1 PYƐƐRI 4 - Bafia Nouveau Testament

¹ Nni yɛ̀ɛ Kiris à wokà rìkɛŋ ɗi ɓi mɛ̀mùù, mìniìrig ɓanɛɛ na rì rìyitì ɗiǹ ɓisuulɛ ŋwaànɛ à mɛ wog rikɛŋ ɗi ɓi mɛ̀mùù, à rì ŋwaànɛ à mɛ ghasɛn ɗi kìɓe

² lɛ di fɔɔnnɛ a ghɛɓ yɛ̀ɛ rìkɔ̀n ɗi Bɛ̀ll ɗi ri, ɓi gàɓ ì mɛ̀ru ìnɛ à ghɛ̀ɛ̀sɛɛ tì kìghagsii ɓi ziinɛ, kɛ̀ɛ ghɛɓ ti cɛɓ ki ǹɗem wii wɛɛ̀ kɔ̀nkɔn lɛ a ghɛɓ.

³ Ɓisuulɛ ɓì roòzìghà rìkɔ̀n ɗi ɓumɓɛ ɓɛ gherɛɛ ɓi Bɛ̀ll yɛ̀ɛ ɓì ghɛghɛ̀ɓkà ɓi kìɓùùsì, ɓì kìkì ɓìɓan ɓi ǹɗem win wɛɛ̀ kɔ̀nkɔ̀n, ɓì nɔnɔ̀ mɛ̀rɔ̀g, ɓì ɗiɗì ɓìɗilàg rìɗi ɗi kiɓe, ɓì ŋwaŋŋwàŋ mɛ̀rɔ̀g, ɓì ki ɓɔɔɓɔgsì ɓìnùn ɓi ɓi ri kìɓan ki ki ɓeɓtɛɛ ki ciɓ.

⁴ Nni ɓigomìnɛ ɓumɓɛ ɓɛ yin ɓɛgherɛ̀n ɓɛɛ̀ kuukuùghràg yɛ̀ɛ ɓì nɔ̀ɔ̀tii tì ɓi ɓɔ ɓi coo kiɓeɓtàg ki cɛɓ kìn, fɔɔnnɛ ɓɛɛ̀ wɔmwɔm mini.

⁵ Kìɓan kifog ɓɛ ɓàagh gɛ kìɓan ki ɓɛɛ̀ kìki kiǹ ɓi mis mɛ roànɛ à ti jàŋbog lɛ a yɔm̀ lɛ rì ɓum ɓɛ cem rì ɓìloŋ.

⁶ Kìɓan kiǹ kɛɛ̀ki Syeesyee à Ɓɔlɛ à kalɛ̀ngà girig a ɓìloŋ, a ɓɛ̀roɓɛ ɓɛ ɓaghà ɓɛ̀yɔ̀mɛn ɓi cɛɓ kaa ki mɛmùù lɔŋ yɛ̀ɛ ɓum ɓɛ̀cèm, lɛ di ɓɛɛ ɓa rì ìtèɗ wulɛ ɓɛɛ ghɛɓ yɛ̀ɛ Bɛ̀ll rì ìtèɗ wu Nghay.

⁷ Rìsugtɛ̀n ɗi ɓyom ɓìcèm ɗi ti jàŋbog, fɔlɔɔ nnɛ ɓì ghɛ̀ɛ̀sɛɛ kì ɓaà rì ɗyomzɛ̀n, kɛ̀ ɓi falɛn ɓi ɓìnɔɔ̀nɔɔ̀, di ɓi kiki bɔ̀ŋzɛ̀n.

⁸ Kìɓan ki asu ki ri lɛ: Ɓaana rì ǹkɔ̀nɛ̀n ànɛ kɛ̀ɛ lɔ̀gtɛn ɓi nyìinyìm wìn, lɛ ǹkɔ̀nɛ̀n à ti à lɔkì ǹkun wu ɓiɓe.

⁹ Ɓaana rì ǹɗem wulɛ ɓi ghaɓki ɓɛ̀geni ɓin di ɓɛ yuu a lɔ̀ŋkin kɛ̀ɛ̀ tìrùrùmì.

¹⁰ Yɛ̀ɛ mum ǹcèm ànɛ ɓi mìni à rì rì rìfa ɗi Bɛ̀ll à faghà nyi, kìina kìsay ri rìfa ɗi Bɛ̀ll à faghà mìni ɓi kìrɔɔ ki ɓum ɓɛmbog fɛlɛ yɛ̀ɛ ɓɛ̀syeesyee ɓɛ ɓum ɓɛ ɓɛɛ̀ kɛ̀ɛkɛɛ̀sì geesɛ̀n ì Bɛ̀ll ìnɛ ì ti ì ghɛnàg bee lɛ bee.

