Bìoball air-loidhne

1 KƆ̀RƐ̀ŊTYƐŊ 9 - Bafia Nouveau Testament

Pol à ɓèni ɓìɓan ɓidɛŋ ɓi à ɓaghà lɛ à tɔg, ɓi ɗii ɗi lɛ ǹkɛ̀nì-fìtom

¹ Mɛ̀ɛ nfèki nya lɛ ǹɗì rì ìtèɗ wulɛ ǹkì com ki ǹkɔ̀ni? Nfèki nya lɛ ǹɗì ǹkɛ̀nì-fìtom a Yeesus? Mɛ̀ɛ nti nya lɛ ǹghɛngà Yeesus Kan wìs? Àa mìni yɛɛ ri kìsay kɛm̀ ɓi Kan ɓi ɗùm?

² I ɓum ɓɛdɛŋ ɓɛ ɓeni kì gherɛɛ lɛ ǹɗì ǹkɛ̀nì-fìtom a Yeesus, nsoò mìni, mìnii ghɛɛ̀sɛɛ kì gherɛɛ lɛ ǹɗì ǹkɛ̀nì-fìtom, ɓisuulɛ mìni yɛɛ ri kìrèmzɛnà ki ɓi rìɓa ɗi ǹɗì ǹkɛ̀nì-fìtom, ɓi cɛɓ ki ɓi ghɛghɛɓ ɓi Kan ɓi ɗùm.

³ Com ki ǹti nkpaaghì ɓum ɓɛ ɓɛ tɔɔkɛɛ mɛ̀ kɛɛ̀ki.

⁴ Tì yin nya ɗì ìtèɗ wulɛ tì ɗi, tì nɔ di ɓɛ faa ɓìsi ɓi kìsay ki ti kìkì?

⁵ Tì yin nya rì ìtèɗ wulɛ ti ki yɛ̀ɛ ɓɛ̀kɛ̀nì-fìtom ɓɛmbog, rì ɓɛ̀geni ɓɛ Kan, rì Sefas ɓɛ ti ɓɛ kilàg lɛ ti kɛngi mɛ̀kɛ̀ɛ̀ mis nɗaŋ ri giɓ wis ànɛ à rì kìristɛ̀n?

⁶ Gìn lɔŋ rì mɛ̀ rì Ɓarinaɓas ɓìsi cɛ̀ncis yɛɛ ghɛɛ̀sɛɛ kìsaayii lɛ ti tanɛn rì ɓìɗilàg!

⁷ Ŋwaàbe yɛɛ ka kìghà kìsay ki sujàà, à peèpèèrɛ̀n nyimiɗ? Nsoò lɛ ghɛn yɛɛ mɛ salà dɛm, à rɔ̀ɓ kɛ̀ɛ ɗi ɓiɗùn ɓi ɓi dɛm inɛ̀n? Gìn ghɛn yɛɛ mɛ ɓègà ɓìtuwe à rɔ̀ɓ kɛ̀ɛ ɗi milig mɛ à pisii ɓi ɓìtuwe ɓiǹ?

⁸ Ɓìɓan ɓi ǹteri dàɗkì ɓiǹ miì ɓi yin ɓiì ghɛɛghɛnɛ̀n lɔŋ lɛ ɓi cɛɓ ki ɓum kɔrìkɔ, nsoò ɓìdɔ̀gsɛna ɓyɛɛ̀ rèresi girig fɔ̀lɔ̀ɔ̀.

⁹ Lɛ ki ri kìkànɛn ɓi ɓìdɔ̀gsɛna ɓi Moyis lɛ: Ù ghɛ̀ɛ̀sɛɛ ɓi ki kàŋi sanìnya ŋwɔm ɓi cààmɛ̀n ki a nyɔ̀ɔ̀nyɔɔ gèŋ. Ɓi fèki nya lɛ nɗem wu ri lɛ wu cɛɛ̀cɛ̀ɛ̀rɛ̀n Bɛ̀ll rì sanìnya?

¹⁰ Bì yii ɓi lɛ ɓisu wis nnɛ à kpaa kìɓan kiǹ? Ki ri lɔŋ fɔlɔɔ, lɛ ɓisu wis nnɛ ɓɛ kangà lɛ: Ŋwaànɛ a kùukutɛ̀n dɛm rì roànɛ a ɓoɓog gèŋ, ɓɛ ghɛɛ̀sɛɛ kì kìkii kisay kiǹ di ɓɛɛ̀ mìnmin tityɛɛ̀ lɛ ɓɛ ri ɓiì ɓaà rì gàɓ, ɓi ɓìɗùn ɓi ɓi kìsay kaa.

¹¹ I ɓìsii ɓɛlà ɓìrɔɔ ɓi ɓi nghay ɓi mìni, nni ki ɓeɓtɛɛ nya lɛ ti ɓumi gàɓ ì ɓìɗilàg ɓi zɛy a lɔ̀ŋkin?

¹² I ɓum ɓɛdɛŋ ɓɛ ri rì ìtèɗ wulɛ ɓɛ ɓoŋɓòŋ ɓìrɔɔ ɓidɛŋ a lɔ̀ŋkin, ɓìsi yaa ghɛ̀ɛ̀sɛɛ lɛ ti ɓiìsɛn kìkìi fɔlɔɔ, kìɓan kifog, ɓìsii tɔkà ɓi kiɓan ki tì ɓaghà rì ìtèɗ wulɛ ti tɔg; ɓìsiì ceecenɛ̀n lɔŋ mɛtɔɓ mɛ̀cèm lɛ tyɛ̀ ki naŋ kiɓan kidɛŋ ki ki ri lɛ ki nyug Syeesyee à Ɓɔlɛ à Kiris.

¹³ Ɓì yii ɓi lɛ naà-Bɛ̀ll yɛ̀ɛ ti ì mɛnàg ɓumɓɛ ɓɛɛ̀ kìki kisay ɓi naa ì Bɛ̀ll, rì tì lɛ, ɓumɓɛ ɓɛ ti ɓɛ tɔngì ɓyom ɓi ɓɛ̀ro ɓɛmbog ɓɛ yuu kì ɓɔgsii Bɛ̀ll rì ɓyɔ ɓi jàŋ inɛ ɓɛɛ̀ tɔ̀ngi ɓyom ɓɛ ti ɓɛ ɓalàg rì gàɓ ɓi ɓyom ɓìn?

¹⁴ Fɔlɔɔ nnɛ Kan à rèɓsìghà girig ɓumɓɛ ɓɛɛ̀ ghaaghagsì Syeesyee à Ɓɔlɛ lɛ ɓɛ ghɛɛ̀sɛɛ kì ghɛɓì ɓi Syeesyee à Ɓɔlɛ ànɛ̀n.

¹⁵ Ɓi ɓɛg wɛ̀m, nsoò ŋwos bog, ǹnɔ̀ɔ̀tìghà ɓi ɓirɔɔ ɓi ǹghɛ̀ɛ̀sɛ̀ngà ɓiǹ lɛ ntɔg nsoò gɛ̀nbog nni ǹki kàniì ɓi mìni kìɓan kiǹ lɛ ntɔg ɓyom ɓìn ɓisuulɛ, ǹɗì lɛ ǹgherɛ̀n lɛ mɓaŋ kì wii, à cee lɛ ŋwaa ɓatɛn mɛ̀ kìɓan ki kɛɛ̀ fafa mɛ rìkem kìn ɓi nɗem.

¹⁶ Ɓisuulɛ, rìghagsì ɗi Syeesyee à Ɓɔlɛ ɗi yin mɛ kìɓan ki teterɛn rikem, ɗi ri mɛ̀ syeesyee à kìɓan anɛ à ghɛ̀ɛ̀sɛɛ kì kìlɛɛ, ànɛ ǹɗì ǹtiniyɛn lɛ nki. Nyìinyìg rì mɛ̀ di ǹghagsii ɓi Syeesyee à Ɓɔlɛ.

¹⁷ I mɛ̀ɛmiɗ yɛɛ ɓekà lɛ nki kɔ di ǹɗì miì rì mɛ̀lèɓ, wɔ̀lɛ ǹɗì ǹtiniyɛn lɛ nki kɔ ɓi kàŋɓɛn lɛ ki ri mɛ̀ ǹtɛ̀g wu ɓɛ tɛgsii mɛ̀.

¹⁸ Nni mɛ̀lèɓ mɛm̀ mɛ ri min lɛ cɛ? Mɛ ri kìnyàà ki lɛ nghaàghàgsì Syeesyee à Ɓɔlɛ kɛ̀ɛ̀ mɛ̀lèɓ, kɛ nki tɔg com rì ɓìrɔɔ ɓi Syeesyee à Ɓɔlɛ nyimiɗ a faa mɛ̀ ìtèɗ wulɛ mɓa rì ɓyɔ.

¹⁹ Ǹ-yin ǹkpàn a mum nsoò bog, kìɓan kifog, ǹghaasìghà mɛ̀ɛmiɗ ǹkpàn a ɓum ɓɛ̀cèm, lɛ di nsyoŋ kìgwey ki ɓi ɓɔ.

²⁰ M̀ɓaghà lɛ, cààmɛ̀n ki ǹɗì rì Ɓɛ̀yudɛ̀n, ǹghɛɓ yɛ̀ɛ muu Ɓɛ̀yudɛ̀n lɛ di nsyoŋ ɓɔ; cààmɛ̀n ki ǹɗì rì ɓumɓɛ ɓìdɔ̀gsɛna ɓi lamii, m̀ɓa yɛ̀ɛ mɛ̀ ǹɗì girig ŋwaànɛ ɓìdɔ̀gsɛna ɓi lamii - kɔm̀ lɛ mɛ̀ɛmiɗ ǹ-yin ɓi rìlàmì ɗi ɓidɔ̀gsɛna azi, ǹki kìki fɔlɔɔ lɛ di nsyoŋ ɓumɓɛ ɓìdɔ̀gsɛna ɓi lamii.

²¹ Cààmɛ̀n ki ǹɗì rì ɓumɓɛ ɓɛ ri kɛ̀ɛ̀ ɓìdɔ̀gsɛna ǹghɛɓ rì ɓɔ yɛ̀ɛ ŋwaànɛ à rì kɛ̀ɛ̀ ɓìdɔ̀gsɛna lɛ di nsyoŋ ɓɔ; fɔlɔɔ kɛ̀ɛ ki rèsi lɛ ǹɗì kɛ̀ɛ̀ ɓìdɔ̀gsɛna ɓi Bɛ̀ll ɓisuulɛ mɓèŋɓeŋ ɓidɔ̀gsɛna ɓi Kiris.

²² Mɛ̀ kɔ̀kɔg ɓi nyìinyìm à ɓumɓɛ ɓɛ ri kɛ̀ɛ̀ ìtèɗ lɛ di nsyoŋ ɓɔ, fɔɔnnɛ ǹghaasìghà mɛ̀ɛmiɗ rikuu ɗi com ɗìcèm ɓi ɓɛg ànɛ a ɓum ɓɛ̀cèm, lɛ nsoò kaa ɓaa la, nsyoŋ gàɓ ìdɛŋ ìnɛ ɓi ɓɔ.

²³ Nkìki ɓìɓan ɓiǹ ɓìcèm ɓisuu Syeesyee à Ɓɔlɛ, lɛ di mɓa miì rì gàɓ.

²⁴ Ɓì yii lɛ ɓumɓɛ ɓɛ ri ɓi nlog à mɛ̀ree ɓi nlɛmɓog wu ticàɓ ɓɛɛ̀ ghɛghɛŋi ɓɛsɛ̀ɛ̀ ɓɛ̀cèm wɔ̀lɛ lɔŋ mum bog yɛɛ ti à kpagì, beèbɛ̀y à teɗ mɛ̀raà mɛ ɓi nlog ànɛ̀n? Nni ghɛŋiina lèg ànɛ lɛ ɓi teɗ mɛ̀raà mɛ ɓi nlog.

²⁵ Ɓɛ̀ɗùù zàà yi ran ɓɛ ti ɓɛ ɓalàg rì ɓìtèetèɗ ɓi ɓìcèlì, ɓɛ kikì fɔlɔɔ lɛ di ɓɛɛ fɔǹ mɛ̀raà mɛ mɛ ri lɛ mɛ ɗyoŋ wɔ̀lɛ ɓìsiì ɗùùɗuu ɓi mɛ̀raà mɛ mɛ ri fìɗyàɓ fikɔ̀ɔ̀.

²⁶ Kìɓan kiǹ kɛɛ̀ki nghɛghɛŋi mɛ̀ree, kɛ̀ɛ nki ghɛghɛŋi lɛ duri yàa tani, ǹki ɓooghɓoòghrɛ̀n ɓìkam, nni ǹki yin ɓyɔ ɓiì fɛfɛɓi nfɛfɛɓɛn lɛ duri yàa tani.

²⁷ Nkìki kɔm̀ nyoo yɛ̀m rìgɛn, ǹghaasì yɔ̀ ǹkpàn lɛ kɛ̀ kɛɛ̀ ɓaa gɛ lɛ mɛ̀ɛmiɗ anɛ ǹkpaaghà ɓum ɓɛdɛŋ Syeesyee à Ɓɔlɛ, mɛ̀ yɛɛ ɓa ǹcàrɛn ɓi ɗyɔ̀m.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan