Bìoball air-loidhne

1 PYƐƐRI 1 - Bafia Nouveau Testament

Pyɛɛri à tògsii ɓumɓɛ à kàni

¹ Mɛ̀ Pyɛɛri ànɛ ǹɗì ǹkɛ̀nì-fìtom a Yeesus Kiris, ǹkànì ɓumɓɛ Bɛ̀ll à ɓɔ̀ngà, ɓɛ ɓɛ ri a gwèɗ, ɓɔ ɓɛ̀sààtakɛn ɓi ɓìlànà ɓi zi ɓi lɛ rì Pɔŋ, rì Galasi, rì Kapados, rì Azii, rì Bitinii.

² Ɓì ɓaghà ɓɛ̀ɓɔ̀nɛn lɔŋ yɛ̀ɛ Bɛ̀ll Seŋi a lokà kìwòŋzii ɓiɓan, fɔɔnnɛ ɓì ti ɓɛ̀tɛnɛ̀n lɛ Nghay wìì, lɛ ɓi ɓa rì mɛ̀wog ɓi ɓɛg ànɛ yɛ̀ɛ Yeesus Kiris ɓì ki ɓa ɓɛtɛɛ̀ziyɛn ɓi bwaɓ yii yi yi kpagà. Geesɛ̀n, rì fyòoog ɓyɛɛ teghɛn a lɔ̀ŋkin lɛɛ̀gwey.

Dyàɓɛn inɛ ì sasaghii ɓi gòri ìnɛ ɓi Yeesus Kiris

³ Rìkem ɗyɛɛ ɓa rì Bɛ̀ll à Seŋi Kan wìs Yeesus Kiris; ɓi coo kipuɓì ǹɗem kii, à faghà ɓìsi cɛɓ ki nyɔn yɛ̀ɛ à ghèmzìghày Yeesus Kiris a ɓìloŋ; fɔlɔɔ a fa ɓìsi dyàɓɛn inɛ ì rì cem rì ǹtyweeyi,

⁴ ɓisuu mɛwus mɛ mɛ yin lɛ mɛ ɓwɛy, mɛ̀ kɛɛ̀ teɗ tifin nsoò lɛ mɛ womdàg; mɛ̀wus mɛǹ mɛɛ ri mɛ̀ nyamɛn aɗyoo ɓisu wìn,

⁵ mìni ɓɛ ìtèɗ wu Bɛ̀ll wɛɛ̀ ɓèŋɓèŋ lɛ rìgherɛ̀n, à kpaŋ yɛ̀ɛ gòri ìnɛ ì ti jàŋbog lɛ yɛ̀ɛ resɛn ɓi mɛ̀ru mɛ siitòn ì ɓiì rèsɛɛ.

⁶ Sàmsamina ɓisuu kiɓan kiǹ, nsoò yɛ̀ɛ ki ghɛɛ̀sɛɛ lɛ ɓi ɓa rì ǹɗemi-kɛŋɛn ɓi maa cààmɛ̀n lɛ mɛ̀tɔɓ mɛ ɓi taatanɛ̀n rì mɔ ɓigomìnɛ mɛ̀kuu mɛ̀kuu.

⁷ Mɛ̀tɔɓ mɛ̀n mɛɛ̀ fèeghfeèghrɛ̀n rìgherɛ̀n ɗin ɗi ɗi ri gìn i com ìnɛ ì cee gol kɛ̀ɛ̀ vèg; gol ì rì com ki ki ri lɛ ki ɗyoŋ, nsoò fɔlɔɔ ɓɛ ti ɓɛ fogì gol ɓi ɗuu lɛ ɓɛɛ ghɛǹ yɛ̀ɛ ì rì; fɔlɔɔ nnɛ ìtèɗ wu righerɛ̀n ɗin ɗi ɓɛɛ̀ fèefeèghrɛ̀n wu ɓiì ɓaà kìɓan ki mɛsɛɛ̀ghsɛɛgh, ɗì rìkem, ɗì ǹnyaasɛ̀n ɓisu win ŋwos anɛ Yeesus Kiris, à ɓiì rèsɛɛ.

⁸ Nyi ànɛ ɓì kesii nsoò yɛ̀ɛ ɓì ka ghɛngà ɓi nyi; ɓi ki gherɛɛ nyi kɔlɛ ɓì ghɛɛ ɓi nyi ɓigominɛ kìɓan kiǹ kɛɛ̀ki ɓi sànsam ri coo kinyàà ki keŋkemɛn ki mum à yin lɛ à yi rìkpaa,

⁹ ɓisuulɛ mɛ̀raà mɛ ɓi rìgherɛ̀n ɗin mɛ ri ɓiì ɓaà gòri ì ɓyɛɓ ɓin, inɛ ɓì ri teɗ.

¹⁰ Ɓɛ̀kpaŋzì-ɓìɓan ɓɛ ɓɛ ɓugà kìɓan ki geesɛ̀n ìnɛ ì ɓaghà m̀pègsɛn ɓisu win, ɓɛ kaaghà lɛ ɓɛɛ yi, ɓɛ ki tim kiɓan ki gòri ìnɛ̀n.

¹¹ Ɓɛ siìrɛ̀ngà lɛ ɓɛɛ yi lɛ rì zìŋɛn, rì ɓìɓan ɓi ɓi koŋkomi ɓìɓan ɓi Ǹghay à Kiris ànɛ à ɓaghà ɓi ɓɔ à rerèɓkà ɓɔ abɛ̀y; à rèsìghà mɛ̀tɔɓ mɛ Kiris à ghɛ̀ɛ̀sɛ̀ngà kìwoògh, rì rìkem ɗi ɗi ghɛɛ̀sɛ̀ngà kì ɓɔ̀ɓiì mɛ̀tɔɓ mɛ̀n.

¹² Bɛ̀ll à rèsìghà ɓɔ lɛ kìɓan ki ɓɛ kpaakpààghà kiǹ ki ɓaghà ɓi ɓisu waa wu ɓɔmiɗ, ki ɓaghà lɔŋ ɓisu win, rì tì lɛ ɓɔɔ ɓaghà lɔŋ ɓɛ̀kìì-ɓìsay ɓɛ ɓi ɓìɓan ɓiǹ. Ɓigomìnɛ, ɓumɓɛ ɓɛ kpaaghà mìni Syeesyee à Ɓɔlɛ rì Kìtɛntɛ̀ɛ̀n ki Nghay ki ɓɛ romgày aɗyoo, ɓɛ wogsìghà mìni ɓìɓan ɓiǹ, nsoò ɓum ɓɛ titom ɓɔmiɗ, ɓɛ ri rì zày ìnɛ lɛ di ɓaa ghɛɛ ɓyɔ̀.

Deɓ yi yi ɓuŋi kìɓan ki cɛɓ ki tɛnɛn ɗì rìɓa ɗi cem, rì ǹkɔ̀nɛ̀n

¹³ Kìɓan kiǹ kɛɛ̀ki, ɓaana rì mɛ̀rem mɛ mɛ ri mɛ̀ɓùŋɛn ɓi kìsay, ɓì kɔ̀rì ɗyomzɛ̀n, ɓì foŋ dyàɓɛn yiǹ bimiɗ ɓi rìfa ɗi ɓɛ ri mìni ɓiì faà ɓi ŋwos anɛ Yeesus Kiris à ɓiì rèsɛɛ.

¹⁴ Ɓaana ɓɔn ɓɛ mɛwog, kɛ̀ ɓi nɔ̀ɔ̀ti ti ɓìɓeɓtàg ɓi ɓiɓan ɓi ɓi nti ɓi kɔngì mìni, ɓyɛ ɓi ɓì kìkìghà abɛ̀y di ɓì kaka ɓi rìɗim.

¹⁵ Wɔ̀lɛ fɛlɛ yɛ̀ɛ Bɛ̀ll ànɛ à reŋìghà mìni àrì ǹtɛnɛn mìniìrig ɓaana ɓɛ̀tɛnɛn ɓi rìkɔ̀kɔ̀rì ɗin ɗicèm,

¹⁶ lɛ ki ri kìkànɛn lɛ: Ɓì ghɛ̀ɛ̀sɛɛ kì ɓaà ɓɛ̀tɛnɛn ɓisuulɛ mɛ̀ ǹɗì ǹtɛnɛn.

¹⁷ I roànɛ à ti à yɔ̀mgì mum bimiɗ lɔŋ yɛ̀ɛ mɛ̀kìkìì mii mɛ ri kɛ̀ɛ̀ ǹlànag, innɛ ɓì ti ɓì regì ɓi bɔ̀ŋzɛ̀n yin lɛ Seŋi wìn, rèsiina lɛ ɓì risii nyi ɓi gàɓ ì cààmɛ̀n ìnɛ ɓi ghaaghagsì ɓi ziinɛ,

¹⁸ rì rìyitì ɗi lɛ ɓɛ kweɗkà ɓi mini ɓi kìɓeɓtàg kin ki cɛɓ ki ɓì tekà rì ɓɛ̀seŋi ɓin, rì ɓyom ɓi ɓi ri lɛ ɓi ɗyoŋ fɛlɛ yɛ̀ɛ mɔ̀ɔ̀ni nsoò lɛ gol,

¹⁹ lɔŋ rì bwaɓ yi Kiris yi yi ri gìn i com innɛ ɓɛ kweɗkà mìni. Kiris yɛɛ ri fɛlɛ yɛ̀ɛ man à jɔ̀ɔ̀ ànɛ à rì kɛ̀ɛ̀ fìsɛm, kɛ̀ɛ̀ kìpɛ̀mì;

²⁰ nyi nnɛ ɓɛ ɓɔngà abɛ̀y di zi i ka kilɛn ɓi, à ki rèsɛn ɓisu win ɓi ɓyààmɛ̀n ɓi siitòn ɓi.

²¹ Lɛ nyi, ɓì gherɛɛ Bɛ̀ll ànɛ à ghèmzìghày nyi a ɓìloŋ, à ki fa nyi rìkem, fɔlɔɔ nnɛ ǹtyweeyi wiǹ rì dyàɓɛn yiǹ ɓi ri yɛ̀ɛ Bɛ̀ll.

²² Yɛ̀ɛ ɓyàa lègsi kìpuɓsii mɛghay min ri mɛ̀wog mɛ ɓì rì rì mɔ ɓi ɓɛg ànɛ a saaɗ, lɛ ɓi ɓa rì nkɔ̀nɛ̀n à rìgeni ànɛ à rì lɛ sɛɛghisɛɛghi; kɔ̀nɛɛna rì ìtèɗ, rì nɗem win wucèm.

²³ Mìni ɓɛ ɓì tekà ɓi cɛɓ ki nyɔn ɓi boo ìnɛ ì rì lɛ ì ɓwɛ̀y, kìɓan kifog ìnɛ ì yin lɛ i ɓwɛ̀y ɓì tekà lɔŋ kɔ rì jɛ̀ɛ̀ ì Bɛ̀ll ìnɛ ì rì cencem, ì ɓa tì fìɗyàɓ fikɔ̀ɔ̀;

²⁴ ɓisuulɛ mum ǹcèm à rì yɛ̀ɛ caaɓi, rìkem ɗii ɗicèm ɗi ɓa yɛ̀ɛ kìsàmà ki caaɓi; caaɓi ki ti ki yɔɔ̀ghì, kìsàmà ki raà,

²⁵ kìɓan kifog jɛ̀ɛ̀ ì Bɛ̀ll ì rì lɔŋ fiɗyàɓ fikɔ̀ɔ̀. Jɛ̀ɛ̀ ìnɛn ì rì jɛ̀ɛ̀ ìnɛ Syeesyee à Ɓɔlɛ à wogsìghà mìni.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan