2 KƆ̀RƐ̀ŊTYƐŊ 12 - Bafia Nouveau Testament

Ɓìɓan ɓi Kan à rèsìghà Pol rì mis, rì ɓi à faghà nyi ìtèɗ wulɛ a yi

¹ Ki ghɛɛ̀sɛɛ nya lɛ mum a kalɛn? Ki ghɛɓsii ɓi com nsoò lɛsag. Nsoò fɔlɔɔ m̀ɓiì kpaŋì ɓi jàŋ inɛ mɓuŋ ɓìɓan ɓi Kan à rèsìghà mɛ̀, rì ɓi à kìghà lɛ n-yi.

² Ǹ-yii kìristɛ̀n àdɛŋ ànɛ à ɓɔkà aɗyoo, à kpaŋ ɓi ɗyoo ɗi kiraa, ki ti gɛɛ̀nɛ bèg ǹtɛ̀ɗ ɗì yinin, wɔ̀lɛ com ki ǹ-yii ɓi ki ri lɛ: ǹ-yii ɓi nkòo à ɓɔkà rì nyoo yìì bimiɗ, nkòo ki lɛ ǹghay wii wɔ yɛɛ ɓɔkà, lɔŋ Bɛ̀ll yɛ̀ɛ yii.

³ Ǹki yii lɛ nkòo ŋwaànɛ̀n à ɓaghà fɔlɔɔ ri nyoo yìì gi yɔ̀, nkòo à ɓaghà kɛ̀ɛ̀ yɔ̀, Bɛ̀ll yɛ̀ɛ yii, mɛ̀ ǹ-yii ɓi.

⁴ Ŋwaànɛ̀n à ɓɔkà à kpaŋ a pàràɗis, à wog jɛ̀ɛ̀ yidɛŋ yi mum à yin lɛ à yi rìɓììtì, yi ɓɛ ki yin lɛ ɓɛ gherɛ̀n lɛ mum a kpaà.

⁵ Màa rì lɛ ǹkaàkàlɛ̀n lɛ ǹɗì rìkuu ɗi mum ɗìn, kìɓan kifog ǹ-yin lɛ ǹkalɛ̀n ɓisu wɛ̀m mɛ̀ɛmiɗ, di ki ri nya ɓi ɗi lɛ, nkpaa ɓìɓan ɓi ɓi resii lɛ ǹɗì kɛ̀ɛ̀ ìtèɗ.

⁶ I màa kɔ̀ni lɛ nkaàkàlɛ̀n, di ǹ-yin lɛ mum à ghɛn mɛ̀ yɛ̀ɛ kìyèg ɓisuulɛ ɓìɓan ɓi ǹɗì lɛ ǹkpaa, ɓi ri ɓìɓan ɓi saaɗ. Wɔ̀lɛ ǹti m̀ɓèngì rìkaàkàlɛ̀n ɓisuulɛ ŋwaàdɛŋ kɛ̀ɛ ɓa lɛ a foŋ mɛ̀ ɓi nɗɛli wu wu cee ǹdɛli wu wu ghɛɛ̀sɛɛ rì ɓìɓan ɓi à ti à ghɛngì mɛ̀ di nkìkì, rì ɓi à ti à wokì mɛ̀ di nkpaakpàà.

⁷ Ɓisuulɛ ɓìɓan ɓi Kan à rèsìghà mɛ̀ ɓi ri ɓɛ̀geni ɓiɓan ɓɛ kuukuùghràkɛ̀n. Rì ɓi ɗi lɛ, ɓìɓan ɓiǹ ɓyɛ̀ kɛɛ̀ san mɛ, nnɛ ɓɛ fogà mɛ̀ zɔrì ìdɛŋ ɓi nyoo, ì rì yɛ̀ɛ ŋwaà-fìtom a Satàn, ànɛ à ghɛ̀ɛ̀sɛɛ mɛ̀ kì ɓooɓokì mɛ̀ɓɛn, lɛ di a reg mɛ̀ rìkì ɗi ɓidaŋà.

⁸ Gɛ̀n yiraa nnɛ m̀ɓɔ̀ŋzàkà Kan lɛ a pisi mɛ̀ zɔrì ìnɛn,

⁹ à ki ɓàg mɛ lɛ: Geesɛ̀n yɛ̀m ì ghɛɛ̀sɛɛ rì wɔ̀ ɓisuulɛ ìtèɗ wɛm̀ wu ti wu resàg lɛ tɛntɛ̀ɛ̀n jàŋ inɛ mum à rì kɛ̀ɛ̀ ìtèɗ. Fɔɔnnɛ ǹɗì ɓiì ɓiisɛɛ min ki woògh kìrɔɔ lɛ nkaakàlɛ̀n rìɓa ɗyɛ̀m ɗi kɛ̀ɛ̀ ìtèɗ lɛ di ìtèɗ wu Kiris wɛɛ saàgh ɓi mɛ̀.

¹⁰ Kìɓan kiǹ kɛɛ̀ki ǹti ǹwokì kìrɔɔ ɓi rìɓa ɗyɛ̀m ɗi kɛ̀ɛ̀ ìtèɗ, rì tìsɛm ti ɓɛ ti ɓɛ sɛmgàg mɛ̀, rì ɓɛ̀ǹkàŋɗɛ̀n ɓɛ ɓɛ ti ɓɛ kagì mɛ̀, rì ǹ-yeesɛ̀n ànɛ ɓɛ ti ɓɛ yeesàg mɛ̀, rì ɓìɓan ɓi iris ɓi ǹti ǹtulàg rì ɓyɔ ɓisuu Kiris, ɓisuulɛ cààmɛ̀n ki ǹɗì kɛ̀ɛ̀ ìtèɗ, kɛɛ̀ki ǹki tèèsɛɛ miǹ.

Pol à yin ɓiì fɔmfɔmi kirɔɔ kii ki nyimiɗ a Ɓɛ̀kɔ̀rɛ̀ŋtyɛŋ

¹¹ Mɛ̀ mmɛ ghay kiyèg, kìɓan kifog, mìni yɛɛ tinìghà mɛ̀ lɛ nghay kìyèg, lɛ mìni yɛɛ ghɛɛ̀sɛ̀ngà lɛ ɓì sɛg ɓum mɛ̀. Lɛ nsoò yɛ̀ɛ ǹ-yin bimiɗ à mum, ǹ-yii ɓi lɛ ɓumɓɛ ɓɛɛ̀ kpaakpaa lɛ ɓɔ yɛɛ ri ɓyoo ɓɛkɛ̀nì-fìtom ɓɛ Yeesus ɓɛ cee mɛ̀ ɓi com kidɛŋ.

¹² Ɓìɓan ɓi ɓyɛɛ̀ rèresi lɛ ǹɗì ǹkɛ̀nì-fìtom a Yeesus ɓi ghɛnɛ̀ngà ɓi nyìinyìm wìn ɓi rìyi ɗi rinìɗ ɗi nɗem ɓi mɛ̀kuu mɛ mɛfèèghrɛn mɛcèm, rì ɓi ɓìrèmzɛnà ɓi ɓiɓan, rì dàm yi ɓiɓan, rì ɓɛ̀koŋnyoo ɓɛ ɓiɓan.

¹³ Kìɓan aɗi kɛɛ rɔɓkà kɛ̀ kɛɛ̀ kìlɛn a lɔ̀ŋkin lèg ànɛ yɛ̀ɛ kɛɛ̀ kìikilɛ̀n ɓi ɓìseŋi ɓi Kiris ɓimbog? I ki cee ɓi nya lɛ kìɓan ki lɛ ǹtɛ̀g wɛm̀ wu syɔngà ɓi mìni ɓi nto! Nni mìnii cenɛɛna mɛ̀ rìkì ɗiǹ lɛ ɗi ri zɛ̀ɗ.

¹⁴ Ɓì ghɛɛ! Ǹti jàŋbog lɛ n-yutiì foo a lɔ̀ŋkin ɓi gɛ̀n i kìraa, nni ǹtɛ̀g wɛm waa ki syɔn ɓi mini ɓi nto, ɓisuulɛ àa ìkum win wɛɛ̀wu nfɔmfɔ̀m, lɔŋ mìniìɓɔmiɗ ɓɛɛ̀ɓɛ nkɔ̀nkɔ̀n; lɛ àa ɓɔn ɓɛɛ ghɛɛ̀sɛɛ kì taŋzɛɛ ikum ɓisuu ɓɛyalì ɓaa, lɔŋ ɓɛ̀yalì ɓɛɛ ghɛɛ̀sɛɛ kì taŋzɛɛ ikum ɓisuu ɓɔn ɓaa.

¹⁵ Ɓi san wɛ̀m, ǹɗì lɛ ǹwog kìrɔɔ lɛ nkpaŋzi mɔ̀ɔ̀ni mɛ̀cèm mɛ ǹɗì rì mɔ, ǹki kàɓɓɛn mɛ̀ɛmiɗ ɓisuu ɓyɛɓ ɓin; nni i mɛ̀ ǹkeesii mìni fɔlɔɔ ǹcìɓtàg, ɓisuucɛ nnɛ mìnii keesì mɛ̀ lɛsàg?

¹⁶ Ɓì rì min lɛ ɓì gherɛ̀n lɛ ǹtɛ̀g wɛm̀ wu ɓaghà ɓi mini ɓi nto, kìɓan kifog ŋwaàdɛŋ à rì lɛ à fèg lɛ ǹɗì ghèghey nni m̀ɓɔ̀gà mìni ɓi mɛ̀ghèy.

¹⁷ M̀ɓaghà nya lɛ ǹɗiɗì mìni ɓyom ɓi gòò ì kìbog ki ɓi ɓumɓɛ ǹɗomgày mìni?

¹⁸ M̀ɓɔ̀ŋzàkà Tit lɛ a yu a lɔ̀ŋkin ǹki rom nyi rì maaseŋi wìs anɛ ɓi rìgherɛ̀n; nni Tit yɛɛ ɓaghà lɛ à yègsì mìni lɛ a ɗiɗi mìni ɓyom? Mɛ̀ɛ nfèki lɛ ɓìsiìcèm tì ɗyenɗyèngà lɔŋ ikòò wu fog, tì ki nɔ̀ɔnɔɔ̀tì bee bog.

¹⁹ Kaa finɛn yɛ̀ɛ ɓyaà fèfèg lɛ ɓìsiì kpaakpaàsɛ̀n ɓi mis min. Lɔŋ ɓi mis mɛ Bɛ̀ll, ɓi Kiris ɓiɗùm innɛ ti tòtòg, nni ɓìɓan ɓiǹ ɓìcèm ɓi ri ɓisuu kitɔɔ kiǹ ki ɓi Ǹghay, mìni ɓɔɔseŋi ɓɛ̀m ɓɛ nɗem.

²⁰ Ɓisuulɛ ǹɗì rì mɛ̀riighrikì lɛ yɛ̀ɛ nkpaŋkpaŋ foo, kɛ̀ɛ mɓa lɛ, ǹtanɛ̀n mìni di ɓì yin ɓi nɗɛli wu nkɔ̀nkɔn lɛ ɓi ɓa miì. Nsoò lɛ mìni girig ɓì ghɛn mɛ̀ ɓi rìɓa ɗi ɗyɛ̀ kɛɛ̀ rɔɔ mini; fɔɔnnɛ nɗirisi lɛ: kɛ̀ ɓi ɓa ɓi ɓɛ̀paàzì, rì yɔ̀ɔ̀tì, rì kìnyɛn, rì tìkaŋ ti mɛkɔ̀ɔ̀, rì mɛ̀wɔ̀wɔrì, rì ɓɛ̀ɓɔlɛ, rì kalɛn, rì kìɓùùsì.

²¹ Ǹɗì rì mɛ̀riighrikì lɛ yɛ̀ɛ n-yùyuy foo, Bɛ̀ll wɛ̀m kɛ̀ɛ ɓa lɛ à rììsì mɛ̀ nto ɓi kìɓan kin, ǹki ghay lɛ ǹɗèn ɓisuu kigwey ki ɓum ki ki nka kìi kìɓe, ki rɔɓ kɛ̀ kɛɛ̀ lɔ̀ɔ̀ghrɛn mɛrem lɛ kɛɛ rini ɓìɓan ɓi tifin, rì tìsɔ̀mɔ̀g, rì cɛɓ ki sààsaa, ɓi ɓɛ nkìkii.