TÈSÀLÒNÌSYƐŊ 2 - Bafia Nouveau Testament

Kìsay ki Pol à kìghà a Tesalonika

¹ Ɓɔɔsoŋ̀, mìniìɓɔmiɗ ɓì yii lɛ, rìyù ɗi tì yùghà a lɔ̀ŋkin ɗi wughà ɓi zɛy.

² Di tì ka kpaŋ ɓi a lɔ̀ŋkin, tì ghɛngà mɛ̀tɔɓ, ɓum ɓɛ ki yeesi ɓisi a Filiɓ lɔŋ yɛ̀ɛ ɓì yii, wɔ̀lɛ Bɛ̀ll à faghà ɓìsi ìtèɗ wulɛ ti ghagsi mìni Syeesyee à Ɓɔlɛ wìì nsoò yɛ̀ɛ ki ɓaghà bimiɗ à wɛ̀y.

³ Ɓìɓan ɓi Bɛ̀ll ɓi tì kakàlìghà ɓum ɓi rooghày ɓi ǹɗuŋ ɓi rìnàn ǹsoò lɛ ɓi ɓìɓan ɓi tifin, fɔɔnnɛ ɓi ki yin ɗi ǹ-yègsɛ̀n.

⁴ Wɔ̀lɛ Bɛ̀ll à timgà rìɓa ɗis à ki fa ɓisi kìsay ki Syeesyee à Ɓɔlɛ. Fɔlɔɔ nnɛ tì yin ɓiì kpaakpaa ɓiɓan ɓi Bɛ̀ll lɛ ti puɓsi ɓum mɛ̀rem, kìɓan kìfog, ti kpaakpaa ɓi ɓyɛɛ̀ kɔ̀ngi Bɛ̀ll ànɛ à ti à ghɛngì yɛ̀ɛ mɛ̀rem mɛ ɓum, mɛ ri ɓi ɗùm.

⁵ Ɓì yii lɛ tì ka ɓaghà ɓi ri jɛ̀ɛ̀ ì fìɗyɛɓi, nsoò rìyitì ɗi lɛ ti fɔǹ mɔ̀ɔ̀ni ŋwos adɛŋ, Bɛ̀ll à rì ɓìsi wusìnɛ̀ɗ.

⁶ Tì kaaghà ɓi lɛ ɓum ɓɛɛ kemzi ɓisi, nsoò a lɔ̀ŋkin, nsoò a ɓum ɓɛm̀bog, kɔlɛ tì ɓaghà lɛ tì làmì mìni ɓi-tèɗ ɓi ɗii ɗi lɛ ɓɛ̀kɛ̀nì-fìtom ɓɛ Kiris.

⁷ Wɔ̀lɛ tì ghɛɓkà ɓi nyìinyìm wìn rì nɗem wu tɛ̀tɛ̀rɛ̀ɛ̀ lɔŋ yɛ̀ɛ jɛɛ ɓɔn à ti à ɓègì ɓɔn ɓii.

⁸ Ɓi rìkeesì ɗi tì keesìghà mìni, àa Syeesyee à Ɓɔlɛ à Bɛ̀ll nyi rì nyi innɛ tì ɓaghà lɛ tì kɔ̀n lɛ ti fa mìni, ti ɓaghà lɛ ti fa mìni lɔŋ lɛ rì ɓyɛɓ ɓis miì, lɛ ɓì ɓaghà di ɓì ti ɓum ɓis ɓɛ nɗem lɛ kɔɔ̀kɔɔ̀.

⁹ Ɓɔɔsoŋ̀ ɓì rì lɛ ɓì yitì kìsay ki tì kìghà, rì ǹtɔɓ wu tì wokà; tì ghagsìghà mìni Syeesyee à Ɓɔlɛ à Bɛ̀ll tì ki sasay lɛ rì ìru rì ŋwos lɛ ǹtɛ̀g wis wɛ̀ kɛɛ̀ siŋ wààdɛŋ ɓi nyòò.

¹⁰ Ɓì rì ɓɛ̀wusìnɛ̀ɗ ɓis, nsoò Bɛ̀ll à rì girig wusìnɛ̀ɗ lɛ cɛɓ ki tì ghɛɓkà rì mìni ɓɛ ɓì rì ɓɛ̀gherɛ̀n ki ɓaghà kìtɛnɛn, kɔ tì lɛ saaɗ, kɛ̀ɛ̀ kìɓan kifenɛn miì.

¹¹ Ɓì yii girig lɛ tì ghɛɓkà rì mum ǹcèm ànɛ ɓi mìni fɛlɛ yɛ̀ɛ seŋi à rì lɛ à ghɛɓ rì ɓɔn ɓii.

¹² Tì kìghà lɛ tì reɓ mìni, tì fɔɔsì mìni mɛ̀rem, tì ki ɓɔ̀ɔɓɔ̀ŋzì mìni lɛ ɓi ghɛɓ lɔŋ yɛ̀ɛ kɛɛ̀ kɔ̀ngi Bɛ̀ll ànɛ a regi mini lɛ ɓi ɓa rì gàɓ ɓi kìlɔ̀ŋ kii, rì ɓi rìkem ɗii.

¹³ Kìɓan kiǹ kɛɛ̀ki tì fafa Bɛ̀ll ɓìtògsɛ̀n cààmɛ̀n kìcèm lɛ, yɛ̀ɛ bì ghàɓkà jɛ̀ɛ̀ yìì ìnɛ tì wogsìghà mìni, ɓì ghàɓkà ɓi yɔ̀ yɛ̀ɛ jɛ̀ɛ̀ ì mum; ɓì ghàɓkà lɔŋ yɔ̀ yɛ̀ɛ ì rì a tààkaà, lɛ ì rì jɛ̀ɛ̀ ì Bɛ̀ll ìnɛ yɛ̀ɛ kìki kisay ɓi mìni ɓɛ ɓì rì ɓɛ̀gherɛ̀n.

¹⁴ Ɓɔɔsoŋ̀, ɓì mɛ pisɛn Ɓiseŋi ɓi Bɛ̀ll ɓi ɓi ri a Zyude ɓi Yeesus Kiris, ɓisuulɛ ɓumɓɛ ɓi kìlɔ̀ŋ kin ɓɛ yeesìghà mìni lɔŋ yɛ̀ɛ ɓɛroɓɛ a Zyude ɓɛ yeesìghà ɓɛ̀gherɛ̀n ɓɛ wɔ̀ɔ̀.

¹⁵ Ɓɛ̀yudɛ̀n ɓɛǹ ɓɛɛ wolà Kan Yeesus, ɓɛ ki cuusi ɓɛ̀kpaŋzì-ɓìɓan, ɓɛɛ yeeyèèsìghà ɓìsi; ɓɛ ti ɓɛ ɓeɓkì Bɛ̀ll, ɓɛ ki ɓèèzag ɓum ɓɛ̀cèm.

¹⁶ Ɓɛ ti ɓɛ rekì ɓìsi lɛ tyɛ̀ ki ghagsi jɛ̀ɛ̀ ì Bɛ̀ll a ɓumɓɛ ɓɛ yin Ɓɛ̀yudɛ̀n lɛ ɓɛɛ ɓa rì cɛɓ. Rìkì ɗiǹ ɗyɛɛ̀ɗi ɓɛɛ̀ kɛ̀nkɛn beèbɛ̀y ɓɛ teètègsì kìɓe kaa cààmɛ̀n kìcèm rì ɗyɔ̀; wɔ̀lɛ rìbaŋì ɗi Bɛ̀ll ɗi mɛ syɔn ɓɔ kìkòmi.

Pol à rì rì zày ìnɛ lɛ a kpaŋdi a Tesalonika

¹⁷ Ɓi san wìs, yɛ̀ɛ tì ghasɛ̀ngà rì mìni tyɛ̀ ki ghɛnɛn ti a mɛ̀su ɓi maa cààmɛ̀n, fɔlɔɔ kɛ̀ɛ ki rèsi lɛ tì ti tyɛ̀ ki fègti mini, ɓɔɔsoŋ̀, tìi nɗì rì coo zày ìnɛ lɛ ti ghɛnɛn tì rì mìni, fɔɔnnɛ tìi ǹtèèsii nyoo lɛɛ̀gwey lɛ kìɓan kiǹ kɛɛ kilɛn.

¹⁸ Tì kɔ̀ngà lɔŋ lɛ di tyàa yùu foo, a lɔ̀ŋkin mɛ̀ɛmiɗ Pol ǹfèèghrɛɛ gɛ̀n yɛ̀ɛ yiɓɛɛ̀, wɔ̀lɛ Satàn a règ ɓìsi rìyù.

¹⁹ Ghɛn yɛɛrì min ɓiì ɓaà dyàɓɛn yìs, rì kìnyàà kis nsoò lɛ tàm wìs a rìkem ɓi mis mɛ Kan wìs Yeesus, ŋwosi risugtìì ɗii? Àa lɔŋ mìni yɛɛ rì ɓa wa?

²⁰ Ɛ̀ɛ̀, mìni yɛɛ ri rìkem ɗis, rì kìnyàà kis.