Bìoball air-loidhne

TÈSÀLÒNÌSYƐŊ 5 - Bafia Nouveau Testament

¹ Ɓɔɔsoŋ̀, kìɓan ki ki seesee cààmɛ̀n, nsoò lɛ gòn inɛ ɓìɓan ɓiǹ ɓi ri ɓiì kìlɛɛ, ki yiìdi lɛ ɓɛ kaǹ mìni kɔ.

² Ɓisuulɛ mìniìɓɔmiɗ ɓì konaagh kì yiì lɛ ŋwos a Kan à rì ɓiì kpaŋì fɛlɛ yɛɛ wiiwìì à ti à yùlàg rì ìru.

³ Cààmɛ̀n ki yɛ̀ɛ ɓum ɓɛ ɓiì kpaakpaa lɛ fyòomà fi ri lɛ fyòoog kɛ̀ɛ̀ kìɓan ki risiyɛn kɛɛ̀ki ɓɛ rì ɓiì sìgmɛɛ lɛ cuu ki mɛ sɛn ɓi ɓɔ fɛlɛ yɛ̀ɛ rìkɛŋ ɗi riyay ɗi ti ɗi siɗkì giɓ a ɗyem. Ɓaa ɓa ɓi ri bee ì ǹlɛghɛn cuu kìn.

⁴ Wɔ̀lɛ ɓɔɔsoŋ̀, mìnii yin ɓi birìm, fɔɔnnɛ ŋwos anɛ̀n à ghɛ̀ɛ̀sɛɛ ɓi mini kì sìri yɛ̀ɛ wiiwìì.

⁵ Mìniìcèm ɓì rì ɓɔn ɓɛ ɓi kìtɛɛtɛn, ɓì ɓa ti ɓɔn ɓɛ ɓi cààmɛ̀n à ŋwos; ɓìsiì yin ɓɔn ɓɛ ɓi cààmɛ̀n à ìru, nsoò lɛ ɓɛ ɓi birìm.

⁶ Fɔlɔɔ nnɛ tì ghɛ̀ɛ̀sɛɛ ɓi min kilalì yɛ̀ɛ ɓɛro ɓɛm̀bog; ti kɔ̀riina lɔŋ cem, tì ɓèŋɗɛ̀n ɓi kìɓan ki mɛrɔ̀g.

⁷ Ɓisuulɛ, ɓumɓɛ ɓɛɛ̀ lalày, ɓɛ ti ɓɛ laayì rì ìru, ɓɛ̀ŋwaŋì mɛ̀rɔ̀g, ɓɛ ŋwagì rì ìru.

⁸ Wɔ̀lɛ ɓìsi ɓɛ tì rì ɓɔn ɓɛ ɓi cààmɛ̀n à ŋwos, tì ghɛ̀ɛ̀sɛɛ kì ɓèŋɗɛɛ ɓi kìɓan ki mɛrɔ̀g, tì ghɛ̀ɛ̀sɛɛ kì pùrɛɛ rìgherɛ̀n rì ǹkɔ̀nɛ̀n fɛ lɛ yɛ̀ɛ kìlàà ki bɔŋ tì waatɛ̀n girig dyàɓɛn inɛ ɓi gòri yìs fɛlɛ yɛ̀ɛ tàm.

⁹ Ɓisuulɛ Bɛ̀ll à fèkà ɓi lɛ ti ɓa ɓumɓɛ bim yiì ì ɓiì rèsɛɛ a lɔ̀ŋkaa, wɔ̀lɛ à fèkà lɛ tì ɓiì ghɛɛ̀ gòri ì cɛɓ lɛ Kan wìs Yeesus Kiris,

¹⁰ ànɛ à wughà ɓisu wis lɛ ti ghɛɓ ɓɛ̀ràrɛn ɗì nyi, nsoò tyàa mɛ wu, nsoò tyàa kaka cem yɛ̀ɛ à risugtìì.

¹¹ Fɔɔnnɛ ɓì ghɛ̀ɛ̀sɛɛ kì faafàlɛ̀n mìniìɓɔmiɗ ìtèɗ, ɓì kì feèfègsɛ̀n mìni rì mìni yɛ̀ɛ ɓì ti ɓiì kìkii.

Deɓ yi Siitòn, rì ɓìtɔkì

¹² Ɓɔɔsoŋ̀, tì tɔɔgh mìni lɛ ɓi ɓalag rì bɔgsɛ̀n ɓi san ànɛ a ɓumɓɛ ɓɛɛ̀ sasay ɓi nyìinyìn wìn, ɓɛ kɛɛ̀kɛ̀ɛ̀sì mìni ɓi cɛɓ ki Kan, ɓɛ ki rereɓ mini.

¹³ Terina ɓɔ rì coo nyaasɛ̀n lɛɛ̀gwey rì ǹkɔ̀nɛ̀n ɓisuu kìsay ki ɓɛɛ̀ kìkì. Ghɛbina lɛ fyòoog ɓi nyìinyìm wìn.

¹⁴ Ɓɔɔsoŋ̀! tì ɓɔ̀ŋzaagh mìni lɛ, ɓi rɔgsɛn ɓumɓɛ ɓɛɛ̀ ghɛghɛɓ ɓi kìɓùùsì, ɓì cààsì ɓɛ̀riris nyoo, ɓì lènlèm ɓɛroɓɛ ɓɛ yin ɗi ìtèɗ, ɓì yi rìnìɗ ɗi ǹɗem rì ɓum ɓɛ̀cèm.

¹⁵ Ɓì konàg lɛ ŋwaàdɛŋ kɛ̀ɛ ɓa lɛ à rɔ̀ŋ kiɓe ri kìɓe; wɔ̀lɛ kaana lɔŋ lɛ ɓi kiki kìrɔɔ cààmɛ̀n kìcèm, lɛ rì ɓi nyìinyìm wìn, rì ɓi ɓɛg ànɛ a ɓum ɓɛm̀bog ɓɛ̀cèm.

¹⁶ Nyàànyaana cààmɛ̀n kìcèm.

¹⁷ Ɓì ɓɔ̀ɔ̀ɓɔ̀ŋzì Bɛ̀ll kɛ̀ ɓi fɔy.

¹⁸ Faana Bɛ̀ll ɓìtògsɛ̀n ɓi ɓìɓan ɓìcèm ɓi ɓi tanɛɛ mìni, lɛ fɔlɔɔ yɛɛ ri rìkɔ̀n ɗii ɓi cɛɓ kin ki rì Yeesus Kiris.

¹⁹ Kɛ̀ ɓi ɓuɓsi Kìtɛntɛ̀ɛ̀n ki Nghay.

²⁰ Kɛ̀ ɓi sɛɛti ɓiɓan ɓi ɓum ɓɛ kpaŋzii rì ìtèɗ wu Nghay à Bɛ̀ll.

²¹ Kìɓan kifog, fiɓɓaaghna ɓìɓan ɓìcèm lɛ syeesyee, ɓi ɓi rɔɔtɛɛ ɓyɛɛ̀ɓi ɓì ɓèŋ.

²² Lɛɛghna kìɓe mɛkuu mɛ̀cèm.

²³ Bɛ̀ll ànɛ a falag fyòoog a tɛɛ̀zi mìni nyimiɗ bee yicèm, fɔɔnnɛ a ɓeŋ rìɓa ɗin ɗicèm ɗi lɛ: rì Nghay win, rì ǹɗem win, rì nyoo yìn, kɛ̀ɛ̀ tìfin ɓisuu rìsugtìì ɗi Kan wìs Yeesus Kiris.

²⁴ Roànɛ a regag mìni à rì ɓiì kìi kiɓan kiǹ ɓisuulɛ, à ti à roòzàg mɛ̀kàg mii.

²⁵ Ɓɔɔsoŋ̀, ɓì ɓɔ̀ŋzàg girig ɓisu wis.

²⁶ Ɓi tògsag ɓɛ̀geni ɓis ɓɛ ɓi rìgherɛ̀n ɓɛ̀cèm, ɓì lwɛ̀ɗkì ɓɔ yɛ̀ɛ kɛɛ̀ kɔ̀ngi Bɛ̀ll.

²⁷ M̀ɓɔ̀ŋzaagh mìni ɓi ɗii ɗi Kan lɛ, ɓi ɓày kaàtà ànɛ ɓi mɛ̀reè mɛ ɓɛgeni ɓis ɓɛ̀cèm ɓɛ ɓi rìgherɛ̀n.

²⁸ Geesɛ̀n ì Kan wìs Yeesus Kiris yɛ̀ɛ ɓa rì mìni.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan