1 PYƐƐRI 2 - Bafia Nouveau Testament

¹ Càrina min kiɓeɓtàg ki nɗem bee yicèm, rì ɓɛ̀pwàà, rì mɛ̀ghèy, rì m̀mììghrɛ̀n, rì mɛ̀wɔ̀wɔrì,

² ɓaana fɛlɛ yɛ̀ɛ ɓɔn ɓɛ ɓwɛɗ, ɓì keesì milig mɛ ɓi nghay mɛ mɛ ri lɛ syeesyee mɛɛ ri jɛ̀ɛ̀ ì Bɛ̀ll di fɔɔnnɛ ɓi tɔɔ̀, ɓì ki ghɛn cɛɓ,

³ i ɓì mɛ ɓoɓti ki ghɛɛ̀ lɛ Kan à rɔɔtɛɛ, lɔŋ yɛ̀ɛ ki ri kì kànɛn.

Yeesus à rì gɔ̀g ì cem

⁴ Kɛ̀ɛna jàŋbog rì nyi, nyi ànɛ à rì gɔ̀g ì cem inɛ ɓum ɓɛ ɓengà, kìɓan kifog ì ɓa gɔ̀g ìnɛ Bɛ̀ll à ɓɔ̀ngà, yɛ̀ɛ ki rì gìn i com ɓi mis mii,

⁵ fɔɔnnɛ mìni girig, fɛlɛ yɛ̀ɛ gɔ̀g yi yi ri cencem, ɓì rì ɓɛ̀toŋɛn lɛ ɓi ɓa mɛɛ mɛ ɓi Nghay, ɓì ɓa ǹɗaŋ wu ɓɛpìrɛɛtìrɛ̀ ɓɛ ɓɛ ri ɓɛ̀tɛnɛn ɓɛ ɓɛɛ̀ fùufunɛ̀n Bɛ̀ll ɓyom ɓi ɓi Nghay ɓi ɓi ri rɔɔ nyi, lɛ Yeesus Kiris.

⁶ Lɛ ki ri kìkaliyɛn ɓi kaàtà lɛ: Ghɛɛna, ǹnɔ̀ŋzii gɔ̀g ìnɛ ɓi ǹtɔn à mɛɛ a Siyon, ì rì m̀ɓɔ̀nɛn, ì ki ɓa gìn i com, fɔɔnnɛ ŋwaànɛ à rì yɔ̀ ɓiì gherɛɛ, àa wog ɓi ǹtoòrìɗ.

⁷ Ǹnyaasɛ̀n à rì min ɓisu win wu mini ɓɛ ɓì gherɛɛ; wɔ̀lɛ ɓi ɓɛg ànɛ a ɓɛ̀roɓɛ ɓɛ gherɛɛ ɓi, gɔ̀g ìnɛ ɓɛ̀toŋì-kìtoŋ ɓɛ makà yɛ̀ɛ ghalà ǹlem à gɔ̀g ànɛ ɓi ntɔn à mɛɛ, ì ki ɓa gɔ̀g ì fìɓàg, riɓan ɗi ɓum ɓɛɛ̀ kpìkpi miì.

⁸ Ɓɛ ti ɓɛ kpilàg miì lɛ ɓɛ ɓengà kì woògh jɛ̀ɛ̀ ì Bɛ̀ll, fɔlɔɔ nnɛ ki ghɛɛ̀sɛ̀ngà kì ɓaà ɓisu waa.

⁹ Wɔ̀lɛ ɓi ɓɛg wìn, mìnii ri boo ì mum ìnɛ ì rì m̀ɓɔ̀nɛn, ǹɗaŋ wu ɓɛpìrɛɛtìrɛ̀ ɓɛ rifòm, kìlɔ̀ŋ ki ki ri ki Bɛ̀ll, ki ɓumɓɛ Bɛ̀ll à tekà ɓisu wiì lɛ ɓɛɛ laàlàmɓɛ̀n ɓɛ̀gɛn ɓɛ mɛkìkìì ɓɛ roànɛ à reŋìghày mìni lɛ ɓi pɛsɛn yì ɓi birìm, ɓi yu ɓi kìtɛɛtɛn kii ki ki ri kìɓan ki kuughrakɛn;

¹⁰ mìni ɓɛ ɓì ɓaghà ɓi kìlɔ̀ŋ kii abɛ̀y, mìni yɛɛ ti kìlɔ̀ŋ ki Bɛ̀ll ɓigomìnɛ, mìni ɓɛ Bɛ̀ll àa nti kɛ̀ɛ rèsi ǹɗem wu nyìighnyìg a lɔ̀ŋkin abɛ̀y, ɓigomìnɛ, à mɛ wog mini nyìinyìg.

Ɓɛ̀kìristɛ̀n ɓɛ ghɛɛ̀sɛɛ kìghɛɓì yɛ̀ɛ ɓɛ̀kìì-ɓìsay ɓɛ Bɛ̀ll

¹¹ Mìni ɓɛ̀geni ɓɛ̀m ɓɛ nɗem, ǹtɔɔgh mìni ɓi rìɓa ɗi lɛ ɓì rì ɓɛ̀kèn ɓɛ ɓɛ ri ɓi rìghaàgh ɓi ziinɛ lɛ ɓi celi ɓìɓan ɓi ɓi ti ɓi yɛɛ̀yì mɛ̀mùù, ɓìɓan ɓiǹ ɓyɛɛ ri ɓi wɛ̀y ri ǹghay wu mum.

¹² Ɓaana rì ɓìsyeesyee ɓi ɓisyɔ̀ɔ̀ ɓi nyìinyìm à ɓumɓɛ ɓɛ yin ɓɛgherɛ̀n, di fɔlɔɔ nnɛ kɛɛ ɓalag lɛ, jàŋ inɛ ɓɛ mɛɛ̀ ɓùŋ mini a mɓeɓɛn, yɛ̀ɛ ɓɛɛ̀ kali lɛ ɓi kìki ɓiɓeɓtàg ɓi ɓiɓan, i ɓɛ ghɛɛ mɛ̀kìkìì min mɛ syeesyee, ɓɛ kemzì Bɛ̀ll ŋwos anɛ à ɓiì yùu.

¹³ Rèsiina mɛ̀wog ɓi ɓɛg ànɛ a kìlàmì kìcèm ki ɓum ɓɛ foŋi ɓisuu Kan, nsoò rìfòm ɗyɛ yaa rì, ɓì kì ɗyɔ mɛ̀wog lɛ ɗi ri ǹlàmi àgwey,

¹⁴ nsoò ɓɛ̀gɔmìnà ɓɛ yaa rì ɓì wog ɓɔ lɛ ɓɛ ri ɓumɓɛ rìfòm ɗi romi lɛ ɓɛɛ pɔnɔ̀sag ɓumɓɛ ɓɛɛ̀ kìki kiɓe, ɓɛ ki sɛki ɓɛroɓɛ ɓɛɛ̀ kìki kirɔɔ.

¹⁵ Ɓisuulɛ rìkɔ̀n ɗi Bɛ̀ll ɗi ri lɛ, ɓi sim ɓumɓɛ ɓɛ ri ɓìdùŋdùŋ ɓɛ̀ kɛɛ̀ yi com myɔm rì kìrɔɔ ki ɓi kìkì.

¹⁶ Ghɛɓina yɛ̀ɛ ɓumɓɛ ɓɛ ri ɓɛ̀kan, wɔ̀lɛ kɛ̀ ɓi kì lɛ rìkan ɗin ɗyɛɛ ghay kìlàà ki kɛɛ̀ lɔlɔg nɗem win wu rigɛn; ghɛɓina lɔŋ yɛ̀ɛ ɓɛ̀kìì-ɓìsay ɓɛ Bɛ̀ll ɓɛ ghɛɛ̀sɛɛ kì ghɛɓì ɓi rìkan.

¹⁷ Nyaasiina mum bimiɗ, ɓì keesì ɓɛ̀geni ɓin ɓɛ righerɛn, ɓì risì Bɛ̀ll, ɓì nyaasì rìfòm.

¹⁸ Mìni ɓɛ̀kìì-ɓìsay, kìina ɓɛ̀masà ɓin mɛwog rì bɔgsɛ̀n bimiɗ; kɛ̀ ɓi wog lɔŋ lɛ ɓɛ̀roɓɛ ɓɛ rɔɔtɛɛ ǹɗem ɓɛ̀ kɛɛ̀ nyɛn, ɓì ghɛ̀ɛ̀sɛɛ girig kì woògh ɓɛ̀roɓɛ ɓɛ ɓeɓtaagh mɛ̀rem,

¹⁹ ɓisuulɛ ki ri mààgh di mum à cenɛɛ mɛ̀tɔɓ mɛ ɓɛɛ̀ kìki nyi ɓi mɛ̀ɓèe lɛ a ki Bɛ̀ll mɛ̀wog.

²⁰ Lɛ rìkem ɗidɛŋ ɗi yin ɓisuu ŋwaànɛ à ti à cenàg mɛ̀ɓìì mɛ ɓi kìɓe ki nyi yɛɛ kiì. Wɔ̀lɛ i ɓì cenɛɛ rìkɛŋ di ɓi kìi kirɔɔ, fɔlɔɔ a rì mààgh ɓi mis mɛ Bɛ̀ll.

²¹ Lɛ rìɓa ɗìn ɗyɛɛ̀ɗi Bɛ̀ll à reŋìghà mìni miì ɓisuulɛ Kiris girig à wokà rìkɛŋ ɓisu win, à ki càɗ mini kìrèmzɛnà ki lɛ ɓi nɔɔ̀ti ɓìɓɔ̀ɓ ɓii.

²² Nyi ànɛ à kìghà ɓi kiɓe, kɛ̀ɛ ki kpaa kiɓan ki pwàà nsoò ŋwos bog;

²³ nyi ànɛ à ɓaghà lɛ, ɓɛ soo sɛmi nyi, kɛ̀ɛ pɛ̀ɛ̀zi mum kìsɛmì, àa soo wowòg rìkɛŋ kɛɛ̀ tam mum, kìɓan kifog, à fa ɓìɓan ɓìcèm rì Bɛ̀ll ànɛ à ti à yɔ̀mgì ɓum lɛ saaɗ;

²⁴ nyi ànɛ à tɛ̀kà ɓìɓe ɓis ɓi nyoo yìì ɓi kìte aɗyoo lɛ di kɛɛ ɓa lɛ, i tì mɛ wu ɓi san ànɛ a ɓìɓe ɓis, tì ghɛɓ cɛɓ ki ɓumɓɛ ɓɛ ri lɛ saaɗ. Mɛ̀ɓìì mii mɛɛ kighà lɛ ti wɔǹ.

²⁵ Ɓisuulɛ ɓì ɓaghà fɛlɛ yɛ̀ɛ jɔ̀ɔ̀ yi yɛɛ dèŋdèŋ kɛ̀ɛ̀ m̀ɓèŋì, wɔ̀lɛ ɓigomìnɛ, ɓì mɛ sugti yɛ̀ɛ mɓèŋì-jɔ̀ɔ̀ ànɛ a ɓèŋɓeŋ mɛghay min.