹ ɓi resii nya lɛ tì tumɛɛ tì rìreɓsɛ̀n ɗi ɓìsiìɓɔmiɗ? Gìn ki ri nya lɛ ti ka ɓa ri ɓɛ̀kaàtà ɓɛ lɛ ɓi ghaɓ ɓìsi fɛlɛ yɛ̀ɛ ɓum ɓɛdɛŋ ɓɛ ti ɓɛ kilàg nsoò lɛ ti tɔg mìni ɓɛ̀kaàtà ɓɛ fɔlɔɔ?

² Mìni yɛɛ ri kaàtà wìs anɛ à rì ǹkànɛn ɓi mɛ̀rem mis, innɛ ɓum ɓɛ̀cèm ɓɛ ri lɛ ɓɛ yi, ɓɛ ki ɓày.

³ Kɛɛ̀ rèeresɛ̀n lɛ tɛntɛ̀ɛ̀n lɛ, ɓì rì kaàtà à Kiris, ànɛ à kànɛ̀ngà, ɓi kìsay kis, àa rì fìwey, lɔŋ rì Ǹghay à Bɛ̀ll ànɛ à rì cem; kaàtà ànɛn, à kànɛ̀ngà ɓi ɓi ɓìɓoŋ ɓi gɔ̀g, à kànɛ̀ngà lɔŋ ɓi ɓìɓoŋ ɓi mɛmùù, yɛɛ lɔ̀ɔ̀ lɛ ɓi mɛ̀rem min.

⁴ Fɔlɔɔ nnɛ ǹtyweeyi wu tì rì rì wɔ yɛ̀ɛ Bɛ̀ll lɛ Kiris wu ri.

⁵ Ki yin lɛ ɓìsiìɓɔmiɗ tì rì rì ìtèɗ wu kìyɛn com kidɛŋ ki kɛɛ ɓa lɔŋ lɛ ɓìsi yɛɛ kiì, ìtèɗ wis wu ti wu ɓalàg yì lɔŋ yɛ̀ɛ Bɛ̀ll.

⁶ Lɛ nyimiɗ yɛɛ faghà ɓìsi ìtèɗ wulɛ ti ɓa ɓɛ̀kìì-ɓìsay ɓɛ ɓi nyɔnnyɔn à bee, ànɛ à sasaghii ɓi ɓi ɓìdɔ̀gsɛna ɓi ɓi ri ɓìkànɛn, à sasaghii lɔŋ ɓi Ǹghay ɓisuulɛ ɓìdɔ̀gsɛna ɓi ɓi ri ɓì kànɛn ɓi ti ɓi weeyì mum, kìɓan kifog Ǹghay à falàg cɛɓ.

⁷ I ɓìdɔ̀gsɛna ɓi ɓi ti ɓi weeyì ɓi kanɛ̀ngà rì ɓìkàŋga, ɓi ɓìɓoŋ ɓi gɔ̀g, kìtɛɛtɛn ki rikem ɗi Bɛ̀ll ki resɛ̀n ɗì ìtèɗ lèg ànɛ lɛ ɓɔn ɓɛ Isirayɛl ɓɛ ɓaghà ɓi lɛ ɓɛ fifìɓì ìsu wu Moyis lɛ fyɛɛyi ɓisuulɛ rìkem ɗi Bɛ̀ll ɗi lomlòmgà nyi ɓi-su, ki soo ɓaghà lɛ rìlònlòm ɗiǹ ɗi ghɛɛ̀sɛ̀ngà kìfinɛɛ gàɓ, ɗi ki ɓuɓi.

⁸ Kìsay ki Ǹghay ki ri ɓiì ɓaà rì rìkem ɗi ɗi ri ɓiì tèghɛɛ ɗi cee fɔlɔɔ.

⁹ I kìsay ki ki syoŋsyòŋgày ɓum ǹcɛ̀m ɓi nyoo ki ɓaghà ɗì rìkem, ki ki ghɛɛ̀sɛɛ kì kìi lɛ ɓum ɓɛɛ ɓa lɛ saaɗ ɓi mis mɛ Bɛ̀ll ki ri ɓiì ɓaà rì rìkem ɗi ɗi cee ɗiǹ.

¹⁰ I ɓɛ feègh lɛ rì rìkem ɗi abɛ̀y rì ɗi ɓigomìnɛ, ki ghɛnɛ̀n lɛ, com ki ki ɓaghà ɗì rìkem abɛ̀y ki ɓaghà gì ɓi ri rìkem, lɛ rìkem ɗi ɓigomìnɛ ɗi ɓuɓsii ɗiǹ ìsuùcèm.

¹¹ Lɛ i com ki ki ghɛɛ̀sɛ̀ngà kì ɓaà ɓi maa cààmɛ̀n ki ɓaghà ɗì rìkem, bɔ̀ɓ yaŋ min innɛ com ki ki kɔkɔrii fìɗyàɓ fikɔ̀ɔ̀ ki ri ɓiì ɓaà rì rìkem?

¹² Yɛ̀ɛ tì rì rì rìkuu ɗi dyàɓɛn ɗiǹ ɓi nɗem nnɛ ti rì rì coo ntyweeyi.

¹³ Ɓìsii yin ɓiì kìkii yɛ̀ɛ Moyis àa nkìlàg lɛ, i à teri kìlàà, à lɔg ɓi-su lɛ ɓɔn ɓɛ Isirayɛl ɓɛ̀ kɛɛ̀ ghɛn yɛ̀ɛ kìtɛɛtɛn ki ki ɓaghà nyi ɓi-su ɓi maa cààmɛ̀n ki ghɛɛ̀sɛ̀ngà kì ɗimii.

¹⁴ Kìɓan kifog ɗyomzɛ̀n ɗyaa ɗi duŋɛ̀ngà; fɔɔnnɛ à kpaŋ gɛɛ̀nɛ, nsoò ɓaa ɓàɓày Fìɗyàɓ fi bee ɓi kaàtà à Bɛ̀ll, kìlàà ki Moyis à ghekà kiǹ, kɔ lɔŋ wɔɔ, ki yin lɛ ki pɛsɛ̀n, lɛ ɓi Kiris nnɛ ki ti ki pɛsàg.

¹⁵ A kpaŋ ɓi ŋwos a gɛɛ̀nɛ, cààmɛ̀n kìcèm ki ɓɛɛ̀ ɓàɓay ɓɛ̀kaàtà ɓɛ Moyis ki ɓa lɔŋ yɛ̀ɛ kìlàà kiɗɛŋ ki ri ɓɔ kì lɔghɛn ɓi mɛ̀rem.

¹⁶ Wɔ̀lɛ i mum à lɔ̀ɔ̀ghrɛɛ yì yɛ̀ɛ Kan, kìlàà kiǹ ki pɛsɛ̀n.

¹⁷ Kɔm̀ lɛ Kan à rì Ǹghay; ni jàŋ inɛ Ǹghay à Kan à rì yɛɛ̀nɛ ɓum ɓɛ ti ɓɛ ɓalàg ɓɛ̀kan wɔ̀ɔ̀.

¹⁸ Ɓìsi ɓɛ̀sɛ̀ɛ̀ ɓɛ̀cèm ɓɛ mɛ̀su mis mɛ yin mɛ lɔghɛn ɗi kìlàà, rìkem ɗi Kan ɗyɛɛ̀ lònlom ɓi ɓìsi, yɛ̀ɛ ɓi ŋwii tì koɓsɛ̀n ɓi mis lɛ ti ɓa ɓi kìpisɛn kii, rì coo rikem ɗi ɗyɛɛ̀ ɓɔɓɔg mɓɔɓɔghɛn lɛ kìsay ki Kan ànɛ lɛ Ǹghay a kìkì.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan