Bìoball air-loidhne

2 KƆ̀RƐ̀ŊTYƐŊ 1 - Bafia Nouveau Testament

Pol ɓɛ togsii ɓɔ

¹ Mɛ̀ Pol, ànɛ ǹɗì ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll, rì geni wìs Timote tì kàni lɛ rì Kìseŋi ki Bɛ̀ll ki ki ri a Kɔrɛŋt, rì ɓɛ̀gherɛ̀n ɓɛ̀cèm ɓɛ ɓɛ ri ɓi kìlànà ki zi ki lɛ Akayi kìcèm.

² Bɛ̀ll à Seŋi wìs ɓɛɛ̀ Kan Yeesus Kiris, ɓɛɛ fa mìni geesɛ̀n, rì fyòoog.

³ Rìkem ɗyɛɛ ɓa ri Bɛ̀ll à Seŋi Kan wìs Yeesus Kiris, Seŋi ànɛ à rì rì nyìighnyìg, Bɛ̀ll ànɛ a ki fɔɔfɔɔ̀sì ǹɗem cààmɛ̀n kìcèm.

⁴ Nyi yɛɛ ti à fɔɔsàg ɓìsi mɛ̀rem ɓi mɛ̀tɔɓ mis mɛcèm, lɛ di ɓìsi girig, ti ɓa rì ìtèɗ wu fɔɔsiyɛn mɛrem mɛ ɓumɓɛ ɓɛɛ̀ tuutulɛ̀n rì mɛ̀tɔɓ mɛ̀kuu mɛ̀kuu, tì kì kìɓan kiǹ ɗì ǹghɛɓsɛn wu wu ti wu ɓalàg yì ɓìsi yɛ̀ɛ Bɛ̀ll.

⁵ Ɓisuulɛ, fɛlɛ yɛ̀ɛ mɛ̀tɔɓ mɛ Kiris mɛ ti mɛ ghenàg a lɔ̀ŋkis lɛɛ̀gwey, fɔlɔɔ nnɛ rìfɔɔsì ɗi mɛrem mis ɗi ti ɗi ɓalàg girig lɛɛ̀gwey lɛ Kiris.

⁶ I ti wowog mɛtɔɓ, ki ri ɓisuulɛ mìnii ɓa rì ǹghɛɓsɛn ɓi mɛ̀rem, rì ɓisuu gòri yìn; i mɛ̀rem mis mɛ ri mɛ̀fɔɔsiyɛn, fɔlɔɔ a rì ɓisuu rifɔɔsì ɗi mɛrem min ɗi ɗyɛɛ̀ fafa mini ìtèɗ wulɛ ɓi cenɛn rìkuu ɗi mɛtɔɓ ɗi ɓìsiì wowòg, tì ki nìniɗ nɗem.

⁷ Fɔɔnnɛ dyàɓɛn inɛ tì rì rì yɔ̀ ɓi ɓɛg ànɛ a lɔ̀ŋkin, ì rì ǹtèèsɛn ɓisuulɛ, tì yii lɛ, yɛ̀ɛ ɓì ti ɓì tekì gàɓ ɓi mɛ̀tɔɓ mis, ɓì rì girig rì gàɓ ɓi rìfɔɔsì ɗi mɛrem mis.

Rìɓa ɗi lɛ rì Pol rì ɓumɓɛ a Kɔrɛŋt. Mɛ̀tɔɓ mɛ Pol à tulɛ̀ngà rì mɔ a Azii

⁸ Lɛ tì kɔ̀ni ɓi lɛ, ti caɗ mìni lɛ dùŋdùŋ, ɓɔɔsoŋ̀, ɓi kìɓan ki ki seesee ǹtɔɓ wu tìi ntanɛɛ rì wɔ a Azii. Tìi nghɛɛ ǹtɔɓ wu wu nɗìri ɓìsi ɓi nyoo lɛɛ̀gwey, wu cee gì ɓìsi ɓi-tèɗ, ɓi lèg ànɛ lɛ tìi n-yiìdi kɔm̀ rì ǹtyweeyi wulɛ tì rì ɓiì ɓatii ti ɓi cɛɓ.

⁹ Wɔ̀lɛ ɓìsiìɓɔmiɗ tì ɓaghà di tyàa gherɛn lɛ, ki ti kì renɛn lɛ ɓɛɛ wey ɓìsi; ki kilɛ̀ngà fɔlɔɔ lɛ, di ǹtyweeyi wis wɛ̀ kɛɛ̀ ɓa ɓi ɓìsiìɓɔmiɗ, wɛɛ ɓa lɔŋ yɛ̀ɛ Bɛ̀ll ànɛ a ghèmzag ɓilòŋ.

¹⁰ Bɛ̀ll ànɛn yɛɛ nghɛɓsii ɓìsi, Nnyɛɛ ki rì ɓìsi ɓiì kìi, lɛ tyɛ̀ ki wu rikuu ɗi riwù ɗìn. Ɛ̀ɛ̀ tì rì rì dyàɓɛn lɛ à rì tì ɓìsi ɓiì kòri.

¹¹ Lɛ mìniìɓɔmiɗ ɓì rì ɓìsi ɓiì lènlemi ɓi bɔ̀ŋzɛ̀n; fɔlɔɔ nnɛ geesɛ̀n ìnɛ ɓìsii ri ghɛn inɛ̀n lɛ bɔ̀ŋzɛ̀n ì ɓum kìtuu, ì ri ghay kiɓan ki ɓum lɛɛ̀gwey ɓɛ ri fa Bɛ̀ll ɓìtògsɛ̀n miì ɓisu wis.

¹² Lɛ kìɓan ki ɓìsii ri lɛ tì teɗ rìkem miì ki ri lɛ: ǹɗem wis wɛɛ̀ rèresi ɓisi lɛ tɛntɛ̀ɛ̀n lɛ: rìkɛ̀ɛ̀kɛ̀ɛ̀ ɗis ɗi ɓi ziinɛ, à ɓiisɛ̀n ɓi ɓɛg ànɛ a lɔ̀ŋkin, ɗi ri ɗì tɛnɛn, ɗi ɓa tì lɛ saaɗ, kɛ̀ɛ̀ mɛ̀ghèy. Rìɓa ɗìn ɗi fuu yì yɛ̀ɛ Bɛ̀ll, lɛ geesɛ̀n ì Bɛ̀ll yɛɛ̀ kɛ̀ɛkɛɛ̀sì ɓìsi, àa ɗyomzɛ̀n ɗi ɓum.

¹³ Tì kàni ɓi mini kìɓan kidɛŋ ki ki yin kiɓan ki ɓi ɓàɓay kiǹ, ɓì ki wowog; ǹɗì rì dyàɓɛn lɛ, ɓì rì kɔ ɓiì woògh kɔɔ̀kɔɔ̀ à rìwog,

¹⁴ yɛ̀ɛ ɓi mɛ yi gàɓ lɛ, ɓìsi yɛɛ ri ɓa rikem ɗin, mìnii ɓa rìkem ɗis ŋwos a Kan Yeesus.

¹⁵ Ɗì rìyi ɗìn ɓi nɗem innɛ mɛ̀ɛ nfèegh lɛ ǹka yùiy a lɔ̀ŋkin, lɛ di ɓi ɓiìti kìghɛɛ̀ mààgh àdɛŋ.

¹⁶ Fɔɔnnɛ i m̀pɛ̀sɛɛ foo, ǹkɛ̀n a Masedwan; i m̀ɓaa yì a Masedwan, ǹsugtìì a lɔ̀ŋkin, lɛ di ɓi ɓuŋɛn lɛ ɓi kɛǹ mɛ̀ kìfoŋì a Zyude.

¹⁷ Rìɓeg ɗi m̀ɓekà lɛ nki fɔlɔɔ, ɗi resii yɛɛ lɔɔ lɛ ǹɗì kɛ̀ɛ̀ bimiɗ à ǹɗɛli, gìn ɓìɓan ɓi mɓeɓeg lɛ nki ɓi ri nya ɓìɓan ɓi mɛmùù, ɓi lèg ànɛ lɛ nɗem wɛ̀m wɛɛ ɓa cààmɛ̀n kìfog lɛ rì ɛ̀ɛ̀ rì èe èe?

¹⁸ Ǹkànɛɛ bɛ̀ɗ ɗi Bɛ̀ll ànɛ à ti à roòzàg mɛ̀kàg mii, lɛ kìɓan ki tì kpaaghà mìni, ki ɓaghà ɓi mɛgheri mɛɓɛɛ̀ lɛ rì ɛ̀ɛ̀, rì èe èe.

¹⁹ Ɓisuulɛ Man à Bɛ̀ll Yeesus Kiris ànɛ ɓìsii kakàlìghà ɓum foo a lɔ̀ŋkin lɛ rì mɛ̀ rì Silas rì Timote, à ɓaghà ɓi mɛgheri mɛɓɛɛ̀ lɛ rì ɛ̀ɛ̀ rì èe èe; lɔŋ ɛ̀ɛ̀ nyi rì nyi yɛɛ ri a lɔ̀ŋkii.

²⁰ Mɛ̀kàg mɛ Bɛ̀ll mɛ̀cèm mɛ ri ɛ̀ɛ̀ ànɛn ɓi nyi. Lɔŋ ɓi nyi girig nnɛ tì ti tì kalàg Bɛ̀ll ààmɛ̀n wìs lɛ ti fa nyi rìkem.

²¹ Roànɛ à ti à kìlàg lɛ ti siìrɛn ɓi Kiris ǹɗaŋ ri mìni, roànɛ à siŋìghà ɓìsi mɔ̀ɔ mɛ lɛ tì rì ɓum ɓii yɛɛ ri Bɛ̀ll nyimiɗ.

²² À rèmzìghà girig ɓìsi rì sìtam̀ wìì, à foŋ ɓìsi ɓìɗùn ɓi Nghay ɓi mɛ̀rem, ɓi ɓi resii lɛ, tì ɓiì terì ɓìrɔɔ ɓi à nyamgà ɓisu wis.

²³ Ǹfoŋi Bɛ̀ll wusìnɛ̀ɗ, i m̀pwàa, à kì lɛ nwu, ǹsugtìghày ɓi a Kɔrɛŋt ɓisuulɛ ǹkɔ̀ngà ɓi lɛ n-yeèsi mìni.

²⁴ Ki yin ɓaà loò lɛ, ti kaakaa lɛ ti lami rìgherɛ̀n ɗin, wɔ̀lɛ ti kɔ̀ngi lɛ di tyàa sali càg ri càg ɓisuu kinyàà kin, lɛ, ɓi san ànɛ a rìgherɛ̀n ɓì ti ɓɛ̀sììrɛn.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan