1 KƆ̀RƐ̀ŊTYƐŊ 7 - Bafia Nouveau Testament

Kìɓan ki riwɛy

¹ Tì cee min ɓi ɓìɓan ɓi ɓìi ntɔghiì mɛ̀ ɓi kaàtà wìn; ki ri kìrɔɔ lɛ, mum a kɔri kɛ̀ɛ wɛy giɓ.

² Kìɓan kifog, ɓi ɗi lɛ cɛɓ ki tisɔ̀mɔ̀g kɛ̀ kɛɛ̀ sàà, baŋì bimiɗ ì ghɛ̀ɛ̀sɛɛ kìɓaà rì giɓ wiì à nyimìɗ, giɓ bimiɗ à ɓa rì yii wiì.

³ Baŋì ì ghɛ̀ɛ̀sɛɛ kì roòzii ɓiɓan ɓìcèm ɓi à ghɛ̀ɛ̀sɛɛ kì kìi giɓ wiì, giɓ a roòzì girig ɓìɓan ɓi à ghɛ̀ɛ̀sɛɛ kì kìi yii.

⁴ Giɓ a làmii ɓi nyoo yìì nyimìɗ, lɔŋ yii yɛɛ lamii yɔ̀, fɔlɔɔ nnɛ baŋì ì làmii ɓi girig nyoo yìì nyimìɗ, lɔŋ giy yɛɛ lamii yɔ̀.

⁵ Ki ghɛɛ̀sɛɛ ɓi lɛ bog a celi roàmbog di ki yin lɛ ɓì ka wooghrɛɛ jɛ̀ɛ̀ lɛ ɓi celɛn ɓi maa cààmɛ̀n lɛ ɓi falɛn ɓi bɔ̀ŋzɛ̀n, ajɛ̀m ìnɛn, ɓì ghɛ̀ɛ̀sɛɛ kì sugtii ki ràrɛɛ, lɛ Satàn kɛ̀ɛ ɓa lɛ à ghɛn kìrɔŋiɗ ki lɛ a feèghrɛn mìni ɓisuulɛ mɛ̀rem min mɛ ɓanɛɛ ɓi.

⁶ Kìɓan ki ǹkpaa kìn, ki yin kiɓan ki ki ghɛɛ̀sɛɛ kìɓaà rì ǹkàŋɗɛ̀n, ki ri lɔŋ kiɓan ki ɓì rì lɛ ɓì kìlàg.

⁷ Ɓi mɛ̀, ǹɗì lɛ ǹkɔ̀n lɛ di ɓum ɓɛ̀cèm ɓaa ɓaa yɛ̀ɛ mɛ̀; nni wɔ̀lɛ mum ncèm à rì rì kìɓan ki Bɛ̀ll à faghà nyi lɛ a kilàg; à fa roànɛ rìkuu ɗi kiɓan ɗi, à fa roàmbog rìkuu ɗi kiɓan ɗidɛŋ.

⁸ Mɛ̀ ǹkpaa ɓɛ̀kwɛ̀y rì mɛ̀kpɔɓ mɛ ɓɛ̀yiɓ lɛ, ki ri kìrɔɔ lɛ ɓɛɛ kɔri fɛlɛ yɛ̀ɛ mɛ̀.

⁹ Kìɓan kifog i mɛ̀rem maa mɛ ɓanɛɛ ɓi, ɓɛ ghɛɛ̀sɛɛ kì wɔlɛɛ, lɛ ki pɔɔzii kìɓaà kìrɔɔ lɛ mum a wɔlɛn, à cee lɛ a wuwu dudug.

¹⁰ Ɓi ɓɛ̀roɓɛ ɓɛ ri ɓɛ̀wɔlɛn, ǹfaa ɓɔ ǹsiŋdɛn - nni àa mɛ̀ yɛɛ ki faa ǹsiŋdɛn wuncèm, lɔŋ Kan yɛɛ faa: Giɓ kɛ̀ɛ ghasɛn ri yii wiì;

¹¹ i à ki ghasɛɛ rì nyi, à kɔ̀rì kɛ̀ɛ kɛ̀ɛ̀di riwɛy, nsoò lɛ ɓɛ pegsɛ̀n kìɓan ki ki ghasìghà nyi rì yii, fɔlɔɔ nnɛ baŋì ì ghɛ̀ɛ̀sɛɛ ɓi ki nàɓi giy.

