TÈSÀLÒNÌSYƐŊ 4 - Bafia Nouveau Testament

Cɛɓ ki tɛnɛn ki kɛɛ̀ kɔ̀ngi Bɛ̀ll

¹ Ɓɔɔsoŋ̀, ti siìtɛn kìkpaà lɛ ɓì yilàkà rìkuu ɗi cɛɓ ɗi ɓì ghɛ̀ɛ̀sɛɛ kì ghɛɓì lɛ Bɛ̀ll a wog kìrɔɔ rì mìni, a lɔ̀ŋkis nni cɛɓ kìn kɛɛ̀ki ɓi ghɛghɛ̀ɓ; tì ɓɔ̀ŋzaagh mìni, tì ki yɛ̀gsi mini ɓyàg ɓi ɗii ɗi Kan Yeesus lɛ ɓi teèsi tì nyoo rì rìkuu ɗi cɛɓ ɗìn à cee fɔlɔɔ.

² Ɓisuulɛ ɓì yii ɓìɓan ɓi tì siitàkà mìni; ɓi ɓaghà ɓìɓan ɓi ɓi riì yɛ̀ɛ Kan Yeesus.

³ Rìkɔ̀n ɗi Bɛ̀ll ɗi ri lɛ ɓi ghɛɓ cɛɓ ki tɛnɛn, ɓì cèlì ɓìɓan ɓi tifin.

⁴ Mum ǹcèm ànɛ ɓi mìni, à ghɛ̀ɛ̀sɛɛ kìyiì rìɓèŋ ɗi nyoo yìì ɓi rìtɛn, à ɓèŋɗɛ̀n lɛ a ɓa mum à saaɗ, ɗì rìmum;

⁵ kɛ̀ɛ càrɛn lɛ ɓiɓeɓtàg ɓi ɓiɓan ɓyɛɛ syòŋ nyi ǹɗem, yɛ̀ɛ ki ti ki ɓalàg rì ɓumɓɛ ɓɛ yin ɓɛgherɛ̀n ɓɛ̀ kɛɛ̀ ki yi Bɛ̀ll.

⁶ Ɓi kìɓan kiǹ ŋwaàɗɛŋ à ghɛ̀ɛ̀sɛɛ ɓi ki yègsiì geni, nsoò lɛ à kì nyi kìɓeɓtàg ki nɗem, lɛ Kan à ti à rɔ̀gì ɓìɓan ɓiǹ lɔŋ yɛ̀ɛ tì mɛ kì lɛ, tì kpaa mìni, tì ki rèsi mini.

⁷ Bɛ̀ll à reŋìghà ɓi ɓisi lɛ ti ghɛɓ cɛɓ ki kitɔɓì, wɔ̀lɛ à reŋìghà ɓìsi lɛ ti ghɛɓ cɛɓ ki tɛnɛn.

⁸ Fɔlɔɔ nnɛ ŋwaànɛ à rì ɓiì ɓèni ɓìɓan ɓi nsiisiìtàg ɓi, a yi lɛ, àa mum ìnnɛ à ɓèni, lɔŋ Bɛ̀ll ànɛ à mɛ fa mini girig Kitɛntɛ̀ɛ̀n kii ki Nghay.

⁹ Ki ghɛɓsii ɓi com lɛ ti kaǹ mìni kìɓan ki ǹkɔ̀nɛ̀n à rìgeni, ɓisuulɛ Bɛ̀ll nyimiɗ a rèsàkà mìni kìɓan ki ɓi ǹkɔ̀nɛ̀n ànɛ à ghɛ̀ɛ̀sɛɛ kì ɓaà ɓi nyìinyìm wìn.

¹⁰ Ǹkɔ̀nɛ̀n ànɛn innɛ ɓi rèresi rì ɓɛ̀geni ɓin ɓɛ̀cèm ɓɛ ɓɛ ri Masedwan bimiɗ. Ɓɔɔsoŋ̀, ɓisii yɛgsii lɔŋ mini ɓyàg lɛ ɓi kɛɛ̀di beèbɛ̀y rì rìkì ɗiǹ.

¹¹ Ɓì foŋ ǹɗem ɓi kìɓan ki lɛ ɓi ghɛ̀ɓ lɛ fyòoog, ɓì kìkì ɓìɓan ɓin ɓi mìniìɓɔmìɗ, ɓì ki sasay ri ɓyàg ɓin lɔŋ yɛ̀ɛ tì siŋdɛ̀ngà mìni;

¹² di fɔɔnnɛ ɓumɓɛ ɓɛ yin ɓɛgherɛ̀n ɓɛɛ teɗ mìni rì rìmum, ǹtɛ̀g win wɛ̀ kɛɛ̀ rìɗ ŋwaàdɛŋ.

Rìghèmɓɛ̀n ɗi ɓiloŋ rì rìsugtìì ɗi Kan

¹³ Ɓɔɔsoŋ̀, tì kɔ̀ni ɓi lɛ ɓi ɓa lɛ dùŋdùŋ ɓi kìɓan ki ki seesee ɓɛroɓɛ ɓɛ ri ɓìloŋ lɛ di kɛ̀ ɓi ɓa lɛ mɛ̀rem min mɛ ɓeɓtɛ̀n ɓi mùm yɛ̀ɛ mɛ ɓum ɓɛm̀bog ɓɛ ɓɛ rì kɛ̀ɛ̀ dyàɓɛn.

¹⁴ Lɛ i tì gherɛɛ lɛ Yeesus à wughà, à ki ghèmɓɛn, ti gherɛɛna girig lɛ Bɛ̀ll à rì ɓiì ghèmzii ǹɗaŋ ri Yeesus, ɓɛroɓɛ ɓɛ gherɛ̀ngà nyi ɓɛ ɓaa wu.

¹⁵ Ɓisuulɛ com ki ti kpaaghì fɛlɛ yɛ̀ɛ jɛ̀ɛ̀ ì Kan ì rì ki ri lɛ: Ɓìsi ɓɛ tì rì ɓiì ɓaà di tì kaka cem ɓi rìsugtìì ɗi Kan, tyàa syòŋ ɓi ɓɛroɓɛ ɓaa wu bee.

¹⁶ Ɓisuulɛ, yɛ̀ɛ jɛ̀ɛ̀ ì rì ɓìì toòghrɛɛ, jɛ̀ɛ̀ ì coo ŋwaà-fìtom, ɗyam ɗi Bɛ̀ll ɗi rɔŋ, Kan nyimiɗ a ɓiì sɛnìì aɗyòò; fɔɔnnɛ ɓìloŋ ɓi ɓi Kiris ɓi ɓiì loògh kì ghèmɓɛɛ.

¹⁷ Ajɛ̀m ìnɛn, ɓìsi ɓumɓɛ tì ɓiì ɓaà di tì kaka cem, ɓɛ rì ɓìsi ɓiì terì ǹɗaŋ ri ɓɔ, tì ɓɔg ɓi ɓìkwìɗ lɛ tì tuùsɛn rì Kan ɓi nlɛŋlɛŋ̀. Fɔlɔɔ nnɛ tì ɓiì kɔ̀kɔrii ri Kan cààmɛ̀n kìcèm.

¹⁸ Ɓì ghɛ̀ɛ̀sɛɛ lɛ ɓì fɔɔ̀fɔ̀ɔ̀sɛ̀n mìniìɓɔmiɗ mɛrem rì ɓìɓan ɓiǹ.