Bìoball air-loidhne

2 KƆ̀RƐ̀ŊTYƐŊ 13 - Bafia Nouveau Testament

Pol à rɔ̀gsɛn ɓɔ ɓi gɛ̀n i siitòn, à ki rom ɓɔ ɓìtɔkì

¹ Gɛ̀n i kìraa ìnɛ n-yu a lɔ̀ŋkin yɛ̀ɛ ri lɛ; paàzì bimiɗ, à rì ɓiì pègsɛɛ di ɓɛ̀wusìnɛ̀ɗ ɓɛɓɛɛ̀ nsoò lɛ ɓɛraa, ɓɛ mɛ kpaa.

² Yɛ̀ɛ m̀ɓaghà a lɔ̀ŋkin ɓi gɛ̀n i kìɓɛ̀ɛ̀, ǹka kpaaghà mìni, ǹki ɓììtii lɔŋ kikpaa ɓumɓɛ ɓɛ nkìkii kìɓe abɛ̀y, rì ɓum ɓɛmbog ɓɛ̀cèm, ɓi cààmɛ̀n ki ǹkakay fìràɓ lɛ, i ǹsugtii yì foo, màa càɗ ɓi mum.

³ Lɛ ɓi kaakaa lɛ ɓi ghɛn com ki ki resii lɛ Kiris a tòtog ri mɛ̀, Kiris à yin kɔ̀kɔg ɓi ɓɛg ànɛ a lɔ̀ŋkin, à ti à rèsàg lɔŋ itèɗ wii ɓi nyìinyìm wìn,

⁴ ɓisuulɛ ɓɛ kpangà nyi ɓi Kɔrɔs aɗyoo, lɛ rìɓa ɗii ɗi à rì kɛ̀ɛ̀ ìtèɗ, kìɓan kifog à rì cem lɛ ìtèɗ wu Bɛ̀ll; ɓi rìɓa ɗis ɗi tì rì ɓɛ̀ràrɛn ɗi nyi, tì rì girig kɛ̀ɛ ìtèɗ, wɔ̀lɛ tì ɓii ghɛɓì ǹɗaŋ ri nyi ɓisu win lɛ ìtèɗ wu Bɛ̀ll.

⁵ Fiɓɓɛɛna mìniìɓɔmiɗ ɓi ghɛn nkòo ɓì rì ɓi rìgherɛ̀n ɓiɗùm. Ɓì gherɛɛ ɓi nya lɛ Yeesus Kiris à rì ɓi mìni? Fèèghrɛɛna mìniìɓɔmiɗ. Di yɛ̀ɛ ɓaà yi ɓi nya, ɓi yin ɗi ìtèɗ wu ɓi resi lɛ ɓì rì ɓɛ̀gherɛ̀n.

⁶ Kìɓan kifog ǹɗì rì dyàɓɛn lɛ, ɓì ɓiì gherɛɛ lɛ ki yaagh ɓi ɓisi rì rèsì lɛ tì rì ɓɛ̀gherɛ̀n mɛ ɓigtii ɓi ɓisi.

⁷ Nsoò fɔlɔɔ, ɓìsiì ɓɔ̀ɔɓɔ̀ŋzì Bɛ̀ll lɛ ɓi ɓa kɛ̀ ɓi kì kiɓan kidɛŋ ki ki ɓeɓtɛɛ, àa ɓà loo lɛ, di mɛ̀fèèghrɛn mɛɛ pisɛn yɛ̀ɛ mɛ ghaghii kìrɔɔ, wɔ̀lɛ ti ɓɔ̀ɔɓɔŋzàg lɛ di ɓyàa kìi ɓìɓan ɓi rɔɔtɛn, nsoò yɛ̀ɛ mɛ̀fèèghrɛn mɛ ǹkɛ̀ɛ̀ghii ɓi ɓi ɓɛg wìs.

⁸ Lɛ i tì yin ri ìtèɗ wu tì rì lɛ tì ɗùù miì rì saaɗ, ìtèɗ wu tì rì rì wɔ wu ri lɔŋ ɓisuu saaɗ àncèm ànɛn.

⁹ Tì ti tì nyààràg di tì rì kɛ̀ɛ̀ ìtèɗ, kɔm̀ lɛ mìnii ri rì ìtèɗ, nni com ki ɓìsiì tɔtɔg ɓi bɔ̀ŋzɛ̀n yis ki ri lɛ, ɓi konag kì ɓaà ɓɛ̀kɔɔ̀kɔɔ̀ ɓɛ ɓɛgherɛ̀n.

¹⁰ Kìɓan kiǹ kɛɛ̀ki ǹkàniì mìni fɔlɔɔ, di ǹkakay fìràɓ ɓisuulɛ, yɛ̀ɛ nkpaŋkpaŋ foo, kɛ̀ɛ mɓa ǹtiniyɛn lɛ ǹnyɛn ɗì mìni, ɓi rìlàmì ɗi Kan à faghà mɛ̀ lɛ, nki lɛ ɓi siìrɛn ɓi rìgherɛ̀n, àa lɛ n-yogsi rìgherɛ̀n ɗin.

¹¹ Ǹsiitɛɛ mìni kìkpaa lɛ: ɓɔɔsoŋ̀ ghɛɓina ɓi kìnyàà, ɓì kaakàà lɛ rìɓa ɗi ɓì rì ɓɛ̀gherɛ̀n ɗyɛɛ konag kìɓaà lɛ Syeesyee, faafàlɛɛna mìniìɓɔmiɗ itèɗ ɓi mɛ̀rem, ɓì woòwòòghrɛ̀n jɛ̀ɛ̀, ɓì ghɛghɛ̀ɓ ɓi fyòoog, fɔlɔɔ nnɛ Bɛ̀ll à ǹkɔ̀nɛ̀n, rì Bɛ̀ll à fyòoog à rì ɓiì ɓaà nɗaŋ ri mìni.

¹² Tòotògsɛɛna mìni rì mìni di ɓi lɔ̀ɔlɔrɛ̀n yɛ̀ɛ ɓɛ̀gherɛ̀n. Ɓɛ̀gherɛ̀n ɓɛ̀cèm ɓɛ tɔkii yì mìni.

¹³ Geesɛ̀n ì Kan Yeesus Kiris, rì ǹkɔ̀nɛ̀n à Bɛ̀ll, rì rìɓùtɛ̀n ɗi Kitɛntɛ̀ɛ̀n ki Nghay, ɓyɛɛ ɓa rì mìni ɓɛ̀sɛ̀ɛ̀ ɓɛ̀cèm.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan