TÈSÀLÒNÌSYƐŊ 1 - Bafia Nouveau Testament

Ɓɛ̀-Pol ɓɛ togsii ɓɔ

¹ Mɛ̀ Pol, ɓɛɛ Silas rì Timote, tì kàni ɓumɓɛ ɓi Kìseŋi ki a Tesalonika ki ki ri ɓi Bɛ̀ll Seŋi rì ɓi Yeesus Kiris Kan. Geesɛ̀n, rì fyòoog ɓyɛɛ ɓa ɓìfayɛn a lɔ̀ŋkin.

Kìsay ki Syeesyee à Ɓɔlɛ kɛɛ̀ kɛ̀ɛ̀kɛ̀ɛ̀ a Tesalonika

² Ɓisiì fafa lɔŋ Bɛ̀ll ɓìtògsɛ̀n cààmɛ̀n kìcèm ɓisu wiǹ mìniìcèm, tì ki ɓùŋɓuŋ mini ɓi bɔ̀ŋzɛ̀n yis.

³ Ɓi mis mɛ Bɛ̀ll à Seŋi wìs tì ti tì yitàg ɓyààmɛ̀n ɓìcèm mɛ̀kìkìì min mɛ ɓi rìgherɛ̀n, rì kìsay ki ǹkɔ̀nɛ̀n wiǹ a kìkì, rì rìsììrɛ̀n ɗin ɓi dyàɓɛn inɛ tì rì rì yɔ̀ ɓì Kan wìs Yeesus Kiris.

⁴ Ɓɔɔsoŋ̀, tì yii lɛ Bɛ̀ll à keesìghà mìni, à ki ɓɔ̀n mini.

⁵ Ɓisuulɛ tì ghagsìghà ɓi mini Syeesyee à Ɓɔlɛ ànɛ tì ɓaghày rì nyi rì jɛ̀ɛ̀ ì ŋwɔm yɔ̀ ri yɔ̀, tì ghagsìghà girig nyi ɓi dàm yi tì kìkìghà rì ìteɗ wu Kitɛntɛ̀ɛ̀n ki Nghay, tì ki konag kiyiì saaɗ bimiɗ ànɛ ɓi Ɓɔlɛ ànɛ̀n. Ɓi saaɗ, ɓì yii cɛɓ ki tì ghɛɓkà ɓi nyìinyìm wìn; fɔlɔɔ a ɓaghà ɓi kìrɔɔ kin.

⁶ Ɓì nɔ̀ɔ̀tìghà lɛ rì mɛ̀kòò mis, rì mɛ̀kòò mɛ Kan, ɓì ki tulɛn rì mɛ̀tɔɓ lɛɛ̀gwey yɛ̀ɛ bì ghàɓkà Syeesyee à Ɓɔlɛ rì kìnyàà ki Kìtɛntɛ̀ɛ̀n ki Nghay kɛɛ̀ falàg.

⁷ Fɔɔnnɛ ɓì ti kìfèèghrɛnà ɓisuu ɓɛgherɛ̀n ɓɛ̀cèm ɓɛ a Masedwan, rì ɓɛ a Akayi.

⁸ Lɛ jɛ̀ɛ̀ ì Kan ì mɛ pɛ̀sɛn yi a lɔ̀ŋkin, ì kpaŋ à Masedwan rì a Akayi, nni àa lɔŋ foo nyi rì nyi, gom ì rìgherɛ̀n ɗin ɗi ɓì gherɛɛ Bɛ̀ll, ì mɛ sàà jàŋ bimiɗ à kpaŋ ɓi lèg ànɛ tì yin gi lɛ tì kpaakpàà.

⁹ Ɓum ɓɛɛ̀ kpaakpaa righàɓ ɗi ɓì ghàɓkà ɓìsi yɛ̀ɛ tì kpagà a lɔ̀ŋkin rì yɛ̀ɛ ɓì càɗkàkày ɓìnùn, ɓì lɔ̀ɔ̀ghrɛ̀n yɛ̀ɛ Bɛ̀ll lɛ ɓi ɓɔgsi nyi, lɛ nnyɛɛ ri kɔɔ̀kɔɔ̀ à Bɛ̀ll ànɛ a rì cem,

¹⁰ ɓì ɓoŋɓòŋ lɛ Man wiì Yeesus, ànɛ à ghèmzìghày a ɓìloŋ, a sɛǹ yì aɗyoo, di a kweɗ ɓìsi ɓi rìbaŋì ɗi Bɛ̀ll ɗi ɗi riì.