¹² Com ki mɛ̀ ǹkpaa ɓum ɓɛmbog ki yin lɛ Kan yɛɛ kalii, lɔŋ mɛ̀ɛmiɗ yɛɛ kpaa, ki ri lɛ: I kìristɛ̀n à rì rì giɓ anɛ à yin ngherɛ̀n, nni giɓ anɛ̀n à gherɛɛ lɛ ɓɛɛ kɛǹ asu ɓɛ ghɛghɛ̀ɓ ǹɗaŋ, nyii ghɛɛ̀sɛɛ ɓi ki nàɓi giɓ anɛ̀n.

¹³ I kìristɛ̀n à giɓ a rì rì yii ànɛ à yin ngherɛ̀n, yii ànɛ̀n à ki gherɛn lɛ ɓɛɛ kɛǹ asu ɓɛ ghɛghɛ̀ɓ naa bog, giɓ anɛ̀n à ghɛ̀ɛ̀sɛɛ ɓi ki ɓèni yii ànɛ̀n.

¹⁴ Ɓisuulɛ baŋì ìnɛ ì yin ngherɛ̀n ì rì ǹtɛnɛn lɛ giɓ wiì, giɓ anɛ à yin ngherɛ̀n à rì ntɛnɛn lɛ yii wiì à rì kìristɛ̀n; kɛ̀ɛ̀ fɔlɔɔ di ɓɔn ɓin ɓɛ ri lɛ ɓɛ ɓa yɛ̀ɛ ɓɔn ɓɛ ɓumɓɛ ɓɛ gherɛɛ ɓi Bɛ̀ll, kɔm̀ lɛ ɓɛ ri ɓɛ̀tɛnɛn ɓi syeesyee à rìkalì.

¹⁵ I ŋwaànɛ à yin ngherɛ̀n à kɔ̀ni lɛ a ghasɛn rì ŋwaànɛ ɓɛ ri ɓi rìwɛy ɗì nyi, ɓɛ caɗ nyi à ghasɛ̀n; i ki ghɛnɛɛ fɔlɔɔ, ǹgherɛ̀n à baŋì nsoò lɛ à giɓ, à yiìdi nkàŋɛn ɓi rìwɛy ɗìn; lɛ Bɛ̀ll à reŋìghà ɓìsi lɛ ti ghɛɓ ɓi fyòoog ɓi ɗùm.

¹⁶ Wɔ̀ kìristɛ̀n a giɓ ù yii la nkòo wɔ̀ yɛɛ ghɛɓsii gɛ yii wɔɔ, nsoò lɛ wɔ̀ baŋì ìnɛ ì rì kìristɛ̀n, ù yii la nkòo wɔ̀ yɛɛ ghɛɓsii gɛ giɓ wɔɔ̀?

¹⁷ Kìɓan kifog mum ǹcèm a ghɛɓ lɔŋ ɓi nɗɛli wu Bɛ̀ll à fogà nyi miì yɛ̀ɛ à reŋìghà nyi; ǹsiŋdɛn wu nfafa ɓi ɓìseŋi ɓi Kiris ɓìcèm wɛɛ ri lɔɔ.

¹⁸ I mum à ɓaghà ǹkɛ̀rɛn yɛ̀ɛ Bɛ̀ll à reŋìghà nyi, à ghɛ̀ɛ̀sɛɛ lɔŋ ki rɔ̀ɓi ɓi kɛ̀rɛ̀n wìì; i ŋwaà ɓaghà kɛ̀ɛ̀ kì kɛ̀rɛɛ yɛ̀ɛ Bɛ̀ll à reŋìghà nyi, à ghɛ̀ɛ̀sɛɛ ɓi ki kɛ̀rɛɛ.

¹⁹ Kìɓan ki lɛ ŋwaà rì ǹkɛ̀rɛn nsoò lɛ à yin ǹkɛ̀rɛn, ki ghɛɓsii ɓi com, lɔŋ rìɓèŋ ɗi ɓidɔ̀gsɛna ɓi Bɛ̀ll ɗyɛɛ ghɛɓsii.

²⁰ Fɔɔnnɛ mum ǹcèm à ghɛ̀ɛ̀sɛɛ kì rɔ̀ɓi ɓi nɗɛli wu à ɓaghà miì ɓi cààmɛ̀n ki Bɛ̀ll à reŋìghà nyi.

²¹ I Bɛ̀ll à reŋìghà wɔ̀ di ù rì ǹkpàn, ǹɗem wɛ̀ kɛɛ̀ cɛɛcɛɛ̀rɛ̀n wɔ̀ rì rìɓa ɗìn, wɔ̀lɛ i ù rì rì bee inɛ lɛ u pɛsɛn ɓi rìkpàn, ù pɛ̀sɛ̀n, kɔ̀ɔ kì wàŋ.

²² Ɓisuulɛ ǹkpàn anɛ Kan à mɛ reŋì à yiìdi ɓi rìkpàn, à ti ŋwaà zɛy ànɛ à wooghrɛɛ rì Kan, fɔlɔɔ nnɛ ŋwaànɛ Kan à reŋìghà di à yin ǹkpàn, à ti ǹkpàn a Kiris.

²³ Dùne ì gòri yìn ì rì ǹkɛŋɛn fɔɔnnɛ ɓì ghɛ̀ɛ̀sɛɛ ɓi ki ɓaà ɓɛ̀kpàn ɓɛ ɓum.

²⁴ Ɓɔɔsoŋ̀, ki ghɛɛ̀sɛɛ lɛ mum ǹcèm a ghɛɓ lɔŋ ɓi mis mɛ Bɛ̀ll ɓi nɗɛli wu à ɓaghà miì ɓi cààmɛ̀n ki yɛ̀ɛ Bɛ̀ll à reŋìghà nyi.

Kìɓan ki ɓɛ̀kwɛ̀y rì mɛ̀kpɔɓ

²⁵ Ɓi san ànɛ a ɓɔɓti ɓɛ ɓɛ ka wɛɛyi ɓi, ǹ-yin ɗi bimiɗ à ǹsiŋdɛn ànɛ à rìì yɛ̀ɛ Kan, kìɓan kifog, ɓi rìɓa ɗi ǹɗì mum ànɛ kìrɔɔ̀-ǹɗem à Bɛ̀ll à kìghà lɛ mɓa mum ànɛ ɓɛ ghɛɛ̀sɛɛ kì tyweeyii, ǹkpaa lèg ànɛ yɛɛ rìghɛn ɗyɛ̀m ɗi ri.

²⁶ Com ki ǹghɛɛ lɛ ki rɔɔtɛɛ ki ri lɛ: Yɛ̀ɛ mɛ̀tɔɓ mɛ ri lɛɛ̀gwey ɓigomìnɛ mɛ̀ ǹghɛɛ lɛ, ki ri kìrɔɔ lɛ ŋwaa rɔɓ lɔŋ ɓi nɗɛli wu à rì miì.

²⁷ I ù rì rì giɓ kɔ̀ɔ kaa lɛ u ghasɛn ɗì nyi; i ù yin nwɔlɛn, kɔ̀ɔ kaa giɓ ànɛ u wɛy.

²⁸ Kaa soo rì fɔlɔɔ, ù kìi ɓi kiɓe di ù wɔlɛɛ. I gɔ̀n ì giɓ inɛ ì yii ɓi baŋì ì kɛ̀ɛ rìwɛy, ì kìi ɓi kiɓe. Wɔ̀lɛ ɓumɓɛ ɓɛ ri ɓɛ̀wɔlɛn ɓɛ ri ɓiì ɓaà rì mɛ̀tɔɓ ɓi cɛɓ kaa, nni mɛ̀tɔɓ mɛ̀n mɛɛ̀mɛ nkɔ̀nkɔn lɛ ɓi lɛg.

²⁹ Ɓɔɔsoŋ̀, com ki nkɔ̀nkɔn lɛ nkpaà ki ri lɛ, cààmɛ̀n ki ri kìden, à tumɛ̀n ɓigomìnɛ, ɓumɓɛ ɓɛ ri rì ɓɛ̀yiɓ, ɓɛ ghɛɛ̀sɛɛ kì ɓaà yɛ̀ɛ ɓɛ ri kɛ̀ɛ̀ ɓɛ̀yiɓ;

³⁰ ɓɛ̀roɓɛ ɓɛɛ rènɗèn ɓɛ ɓa yɛ̀ɛ ɓɛ yin ɓiì rènɗeni, ɓɛ ɓɛɛ nyàànyàà ɓɛ ɓa yɛ̀ɛ ɓɛ yin ɓiì nyàànyaa; ɓɛ̀roɓɛ ɓɛɛ̀ làlag ɓyom ɓɛ ɓa yɛ̀ɛ ɓɛ yin ɗi ɓyɔ;

³¹ ɓɛ̀roɓɛ ɓɛɛ̀ ghɛnghɛn kirɔɔ ɓi ziinɛ, ɓɛ ɓa yɛ̀ɛ ɓumɓɛ ɓɛ ghɛɛ ɓi kirɔɔ, ɓisuulɛ rìɓa ɗi ziinɛ yɛ̀ɛ seeseèrɛ̀n ɗi miì ɗyaa finɛn ti ɓì.

³² Mɛ̀ɛ nkɔ̀nkɔn kɔm̀ lɛ, ɓi ɓa kɛ̀ɛ̀ kìɓan ki kɛɛ̀ ɗiɗi mini mɛ̀rem; lɛ nɗem wu ŋwaànɛ à yin nwɔlɛn, wɛɛ̀ cɛɛrag ri ɓìɓan ɓi Kan; ŋwaàncèm ànɛn à ki kaakaa lɛ a ki ɓìɓan ɓi ɓi ri lɛ ɓi puɓsì Kan ǹɗem.

³³ Wɔ̀lɛ nɗem wu ŋwaànɛ à rì ǹwɔlɛn wɛɛ̀ ɓɔmɓɔm ɓiɓan ɓi ɓi ziinɛ, à ki kaakaa lɛ a puùpùɓsì nɗem wu giy,

³⁴ à rì yɛɛ lɔɔ lɛ nɗem fɛ, nɗem fɛnii; fɔlɔɔ yɛɛ ri girig lɛ giɓ anɛ à rì kɛ̀ɛ̀ yii, nsoò lɛ gɔ̀n ìnɛ ì ka yi ɓi ɓɛbaŋì, ɓɛ ri ɓiì foŋì nɗem rì ɓìɓan ɓi Kan, lɛ ɓɛɛ ɓa ɓɛ̀tenɛn lɛ rì ɓi nyoo yaa, rì ɓi mɛ̀ghay maa; wɔ̀lɛ roànɛ à rì ǹwɔlɛn à rì ɓiì fèfeegh ɓiɓan ɓi ɓi ziinɛ, ri bee yi à rì lɛ à puɓsì yii wiì ǹɗem miì.

³⁵ Ǹkpaa fɔlɔɔ ɓisuu kirɔɔ kin, ki yin lɛ fìram fyɛɛ̀fi ǹɗami mìni, ki ri lɔŋ ɓisuulɛ di ɓi ki ɓìɓan ɓi ɓi ghɛɛ̀sɛɛ lɛ syeesyee, ɓì ki ɓa ɓɛràrɛn ɗi Kan kɛ̀ɛ̀ kìɓan ki ki ri lɛ ki yeèyèèsì mìni.

³⁶ I mum à ghɛɛ lɛ ki ri ǹtoòrìɗ lɛ gɔ̀n yìì yɛɛ ghay ì cee gbàà ìnɛ giɓ a ghɛ̀ɛ̀sɛɛ miì kì wɔlɛɛ, nni à ghɛɛ lɛ à ghɛ̀ɛ̀sɛɛ yɔ̀ ki faà ɓi rìwɛy, à ghɛ̀ɛ̀sɛɛ kì kìi com ki à kɔ̀ni; fɔlɔɔ a yin kiɓe; ɓum ɓɛ ghɛɛ̀sɛɛ kìwɔlɛɛ.

³⁷ Wɔ̀lɛ ŋwaànɛ à teri bimiɗ à nɗɛli kɛ̀ɛ̀ ǹkàŋɗɛ̀n, ki ɓa lɔŋ lɛ rìkɔ̀n ɗii ɗi nyimiɗ à ki ren ɓi nɗem wii lɛ a ɓeŋ gɔ̀n yìì nkwɛ̀y, di à kìi lɛ syeesyee.

³⁸ Fɔlɔɔ nnɛ ŋwaànɛ à faa gɔ̀n yìì ɓi rìwɛy, à kìi syeesyee à kìɓan, wɔ̀lɛ ŋwaànɛ à faa ɓi gɔ̀n yìì ɓi rìwɛy yɛɛ raŋ̀zii kì kìi syeesyee à kìɓan.

³⁹ I giɓ a rì ǹwɔlɛn, nsiŋdɛn wu riwɛy wu kàŋi nyi rì yii cààmɛ̀n kìcèm ki yii à kaka ǹto ɓi kìmììgh; wɔ̀lɛ i yii à wii, giɓ anɛ̀n à rì rì ìtèɗ wulɛ à kɛ̀n rìwɛy ɗi ŋwaànɛ à kɔ̀ni; kìɓan kifog, kìɓan kiǹ ki ghɛɛ̀sɛɛ kì kìlɛɛ ɓi rìgherɛ̀n ɓi ɗùm.

⁴⁰ Nni wɔ̀lɛ ɓi rìghɛn ɗyɛ̀m, giɓ anɛ̀n à ɓiì ɓiisɛɛ ki ɓaà lɛ syeesyee, di à kɔ̀rii fɔ̀lɔ̀ɔ̀; nni mɛ̀ɛ nfèki lɛ ǹɗì girig rì Ǹghay à Bɛ̀ll.