Bìoball air-loidhne

1 ZYAŊ 3 - Bafia Nouveau Testament

¹ Ghɛɛna rìkuu ɗi nkɔ̀nɛ̀n ɗi Tààta à rèsìghà ɓìsi ɓi lèg ànɛ lɛ ɓɛɛ̀ rereŋi ɓìsi lɛ ɓɔn ɓɛ Bɛ̀ll! Tì ki rì ɓɔn ɓii a tààkaà. Kìɓan ki ziinɛ ì yii ɓi ɓisi miì ki ri lɛ: Ì yighà ɓi Bɛ̀ll.

² Mìni ɓum ɓɛm ɓɛ nɗem, tì ti ɓɔn ɓɛ Bɛ̀ll ɓigomìnɛ, nni com ki tì rì ɓiì ɓaà ki ka resɛn ɓi lɛ tɛntɛ̀ɛ̀n; wɔ̀lɛ tì yii lɛ yɛ̀ɛ Kiris à ɓiì rèsɛɛ, tì ɓiì ɓaà com kìfog rì nyi, ɓisuulɛ, tì rì nyi ɓiì ghɛɛ̀ lɔŋ yɛ̀ɛ à rì.

³ Nni mum ǹcèm ànɛ à rì rì ǹtyweeyi wiǹ yɛ̀ɛ Kiris, à ti à ɓègì nyimiɗ ntɛnɛn fɛlɛ yɛ̀ɛ Yeesus Kiris à rì ǹtɛnɛn.

⁴ Mum ǹcèm ànɛ à kìi kìɓe, à yogsii ɓìdɔ̀gsɛna ɓi Bɛ̀ll lɛ, kìɓe ki ri rìyogsì ɗi ɓidɔ̀gsɛna ɓi Bɛ̀ll.

⁵ Ɓì yii lɛ Yeesus Kiris à yùghày lɛ a pisi ɓìɓe, nni kìɓe ki yin a lɔ̀ŋkii.

⁶ Fɔɔnnɛ mum ǹcèm ànɛ à rì ǹɗàrɛn ɗi nyi à ti kɛ̀ɛ kì ti kiɓe; wɔ̀lɛ roànɛ a kɛ̀nkɛn asu à kìkì kìɓe, à ka ghɛn ɓi nyi, kɛ̀ɛ ki yi nyi.

⁷ Mìni ɓɔn ɓɛm, mum kɛ̀ɛ yègsi mini; ŋwaànɛ a kìki ɓiɓan ɓi saaɗ, à rì lɛ saaɗ lɔŋ yɛ̀ɛ Kan Yeesus à rì lɛ saaɗ.

⁸ Ŋwaànɛ a kɛ̀nkɛn asu à kìkì kìɓe, à rì ŋwaà Satàn, lɛ Satàn a maà kìkì kìɓe, à tumɛ̀n a rìtumɛ̀n. Man à Bɛ̀ll à yùghày lɛ, a yogsi mɛ̀kìkìì mɛ Satàn.

⁹ Mum ǹcèm ànɛ à rì man à Bɛ̀ll à ti kɛ̀ɛ kì ti kiɓe ɓisuulɛ, ìtèɗ wu cɛɓ wu wu riì yɛ̀ɛ Bɛ̀ll wu ri a lɔ̀ŋkii. À yin lɛ à kɛ̀nkɛ̀n asu rì rìkìkì ɗi kiɓe lɛ Bɛ̀ll à rì nyi Seŋì.

¹⁰ Kìɓan ki ki ghasii lɛ rì ɓɔn ɓɛ Bɛ̀ll rì ɓɔn ɓɛ Satàn ki ri lɛ: Mum ǹcèm ànɛ à kìi ɓi ɓiɓan ɓi saaɗ, nsoò roànɛ à keesii ɓi geni à yin man à Bɛ̀ll.

¹¹ Lɛ jɛ̀ɛ̀ ìnɛ ɓì wokà à tumɛ̀n a rìtumɛ̀n ì rì lɛ: Ti kɔ̀nɛɛna ɓìsi rì ɓìsi.

¹² Tì ghɛ̀ɛ̀sɛɛ ɓi ki pisɛɛ Kayin ànɛ à ɓaghà ɓi kìkàmì ki ghèghey à mum, nnyɛɛ wolà geni. À wolà nyi lɛ cɛ? Lɛ mɛ̀kìkìì mɛ geni mɛ ɓaghà lɛ saaɗ, mɛŋkii mɛ̀ kɛɛ̀ rɔɔtɛn.