¹¹ I mum à pinii ŋwɔm lɛ a kali ɓìɓan ɓi Bɛ̀ll, a ghagsi lɔŋ jɛ̀ɛ̀ ìnɛ ì rìì yɛ̀ɛ Bɛ̀ll, ŋwaànɛ a ghɛɛghɛɓsì kìsay, à ghɛ̀ɛ̀sɛɛ kɔ kì kìi ri ìtèɗ wu Bɛ̀ll à faa nyi, di fɔlɔɔ nnɛ Bɛ̀ll a teɗ rìkem ɓi ɓìɓan ɓìcèm lɛ Yeesus Kiris ànɛ à rì lɛ, rì rìkem, rì ìtèɗ, fiɗyàɓ fikɔ̀ɔ̀. Ààmɛ̀n.

¹² Mìni ɓum ɓɛm ɓɛ nɗem, rìɓa ɗi ɓì rì ɓi ɓɛ̀gɛn ɓɛ mɛfèèghrɛn ɓɛ ɓɛ ri yɛ̀ɛ ɗuu ɗi ghɛ̀g-ghɛ̀g, ɗyɛ̀ kɛɛ̀ sìɗ mini yɛ̀ɛ ɓɛɛ̀ kali lɛ kìkènekènè ki kiɓan kidɛŋ kɛɛ tanɛɛ mìni.

¹³ Ɓì ghɛ̀ɛ̀sɛɛ lɔŋ lɛ ɓì nyààrɛ̀n lɛ ɓi teteɗ gàɓ ì mɛ̀tɔɓ mɛ Kiris, di fɔɔnnɛ ɓi ɓiì rongii girig rì kìnyàà yɛ̀ɛ rìkem ɗii ɗi ri ɓiì ghɛnɛɛ.

¹⁴ I ɓɛɛ̀ sɛɛsɛmgì mìni lɛ ɗii ɗi Kiris, di ɓì rì ɓɛ̀mààghmaagh ɓisuulɛ Ǹghay à rìkem, Ǹghay à Bɛ̀ll à rì ɓi mìni.

¹⁵ Wààdɛŋ kɔ̀ɔ ɓa lɛ ù wowòg mɛ̀tɔɓ lɛ ù woli mum, nsoò lɛ ù yii com, nsoò lɛ ù kìi coo kiɓeɓtàg ki kiɓan kidɛŋ, nsoò lɛ ù pùrii ŋwɔm ɓi kìɓan ki ɓum ɓɛdɛŋ;

¹⁶ wɔ̀lɛ i ki ri lɛ ɓi wowog ntɔɓ ɓi ɗii ɗi lɛ kìristɛ̀n, kɛ̀ ɓi wog ntoòrìɗ, ɓì ghɛ̀ɛ̀sɛɛ lɔŋ ki kemzii Bɛ̀ll ɓisuu ɗii ɗìn.

¹⁷ Ɓisuulɛ cààmɛ̀n ki ɓɛyɔ̀m ki kpaŋi, nni ɓɛ̀yɔ̀m ɓɛǹ ɓɛ tumɛɛ ɓi naa ì ɓum ɓɛ Bɛ̀ll. I ɓi ɓìsi nnɛ ɓɛ̀yɔ̀m ɓɛ tumɛɛ, rìsyɔn ɗi ɓumɓɛ ɓɛ ti ɓɛ ɓengì kì gherɛɛ Syeesyee à Ɓɔlɛ ɗi ri ɓa là?

¹⁸ I rìghɛɓ ɗi ŋwaànɛ à rì lɛ saaɗ a ghɛɓ ɗi ka ti fɔlɔɔ ri ntɔɓ, ki ɓa min la ɓi san ànɛ yɛ̀ɛ kiɓeɓtàg ki mum rì ǹkìì-kìɓe?

¹⁹ Fɔlɔɔ nnɛ ɓumɓɛ ɓɛɛ̀ wowog mɛtɔɓ lɛ Bɛ̀ll yɛɛ kɔni, ɓɛ ghɛɛ̀sɛɛ kì faà ɓyɛɓ ɓyaa ri ǹkìì-ɓyom ɓìcèm ànɛ à ti à roòzàg mɛ̀kàg mii, ɓi rìkì ɗi ɓɛɛ̀ kiki kirɔɔ.