1 PYƐƐRI 5 - Bafia Nouveau Testament

Deɓ yi yi seesee ɓɛ̀sɛ̀ɛ̀mɛn ɓɛ Kiseŋi rì ɓɛ̀gherɛ̀n ɓɛ zɛy

¹ Ǹtɔɔgh min ɓɛsɛ̀ɛ̀mɛn ɓɛ Kiseŋi ɓɛ ɓɛ ri ɓi nyìinyìm wìn, mɛ̀ ànɛ ǹɗì girig Ǹsɛ̀ɛ̀mɛn a Kìseŋi yɛ̀ɛ ɓɔ, ǹki ɓa ti wusìnɛ̀ɗ ànɛ ɓi mɛ̀tɔɓ mɛ Kiris, mɛ ti rì gàɓ ɓi rìkem ɗi ɗi ghɛɛ̀sɛɛ kì rèsɛɛ,

² lɛ mɛniina kìtuu ki jɔ̀ɔ̀ ki Bɛ̀ll ki ɓɛ reɓsɛ̀ngà rì mìni; kɛ̀ kɛɛ̀ ɓa yɛ̀ɛ ǹkàŋɗɛ̀n, mɛniina yɔ rì syeesyee à rìkɔ̀n yɛ̀ɛ kɛɛ̀ kɔ̀ngi Bɛ̀ll, kɛ̀ ɓi kì kisay kiǹ rì ǹɗem wulɛ ɓi fɔǹ mɔ̀ɔ̀ni, kììna lɔŋ kɔ rì syeesyee à nɗem.

³ Kɛ̀ ɓi tuturi ɓumɓɛ ɓɛ faghà mìni lɛ ɓi ɓeŋ̀, kìɓan kifog ɓaana kìfèèghrɛnà ki jɔ̀ɔ̀ yi Bɛ̀ll yi ri lɛ yi nɔɔ̀tì;

⁴ fɔlɔɔ nnɛ yɛ̀ɛ ǹkɔ̀mɛ̀n ɓɛ̀ɓèŋì-jɔ̀ɔ̀ à ɓiì kpaŋì, ɓì ɓiì terì tàm à rìkem ànɛ à yin lɛ à ɗyoŋ.

⁵ Mìni ɓìɓwɛɗ ɓi ɓum, ɓì ghɛ̀ɛ̀sɛɛ girig lɛ ɓi ki ɓɛ̀sɛ̀ɛ̀mɛn mɛwog. Nni mìni ɓɛ̀sɛ̀ɛ̀ ɓɛ̀cèm, ɓi cɛɓ ki ɓi ghɛghɛɓ mini rì mìni, sɛɛ̀dɛɛna mìniìɓɔmiɗ ɓi zi, ɓisuulɛ Bɛ̀ll à ti kɛ̀ɛ ɓa nkɔɔ rì ɓɛ̀daŋàdaŋa, lɔŋ ɓɛ̀roɓɛ ɓɛ sɛɛ̀dɛɛ ɓɔmiɗ ɓi zi ɓɛɛ̀ɓɛ a rèsag geesɛ̀n yìì.

⁶ Nni sɛɛ̀dɛɛna min mìniìɓɔmiɗ ɓi zi ɓi mis mɛ Bɛ̀ll ànɛ à rì rì ìtèɗ ucem lɛ nyi yɛɛ pɛsi mìni aɗyoo ɓi cààmɛ̀n ki à siŋdɛ̀ngà.

⁷ Sɛɛ̀dɛɛna ɓìɓan ɓìcèm ɓi ɓyɛɛ̀ ɗiɗi mini mɛ̀rem a lɔ̀ŋkii ɓisuulɛ nyimiɗ a ɓeŋ̀ɓeŋ mini.

⁸ Ɓaana cem, ɓì konàg ɓisuulɛ bènàbena wiǹ ànɛ lɛ Satàn a ŋwɔŋ-ŋwɔŋ yɛ̀ɛ kìmonɗo ki kɛɛ̀ kaakaa com ki kɛɛ sokɛn.

⁹ Ɓaana ɓɛ̀sììrɛn ɓi rìgherɛ̀n, kɛ̀ ɓi càrɛn lɛ a ɓigti mìni, ɓì ki yi lɛ ɓɛ̀geni ɓin ɓɛ rìgherɛ̀n ɓɛɛ̀ tuutulɛ̀n rì mɛ̀kuu mɛ mɛtɔɓ mɛ̀n ɓi ziinɛ.

¹⁰ Fɔɔnnɛ ki ɓiì ɓaà lɛ i ɓyàa wog rikɛŋ ɓi maa cààmɛ̀n, Bɛ̀ll ànɛ à rì rì geesɛ̀n bimiɗ, ànɛ à reŋìghà mìni lɛ ɓi teɗ gàɓ ɓi rìkem ɗii ɗi fiɗyàɓ fikɔ̀ɔ̀ ɓi Kiris ɓi ɗùm, à rì mìni ɓiì konagh ki rɛsii lɛ syeesyee nyimiɗ, à sììràg mìni, à fa mìni ìtèɗ, à kì lɛ ɓi ɓa ɓumɓɛ com ki yin lɛ ki ɓigtì.

¹¹ Bɛ̀ll ànɛn yɛɛ ri rì ìtèɗ fiɗyàɓ fikɔ̀ɔ̀ Ààmɛ̀n.

Rìlègsì ɗi kaàtà, rì rìmàŋ

¹² Ǹkàniì mìni ɓɔɔ jɛ̀ɛ̀ ɓɛ rì Silvɛŋ ànɛ à rì geni wìs a ǹtyweeyi lɛ nfa mìni deɓ, ǹki tɛɛ̀zi mini kì rèsii lɛ fɔlɔɔ nnɛ kɔɔ̀kɔɔ̀ à geesɛ̀n ì Bɛ̀ll, ànɛ ɓì rì miì ɓɛ̀sììrɛn lɛ tiŋtiŋ, à rì.

¹³ Kìseŋi ki ɓumɓɛ ɓɛ ri ɓɛ̀ɓɔ̀nɛn ki a Baɓilon ki togsaagh yì mìni, Marikus à man wɛm̀ à tògsì girig mìni.

¹⁴ Tògsɛɛna mìni rì mìni, di ɓi lɔ̀ɔlɔrɛ̀n ɓi nkɔ̀nɛ̀n à rìgeni. Fyòoog a ɓa rì mìni ɓɛ̀sɛ̀ɛ̀ ɓɛ̀cèm ɓɛ ɓì rì ɓi Kiris ɓi ɗùm.