2 KƆ̀RƐ̀ŊTYƐŊ 2 - Bafia Nouveau Testament

¹ Fɔlɔɔ nnɛ mɛ̀ɛ nghɛɛ ɓi nɗem wɛ̀m lɛ, kɛ̀ɛ nsugtiì a lɔ̀ŋkin lɛ mɓeɓsi tì ɓum mɛ̀rem.

² Lɛ i mɛ̀ɛ nfafa mini bim ɓi mɛ̀rem ghɛn yɛɛ ri lɛ à puɓsì mɛ̀ ǹɗem, i ki yin lɛ roànɛ mɛ̀ɛ mɓeɓsii ǹɗem?

³ I ǹkàngày mìni yɛ̀ɛ ǹkàngày lɔɔ, ǹkìghà fɔlɔɔ lɛ, ǹkɔ̀ngà ɓi lɛ i n-yùu a lɔ̀ŋkin, mìniìɓɔmiɗ ɓɛ ɓì ghɛ̀ɛ̀sɛɛ lɛ ɓì puɓsì mɛ̀ ǹɗem, mìni yɛɛ fatì mɛ̀ ǹɗemi-kɛŋɛn. Ǹɗì rì ntyweeyi ri mìni ɓɛ̀sɛ̀ɛ̀ ɓɛ̀cèm lɛ, kìnyàà kɛm̀ ki ri kìnyàà kin ki mini ɓɛ̀sɛ̀ɛ̀ ɓɛ̀cèm.

⁴ Ǹkàngày mìni rì coo ǹɗemi-kɛŋɛn lɛɛ̀gwey, rì misì ɓi mɛ̀tam; m̀ɓaghà ɓi ri rìyitì ɗi lɛ m̀ɓeɓsi mìni mɛ̀rem, ǹkɔ̀nkɔ̀ngà lɛ di ɓyàa yii coo nkɔ̀nɛ̀n ànɛ ǹɗì rì nyi ɓi ɓɛg wìn.

⁵ I ŋwaàdɛŋ à ɓaghà lɛ à ɓeèɓèɓsì ɓum mɛ̀rem, àa mɛ̀ nnɛ à ɓeɓsìghà nɗem, lɔŋ mìni ɓɛ̀sɛ̀ɛ̀ ɓɛ̀cèm, nsoò lɛ gàɓ ìdɛŋ ìnɛ ɓi mìni di ǹkɔ̀ni ɓi lɛ nciɓtag rìkpaa.

⁶ Ɓi rìkuu ɗi mum yɛ̀ɛ diǹ, lèg ànɛ kìgwey ki ɓum ki ɓi mìni ki nfwààdɛɛ nyi à ghɛ̀ɛ̀sɛɛ.

⁷ Fɔlɔɔ nnɛ ɓì ghɛ̀ɛ̀sɛɛ gì nyi kì cenɛɛ, ɓì cààsì kɔm̀ gì nyi nyoo, lɛ kɛ̀ɛ ɓa lɛ à wog rìkuu ɗi bim ɗi ɗi cee.

⁸ Fɔɔnnɛ ǹtɔɔgh mìni lɛ, ɓi resi nɗem wu nkɔ̀nɛ̀n lɛɛ̀gwey ɓi ɓɛg wìì.

⁹ Mɛ̀ɛ nkàniì girig mìni lɛ nfeèghrɛn mìni nghɛǹ nkòo ɓì rì rì mɛ̀wog ɓi ɓìɓan ɓìcèm.

¹⁰ I ɓì cenɛɛ ŋwaànɛ à sɛ̀rii kìɓan, mɛ̀ ǹcenɛ̀n girig nyi; lɛ kìɓan ki mɛ̀ɛ ncenɛɛ, i mɛ̀ɛ nghɛ̀ɛ̀sɛɛ lɛ ǹcenɛ̀n kìɓan kidɛŋ, mɛ̀ɛ nkìi fɔlɔɔ ɓisu win ɓi mis mɛ Kiris,

¹¹ lɛ di tyɛ̀ ki càɗ Satàn lɛ a ghɛn ɓìsi bee ɓi nyòò; lɛ tì nàni ɓi rikɔ̀n ɗii.

¹² Yɛ̀ɛ ǹkpagà a Tirowas lɛ nghagsi Syeesyee à Ɓɔlɛ à Kiris wɔɔ, ki soo ɓaghà lɛ Kan à nɛmgà mɛ̀ bee lɛ syeesyee lɛ nki kìsay kiǹ wɔɔ.

¹³ Ǹɗem wɛ̀m wu ɓaghà ɓi ɓi ɗùm lɛ fyòoog lɛ ǹtanɛ̀ngà ɓi Tit à maaseŋi wɛ̀m wɔɔ. Fɔlɔɔ nnɛ ǹghesɛ̀ngà ɓumɓɛ a Tirowas ǹkɛ̀n a Masedwan.

Kìsay ki Bɛ̀ll ɓi nyɔɔnyɔn à bee

¹⁴ Rìkem ɗyɛɛ ɓa rì Bɛ̀ll ànɛ à ti à kɛ̀ɛ̀sàg ɓìsi cààmɛ̀n kìcèm ɓi rìcee, lɛ Kiris, à ki fa ɓisi kìsay ki sàasaàtìyɛ̀n kìnùbe ki ɓi rìyi ɗi ɓɛ ghɛɛ̀sɛɛ Nyi kì yiì.

¹⁵ Lɛ tì rì fɛlɛ yɛ̀ɛ tìrààre ti Kiris ɓisuu Bɛ̀ll, lɛ rì ɓi nyìinyìm à ɓumɓɛ ɓɛ ri ɓi bee ì cɛɓ rì à ɓɛ̀roɓɛ ɓɛ ri ɓi rìɗyaŋ.

¹⁶ Ɓi ɓɛ̀ro ɓɛdɛŋ, kìnùbe kìn ki ri kìnùbe ki riwù, ki ki ti ki syogìì rìwu; ɓi ɓɛ̀ro ɓɛmbog, ki ɓa kìnùbe ki cɛɓ, ki kɛɛ̀ fafa cɛɓ. Ghɛn yɛɛ ri min ɗi ìtèɗ wu kìyɛn rikuu ɗi kisay yɛ̀ɛ ɗiǹ?

¹⁷ Lɛ ɓìsii yin yɛ̀ɛ kìgwey ki ɓum ki ki ti ki kilàg fyèè ri jɛ̀ɛ̀ ì Bɛ̀ll; kìɓan kifog, rì nɗem wu saaɗ, ɓi ɗii ɗi Bɛ̀ll ìnnɛ ɓìsiì kakali yɔ̀ yɛ̀ɛ ɓɛ̀kìì-ɓìsay ɓɛ Kiris ɓi mis mɛ Bɛ̀ll.