¹³ Ɓɔɔsoŋ̀! Kɛ̀ ɓi kuurag lɛ ziinɛ ì ɓèèzɛɛ mìni.

¹⁴ Ɓìsii yii lɛ tì mɛ pɛ̀sɛn ɓi rìwu, tì ɗiŋì ɓi cɛɓ; tì yii fɔlɔɔ lɛ tì keesii ɓɛ̀geni ɓis; ŋwaànɛ à yin ɗi ǹkɔ̀nɛ̀n, à kaka ɓi rìwu ɓi ɗùm.

¹⁵ Mum ǹcèm ànɛ à ɓèèzɛɛ geni, à rì ǹwolì-ɓum; ɓì ki yii lɛ ǹwolì-ɓum, à yin ɗi cɛɓ ki fiɗyàɓ fikɔ̀ɔ̀ ɓi nyimiɗ.

¹⁶ Rìyi ɗi tì yii com ki lɛ ǹkɔ̀nɛ̀n ɗyɛɛ̀ɗi lɛ, Yeesus Kiris à faghà cɛɓ kii ɓisu wis; fɔɔnnɛ ɓìsi girig, tì ghɛ̀ɛ̀sɛɛ kì faà cɛɓ kis ɓisuu ɓɛgeni ɓis.

¹⁷ I ŋwaànɛ à rì rì ìkum à ghɛɛ geni di à rì ɓi kìyɛɓà, kɛ̀ɛ wog nyi nyìighnyìg, lannɛ à rì lɛ à kpaa lɛ à keesii Bɛ̀ll ɓi nɗem wii?

¹⁸ Mìni ɓɔn ɓɛm, ki ghɛɛ̀sɛɛ ɓi lɛ ti kɛkɛɛgh ǹkɔ̀nɛ̀n wìs ŋwɔm ɗì ŋwɔm; ǹkɔ̀nɛ̀n wìs a ghɛ̀ɛ̀sɛɛ kì ɓaà kɔɔ̀kɔɔ̀ à ǹkɔ̀nɛ̀n ànɛ a rèeresɛ̀n ɓi mɛ̀kìkìì mis.

¹⁹ Fɔlɔɔ nnɛ tì ɓiì yiì lɛ, tì rì ɓumɓɛ ɓi gàm ì saaɗ; fɔɔnnɛ mɛ̀rem mɛ ri ɓìsi ɓiì kpìi ɓi mùm rì rìɓa ɗis ɓi mis mɛ Bɛ̀ll.

²⁰ Nsoò mɛ̀rem mis maa faa ɓìsi bɛ̀lɛn, tì yii lɛ Bɛ̀ll à cee ǹɗem wis, à ki yi ɓiɓan ɓìcèm.

²¹ Mìni ɓum ɓɛm ɓɛ nɗem, i ǹɗem wu faa ɓi ɓisi bɛ̀lɛn, di tì rì yɛɛ lɔɔ kɛ̀ɛ̀ kìɓan ki lɛ tì risì ɓi mis mɛ Bɛ̀ll.

²² À ti à falàg ɓìsi com kìcèm ki tì tɔɔgh nyi ɓisuulɛ, tì ti tì ɓègì ɓìdɔ̀gsɛna ɓii, tì ki kìlag ɓiɓan ɓi ɓyɛɛ̀ kɔ̀ngi nyi.

²³ Ǹsiŋdɛn wu à faa ɓìsi wɛɛ̀wu lɛ, ti gherɛn Yeesus Kiris à Man wiì, tì ki kɔ̀nɛn lɔŋ yɛ̀ɛ Kiris à siŋdɛ̀ngà ɓìsi lɛ ti kɔnɛn.

²⁴ Ŋwaànɛ à ti à ɓègì ɓìdɔ̀gsɛna ɓi Bɛ̀ll à rì lɔŋ nɗàrɛn ri Bɛ̀ll, Bɛ̀ll girig ǹɗàrɛn ri nyi. Com ki tì ti tì yilàg miì lɛ, Bɛ̀ll à rì a lɔ̀ŋkis kɛɛ̀kìn; tì ki ti tì yilàg fɔlɔɔ lɛ Kìtɛntɛ̀ɛ̀n ki Nghay ki à faghà ɓìsi.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan