2 KƆ̀RƐ̀ŊTYƐŊ 11 - Bafia Nouveau Testament

Pol rì ɓumɓɛ ɓɛɛ̀ pwààpwaa lɛ ɓɛ ri ɓɛ̀kɛ̀nì-fìtom ɓɛ Yeesus

¹ Eɗ, i ɓyàa rì lɛ ɓì cenɛ̀n lɛ nghas̀ kìyèg lɛsàg! kìɓan kifog, ɓì rì mɛ̀ ɓiì cenɛɛ!

² Ɓisuulɛ, ǹɗì rì yɔ̀ɔ̀tì ɓi san wìn, yɔ̀ɔ̀tì ànɛn à rìì yɛ̀ɛ Bɛ̀ll rì kìsyɔ̀ɔ̀ lɛ, ɓì rì fɛlɛ yɛ̀ɛ gɔ̀n ì giɓ ìnɛ ì ka yiɓi ɓɛbaŋì, ì ki ɓa ntɛnɛn, ìnɛ ì kàkà lɛ ì ɓiì wɔlì m̀bobog à yii lɛ Kiris.

³ Nsoò fɔlɔɔ, ǹɗì rì mɛ̀riighrikì lɛ, fɛlɛ yɛ̀ɛ nyoo ì yègsìghà Ɛɛvɛ rì ɗyomzɛ̀n ɗi ì ɓaghày rì ɗyɔ, mɛ̀yitì min mɛ̀ kɛɛ̀ ɓa lɛ mɛ ɓuùsɛ̀n ɓi lèg ànɛ lɛ ɓi rini lɛ rì rìsɛɛ̀dì ɗi mìniìɓɔmiɗ ɓi zi, rì rìtɛn, lɛ ɓyɛɛ̀ɓi ɓì ghɛ̀ɛ̀sɛɛ kì ɓaà rì ɓyɔ, ɓi ɓɛg ànɛ yɛ̀ɛ Kiris.

⁴ Ɓisuulɛ ki yeesii ɓi mini lɛ ŋwaàdɛŋ a yu mìni kì kalii kiɓan ki Yeesus àdɛŋ, ànɛ à yin anɛ ɓìsii kalìghà mìni, nsoò lɛ ɓi teɗ Ǹghay àdɛŋ ànɛ à yin Ǹghay ànɛ ɓì ɓaghà di ɓì mɛ teɗ, nsoò lɛ Syeesyee à Ɓɔlɛ àdɛŋ ànɛ à yin anɛ ɓì tekà.

⁵ Mɛ̀ɛ nfèfeg lɛ ɓum ɓin ɓɛ ɓi seesee lɛ ɓɔ yɛɛ ri ɓyoo ɓɛkɛ̀nì-fìtom ɓɛ cee ɓi mɛ ɓi com kidɛŋ nsoò lɛsàg.

⁶ Nsoò yɛ̀ɛ m̀ɓiisɛɛ ɓi ki yiì kìtòkì, ǹ-yin zɛ̀zɛɗ ɓi kìɓan ki ki seesee rìyi. Tì mɛ rèsi mini kìɓan kiǹ bee lɛ bee ɓyààmɛ̀n lɛɛ̀gwey.

⁷ Gìn mɛ̀ yɛɛ sɛrìghà nya yɛ̀ɛ ǹsɛɛ̀dɛ̀ngà mɛ̀ɛmiɗ ɓi zi lɛ mɓɔgsi mìni, cààmɛ̀n ki ǹghagsìghà mìni Syeesyee à Ɓɔlɛ à Bɛ̀ll zɛy rì zɛy, kɛ̀ ɓi kòòsɛn?

⁸ M̀pùmzìghà ɓìseŋi ɓi Kiris ɓidɛŋ, yɛ̀ɛ mɛ̀ɛ ntekii mɛ̀lèɓ a lɔ̀ŋkaa di nkìki kisay foo a lɔ̀ŋkin;

⁹ nni nsoò yɛ̀ɛ kìsoghà ki ɓangà mɛ̀ cààmɛ̀n ki m̀ɓaghà foo a lɔ̀ŋkin, ǹtɛ̀g wɛm̀ wu syɔngà ɓi wààdɛŋ ɓi nto. Ɓisuulɛ ɓɔɔseŋi ɓis ɓɛ ɓi rìgherɛ̀n ɓɛ ɓɛ pɛsɛ̀ngày a Masedwan, ɓɛ faghà mɛ̀ com kìcèm ki ki kaarɛ̀ngà mɛ̀; ǹlɛkà bee bimiɗ lɛ kɛ̀ɛ mɓa ntɛ̀g wu wɛɛ yɔŋi mìni ɓi nyoo, fɔɔnnɛ ǹɗì ɓiì ki lɛlɛɛgh kiɓan kiǹ.

¹⁰ Lɛ saaɗ à Kiris ànɛ à rì ɓi mɛ̀, ǹkalii jɛ̀ɛ̀ aɗyoo lɛ, ɓi ɓìlànà ɓi zi ɓi a Akayi, mum à yin lɛ à règ mɛ̀ rìsaàsànɛ̀n ɓi kìɓan kin.

¹¹ Ɓisuucɛ nnɛ ǹkpaa fɔlɔɔ? Lɛ yɛ̀ɛ ǹkeesii ɓi mini? Bɛ̀ll yɛɛ yii!

¹² Ǹɗì ɓiì kɛ̀nkɛni asu ɗì rìkìkì ɗi nkìki ɗi, lɛ di m̀pisi ɓìɓan ɓìcèm ɓi ɓum ɓɛdɛŋ ɓɛ ri lɛ ɓɛ ɓanɛ̀n miì, lɛ ɓɛɛ̀ kaakalɛ̀n lɛ ɓɔɔ̀ kìki girig kìsay ki ɓìsiì kìkì. Ɓum ɓɛdɛŋ ɓɛɛ̀ kaakaa com ki ɓɛɛ ɓanɛn miì lɛ ɓɛɛ ki fɔlɔɔ.

¹³ Ɓumɓɛ̀n ɓɛ ri ɓumɓɛ ɓɛɛ̀ pwààpwaa lɛ ɓɛ ri ɓɛ̀kɛ̀nì-fìtom ɓɛ Yeesus ɓɔ ɓɛ̀kìì-ɓìsay ɓɛ ɓɛɛ̀ yèeghyegsì ɓum, ɓɛ reèghrèŋɗɛ̀n lɛ ɓɛ̀kɛ̀nì-fìtom ɓɛ Kiris.

¹⁴ Kìɓan kiǹ ki yin kiɓan ki kuurakɛn ɓisuulɛ Satàn nyimiɗ a rèsag fɛlɛ yɛ̀ɛ ŋwaà-fìtom a ǹlònlomɛn kitɛɛtɛn.

¹⁵ Fɔɔnnɛ ki yeesɛɛ ɓi lɛ ɓɛ̀kìì-ɓìsay ɓii girig ɓɛɛ resɛn ɓi mis mɛ ɓum lɛ ɓɛ ri ɓɛ̀kìì-ɓìsay ɓɛ roànɛ à rì lɛ saaɗ. Rìsyɔn ɗyaa ɗi ɓaa gɛ lɔŋ yɛ̀ɛ mɛ̀kìkìì maa mɛ ri.

Mɛ̀tɔɓ mɛ Pol ɓi kìsay kii ki lɛ ǹkɛ̀nì-fìtom a Yeesus

¹⁶ M̀ɓììtii kì kpaà lɛ: mum kɛ̀ɛ teɗ mɛ yɛ̀ɛ kìyèg, nkòo lɛ, ɓì ghɛɛ lɛ ǹɗì kìyèg, ghàɓina mɛ̀ ɓi sìg à kìyèg, di fɔɔnnɛ mɛ̀ɛ nki girig maa kalɛn lɛsàg.

¹⁷ Kìɓan ki nkpaakpaa ɓigomìnɛ, ki yin rikɔ̀n ɗi Kan, kìɓan kifog, ntòtog yɛ̀ɛ ŋwaànɛ à ɓùùsɛɛ, à ki yi syeesyee à rìyi lɛ, à rì rì kìɓan ki à rì lɛ à kaàkàlɛ̀n ɓi mis mɛ ɓum.

¹⁸ Lɛ yɛ̀ɛ kìgwey ki ɓum kɛɛ̀ kaakalɛ̀n ɓìɓan ɓi ɓi mɛ̀mùù, mɛ̀ ǹɗì girig ɓiì kalɛɛ mɛkuu mɛ ɓiɓan mɛǹ.

¹⁹ Mìni ɓɛ ɓì rì ɓum ɓɛ ɗyomzɛ̀n, ɓì ti ɓì cenàg lɛ ɓi kɔri rì ɓumɓɛ ɓɛ ri ɓìyèg, kɛ̀ kɛɛ̀ yeesi mini.

²⁰ Ɓisuulɛ ɓì ti ɓì cenàg lɛ ɓɛɛ ghaàsi mìni ɓɛ̀kpàn, ɓɛ ɗiɗì mìni, ɓɛ puùpùmzì mìni, ɓɛ nyuùnyùŋzàg mìni, ɓɛ ki ŋɔ̀ɔŋɔgtàg mìni ɓi-su.

²¹ Nkpaaghi lɛ, kìɓan kiǹ ki ri ɓìsi ǹtoòrìɗ; ki pisɛɛ yɛ̀ɛ tìi nɗèsii lɛ tì rì rì ìkɔ̀g, ɓi rìcàrɛ̀n ɗiǹ, nsoò fɔlɔɔ, kìɓan kicèm ki mum à rì lɛ à ghɛɛsì kì kpaà, mɛ̀ girig ǹɗì lɛ ǹghɛɛsì kì kpaà kɔ; ntòtog yɛ̀ɛ ŋwaànɛ à rì kìyèg.

²² Ɓaa soo rì ɓɛ̀-Ebìreegh, mɛ̀ ǹɗì girig muu Ebìreegh; ɓaa soo rì ɓumɓɛ a Isirayɛl, mɛ̀ ǹɗì girig kìbog ki miì; ɓaa soo rì dòò yi Abiraham, mɛ̀ ǹɗì girig dòò yìì.

²³ I ɓɛ ri ɓɛ̀kìì-ɓìsay ɓɛ Kiris m̀ɓa kìyèg ki kɔɔ̀kɔɔ̀ lɛ mɛ̀ ǹɗì ǹkìì-kìsay a Kiris ǹcee ɓɔ, ɓi ɓìsay ɓi m̀mɛ kì, nni àa foo ri foo, ǹcee ɓɔ ɓi naà-zày yi m̀mɛ kɛ̀n, à kɛ̀n kì kpaŋì ɓi zàà yi ɓɛ mɛ kwiy mɛ, rì ɓi ɓɛ̀koŋnyoo ɓɛ riwù ɓɛ ǹti ǹghaaghràg miì ɓyààmɛ̀n lɛɛ̀gwey.

²⁴ Gɛ̀n yitaǹ innɛ Ɓɛ̀yudɛ̀n ɓɛ mɛ ɓog mɛ zàà ìnɛ, ɓɛ ɓog mum mɛ̀kpas rìtin ɗì ǹtɛ̀ɗ rì taànìn,

²⁵ ɓɛ ɓog mɛ̀ kìtòn gɛ̀n yiraa, ɓɛ rogì mɛ̀ gɔ̀g gɛ̀mbog, kìkɔm ki sigtɛ̀n mɛ̀ gɛ̀n yiraa; ǹghagsì bimiɗ à ŋwos rì bimiɗ à ìru ɓi mɛ̀nig;

²⁶ Mɛ̀ɛ nkɛ̀ɛ̀kɛɛ cààmɛ̀n kìcèm, rì mɛ̀kòò ǹtutùlɛ̀n rì ɓɛ̀koŋnyoo ɓɛ ɓi don yi ɓɛ rìɓày, rì ɓɛ̀koŋnyoo ɓɛ ɓɛ̀fàràfara, rì ɓɛ̀koŋnyoo ɓɛ ɓɛ riì mɛ̀ a ɓɛ̀geni ɓɛ̀m ɓɛ Ɓɛ̀yudɛ̀n, rì ɓɛ ɓɛ riì mɛ̀ a ɓumɓɛ ɓɛ yin Ɓɛ̀yudɛ̀n, rì ɓɛ̀koŋnyoo ɓɛ ɓi bàn, rì ɓɛ ɓireɓ, rì ɓɛ ɓi rìɓày à kìkòn; ǹtulɛ̀n rì ɓɛ̀koŋnyoo ɓi nyìinyìm à ɓumɓɛ ɓɛɛ̀ ɓɔ̀ŋɓɔŋ lɛ ɓɛ ri ɓɔɔseŋi ɓis ɓɛ righerɛ̀n.

²⁷ M̀mɛ kì ɓisay ɓi ɓi teèsɛɛ, ǹki tulɛn ɗi ɓìtèetèɗ ɓi mɛfèèghrɛn, m̀mɛ kì lɛ, ǹkɔ̀rì ɓɛ̀saalo, ǹwog com ki lɛ zày, rì ki lɛ kìnɔli, ɓyààmɛ̀n ɓidɛŋ mɓa ǹtiniyɛn lɛ ǹcèlì ɓìɗilàg, ǹki wog com ki lɛ kìfɛɓ, kìtòn zɛy à pyèn mɛ̀ mis.

²⁸ Kɛ̀ɛ nki ɓày ɓiɓan ɓimbog, fɛlɛ yɛ̀ɛ ǹtɛ̀g wu wu ri mɛ̀ ɓi nɗem ɓɛ̀ŋwos ɓɛ̀cèm, wɛɛ ri lɛ ǹɗem wɛ̀m wɛɛ̀ cɛɛcɛɛ̀rɛ̀n rì ɓìseŋi ɓi Kiris ɓìcèm.

²⁹ I ŋwaàdɛŋ à rì kɛ̀ɛ̀ ìtèɗ, ǹghɛnɛ̀n mɛ̀ɛmiɗ kɛ̀ɛ̀ ìtèɗ, i ŋwaàdɛŋ à kpìi ɓi kìɓe ɓiɗùm, kìɓan kiǹ ki fa mɛ̀ coo rikɛŋ lɛɛ̀gwey ɓi nɗem.

³⁰ I ki ri lɛ mum a saàsànɛ̀n, lɔŋ rìɓa ɗyɛ̀m ɗi ǹɗì kɛ̀ɛ̀ ìtèɗ, ɗyɛɛ̀ɗi ǹsanɛ̀n.

³¹ Bɛ̀ll ànɛ à rì Seŋi Kan Yeesus ànɛ à ki rì rì rìkem fiɗyàɓ fikɔ̀ɔ̀, à yii lɛ ǹ-yin ɓiì pwààpwaa.

³² Yɛ̀ɛ m̀ɓaghà a Damas, gɔmìnà ànɛ à sasàlà rìfòm ɗi lɛ Aretas, à rɛsàkà ɓɛ̀sujàà a mɛ̀suunaa mɛ gari i bàn lɛ ɓɛɛ ɓan mɛ̀.

³³ Kìɓan kifog, ɓɛ rɔŋzìghà mɛ̀ ɓi wonɗò à gari, ɓɛ ki sɛɛ̀di mɛ ɓɛg àmbog, ǹkàŋɛn ɓi kìkpoŋ, fɔɔnnɛ ǹghɛɓkà ŋwaànɛ̀n.