1 PYƐƐRI 3 - Bafia Nouveau Testament

Cɛɓ ki ɓɛgherɛ̀n ɓi naa yaa yi mɛwɛy

¹ Nsoò mìni ɓɛ̀yiɓ, ɓaana girig rì mɛ̀wog, giɓ bimiɗ a wog yii wiì, di fɔɔnnɛ kɛɛ ɓa lɛ i ɓɛ̀baŋì ɓɛdɛŋ ɓɛ gherɛɛ ɓi jɛ̀ɛ̀ ì Bɛ̀ll, rìkuu ɗi cɛɓ ɗi ɓɛ̀yiɓ ɓaa ɓɛɛ̀ ghɛghɛɓ ri ɓɔ ɗyɛɛ ghɛɛ̀sɛɛ ɓɔ kìsyòŋi ɓi rìgherɛ̀n nsoò mum àa tòòghrɛɛ ɓi ri ɓɔ.

² Lɛ ɓɛ ri ɓiì ghɛɛ̀ yɛ̀ɛ cɛɓ kìn ki ri kìtɛnɛn, rì mɛ̀wog.

³ Mɛ̀rɛ̀ŋ min mɛ̀ kɛɛ̀ ɓa mɛrɛ̀ŋ mɛ seeseèrɛ̀n ɓi dan; fɛlɛ yɛ̀ɛ tyòŋ ti ɓaghrɛn, tìcaka rì mɛkpèy mɛ ɓɛ kii rì gol, rì ǹwaà wu syeesyee,

⁴ kìɓan kifog ǹɗɛ̀ŋ wu ɓì ghɛɛ̀sɛɛ kìɓaà rì wɔ wu ri wu wu ri wù nyamɛn ɓi nɗem, wɛɛ ri ǹɗɛ̀ŋ wu wu yin lɛ wu ɗyoŋ, lɛ wu ri ǹɗɛ̀ŋ wu nghay wu wu ri lɛ tɛ̀tɛ̀rɛ̀ɛ̀, wɔ tì lɛ fyòoog, rìkuu ɗìn ɗyɛɛ ri gìn i com ɓi mis mɛ Bɛ̀ll.

⁵ Fɔlɔɔ nnɛ ɓɛ̀gherɛ̀n ɓɛ ɓɛ̀yiɓ ɓɛ abɛ̀y, ɓɛ dyàɓɛn yaà ì ɓaghà yɛ̀ɛ Bɛ̀ll ɓɛ nti ɓɛ rɛŋɗàg, lɛ ɓɛ nti ɓɛ wokì ɓɛ̀yii ɓaa;

⁶ fɔlɔɔ nnɛ Sara àa nti à wokì Abiraham à ki regi nyi lɛ kan wìì. Sara ànɛn nnɛ ɓì ti dòò yii, di ɓi kìki kirɔɔ kɛ̀ ɓi càrɛn lɛ com kidɛŋ kɛɛ niŋzi mìni nyòò.

⁷ Fɔlɔɔ nnɛ mìni ɓɛ̀baŋì, ɓì ghɛɛ̀sɛɛ girig lɛ mum bimiɗ a ghɛɓ rì giɓ wiì, à yi lɛ ɓɛ̀yiɓ ɓɛ ri ɓumɓɛ ɓɛ yin ɗi ìtèɗ yɛ̀ɛ ɓɛ̀baŋì; terina ɓɔ rì nyaasɛ̀n lɛ ɓɛ ghɛɛ̀sɛɛ girig kìterì mààgh à cɛɓ bas ɗì mìni, di fɔlɔɔ nnɛ com kidɛŋ kɛ̀ kɛɛ̀ gheŋɗɛn ɓi bɔ̀ŋzɛ̀n yìn.

Ɓìɓan ɓi ɓi ghɛɛ̀sɛɛ kì ghɛnɛɛ ɓi nyìinyìm à ɓɛ̀kìristɛ̀n

⁸ Ǹsiitɛɛ mìni kìkpaà lɛ, ɓaana ɓɛ̀fèg ɓɛ̀fog, ǹkɔ̀nɛ̀n bog, ɓaana ɓɛ̀ronɛn ɗi ǹkɔ̀nɛ̀n à rìgeni, ɓì ɓa rì nɗem wu nyìinyìg rì nɗem wu sɛɛ̀dɛn mìniìɓɔmiɗ ɓi zi.

⁹ Kɛ̀ ɓi rɔ̀ŋ kiɓe ri kìɓe, nsoò lɛ ɓi pɛɛ̀zi fìsɛm ri fìsɛm, lɔŋ com ki ɓì ghɛɛ̀sɛɛ kìkiì ki ri lɛ ɓi maŋ̀maŋ ɓum, lɛ kìɓan ki Bɛ̀ll à reŋìghà mìni miì kɛɛ̀kìn, lɛ ɓi teɗ mɛ̀wus mɛ ɓɛmààgh.

¹⁰ Ɓisuulɛ ŋwaànɛ a kɔ̀nkɔn lɛ a keesi cɛɓ, à ghɛn mɛ̀ru mɛ kinyàà, à ghɛ̀ɛ̀sɛɛ kìɓèŋi ŋwɔm wii lɛ kɛ̀ɛ kpaakpaa ɓiɓan ɓi ɓeɓtɛn kɛ̀ɛ kì ɓɛ̀pwàà;

¹¹ à ghɛ̀ɛ̀sɛɛ kì lɔ̀ghii jɛ̀m rì kìɓe, kìrɔɔ kɛɛ̀ki à kìkì, à falɛ̀n ɓi rìkaakàà ɗi fyòoog.

¹² Ɓisuulɛ mis mɛ Kan mɛɛ̀ seesee ɓumɓɛ ɓɛ ri lɛ saaɗ, mɛ̀reè mii mɛramɛn rì bɔ̀ŋzɛ̀n yaa, kìɓan kifog, Kan à ti à paàzàg rì ɓumɓɛ ɓɛɛ̀ kìki kiɓe.

¹³ Ghɛn yɛɛ ri min lɛ à tɔɓ mìni di ɓì falɛɛ ɓi rìkì ɗi kirɔɔ rì ìtèɗ?

¹⁴ I ki kpaŋi gi kɔm̀ lɛ ɓi wog ǹtɔɓ ɓisuu saaɗ, di ɓì rì rì ɓɛ̀mààgh; kɛ̀ ɓi risi ɓum nsoò, kɛ̀ ɓi ki ɓùùsɛn;

¹⁵ wɔ̀lɛ kemziinà Kiris ɓi mɛ̀rem min fɛlɛ yɛ̀ɛ Kan wìn. Ɓaana cààmɛ̀n kìcèm ɓɛ̀pègsɛn lɛ ɓi ɓag mum bimiɗ ànɛ à tɔɔgh mìni azi anɛ ɓi dyàɓɛn inɛ ɓì rì rì yɔ̀.

¹⁶ Kìɓan kifog kìina fɔlɔɔ ri ǹɗem wu tɛ̀tɛ̀rɛ̀ɛ̀, rì bɔgsɛ̀n; ǹɗem win wu ɓa wù tɛnɛn ɓi lèg ànɛ lɛ jàŋ inɛ ɓɛɛ̀ tòtog mini kìɓe, ɓumɓɛ ɓɛɛ̀ feefengì syeesyee wìn a rìghɛɓ ɓi Kiris ɓi ɗùm ɓɛɛ wog ǹtoòrìɗ.

¹⁷ Lɛ ki ri kìrɔɔ lɛ mum a wog ǹtɔɓ lɛ a kìki kirɔɔ, di fɔlɔɔ yɛɛ ri rìkɔ̀n ɗi Bɛ̀ll à cee lɛ a wog ǹtɔɓ lɛ a kìki kìɓe.

¹⁸ Ɓisuulɛ Kiris girig à wughà gɛ̀n bog ɓi gɛnicèm ɓisuu ɓiɓe ɓi ɓum, nyi ànɛ à ɓaghà syeesyee à mum, à wu ɓisuu ɓiɓeɓtàg ɓi ɓum lɛ di a kɛǹ ɗì mìni yɛ̀ɛ Bɛ̀ll. Ɓɛ wolà nyi rìwu ɗi ɓi mɛ̀mùù à ghèmɓɛ̀n ɗì ìtèɗ wu Nghay.

¹⁹ Rì Nghay ànɛ̀n innɛ à kɛ̀ngà kɔm̀ kì kakalii Syeesyee à Ɓɔlɛ a mɛ̀ghay mɛ mɛ ri ɓi naà-zày,

²⁰ yɛɛ lɔɔ lɛ mɛ̀ghay mɛ ɓumɓɛ ɓɛ kighà Bɛ̀ll ɓɛ̀lɔg ɓi mɛ̀ru mɛ ajɛ̀m, cààmɛ̀n ki Bɛ̀ll à sììsììrìghà nɗem, à ɓoŋɓòŋ; ɓi mɛ̀ru mɛ Nowe à sosòɓkà kìkɔm; kìkɔm kìn kɛɛ kighà lɛ ɓɔɔ ɓum ɓɛ̀sɛ̀ɛ̀ taàraa ɓɛ ghɛɓkà lɛ mɛ̀nig.

²¹ Mɛ̀nig mɛǹ mɛ ɓaghà kìfèèghrɛnà ki bàɓtis ìnɛ yɛɛ̀ ghɛɛghɛɓsì mìni ɓigomìnɛ, bàɓtis ìnɛ̀n ì yin ɓiì sòòsoo tifin ti ɓi nyoo, kìɓan kifog ì rì rìfalɛ̀n ɗi mum à falɛɛ yɛ̀ɛ Bɛ̀ll rì syeesyee à nɗem. A ghɛɛghɛɓsì mìni lɛ rìghèmɓɛ̀n ɗi Yeesus Kiris à ghèmɓɛ̀ngà,

²² à ɓɔg aɗyoo, à rì ɓi weèlem à Bɛ̀ll; wɔɔ a làlami lɛ rì ɓum ɓɛ titom, rì mɛ̀tèɗ mɛ ɓi ɗyoo mɛ̀cèm.