1 KƆ̀RƐ̀ŊTYƐŊ 4 - Bafia Nouveau Testament

Ɓɛ̀kɛ̀nì-fìtom ɓɛ Kiris

¹ Ɓì ghɛ̀ɛ̀sɛɛ min ɓisi kì seesee yɛ̀ɛ ɓɛ̀kìì-ɓìsay ɓɛ Kiris, ɓɛ ɓɛ ri ɓɛ̀ɓèŋì ɓɛ ɓɛkɔɔ̀kɔɔ̀ ɓɛ ɓiɓan ɓɛ Bɛ̀ll à nyamgà.

² Nni com ki ɓum ɓɛɛ̀ ɓoŋɓoŋ a ɓɛ̀ɓèŋì-ɓyom ki ri lɛ, ɓɛɛ resi lɛ ɓɛ ri ɓumɓɛ ɓum ɓɛ ghɛɛ̀sɛɛ kì tyweeyii.

³ Ɓi ɓɛg ànɛ a lɔ̀ŋkɛm̀, ǹtɔɔgh ɓi com nsoò lɛsàg lɛ mìni yɛɛ yɔm̀ mɛ̀, nsoò lɛ ɓum ɓɛɛ yɔm̀ mɛ̀, kɛ̀ɛ nki yɔ̀m mɛ̀ɛmiɗ

⁴ lɛ ǹ-yin ɗi bɛ̀lɛn ɓi nɗem. Kìɓan kifog àa fɔlɔɔ yɛɛ kii lɛ mɓa lɛ sɛɛghi sɛɛghi, ǹ-yɔ̀mì mɛ̀ à rì lɛ Kan.

⁵ Ɓisu wìn miì nnɛ kɛ̀ ɓi yɔ̀m kiɓan kidɛŋ di cààmɛ̀n ki ka kpaŋ ɓi, di Kan à ka yu ɓi, nnyɛɛ ri ɓiì tɛɛ̀zii ɓiɓan ɓi ɓi ri ɓì nyamɛn a birìm, à ki kì lɛ ɓɛɛ yi mɛ̀yitì mɛ ɓum ɓɛ ri rì mɔ ɓi mɛ̀rem, fɔɔnnɛ Bɛ̀ll à rì ɓiì faa mum ǹcèm mɛ̀sɛɛ̀ghsɛɛgh mɛ à ghɛ̀ɛ̀sɛɛ rì mɔ.

⁶ Ɓɔɔsoŋ̀, ɓisu win nnɛ màa teri dàɗkì yiǹ lɛ rì ɓi Apolos rì ɓi mɛ̀ɛmiɗ, lɛ i ɓì nɔ̀ɔ̀tii kìrèmzɛnà kis, fɔɔnnɛ ɓì ɓiì yilaagh yɛ̀ɛ ɓì rì lɛ ɓì rɔ̀ɓ kɛ̀ ɓi ceesi nɗèè wu ɓiɓan ɓi ɓi ri ɓìkànɛn, kɛ̀ ɓi faafàlɛ̀n mìniìɓɔmiɗ rikem lɛ ɓìi nsuugh ɓi jɛ̀m ì tɛɛnɛ à tɛɛnɛ, ɓì sɛɛtì tɛɛnɛ àmbog.

⁷ Ɓisuulɛ ghɛn yɛɛ kpaa wɔ̀ lɛ ù ceeghii ɓum ɓɛmbog? Cɛ ù rì rì kɔ ki ki yin com ki ɓɛ faghà wɔ̀ ǹfayɛn? I ɓɛ ki faghà wɔ̀ ǹfayɛn, ɓisuucɛ nnɛ u kaakalɛ̀n yɛ̀ɛ ɓɛɛ̀ kali lɛ ɓɛ faghà ɓi wɔ kɔ ǹfayɛn?

⁸ Ɓì mɛ wuràg, ɓì ki ti ɓɛ̀guŋgum; mìnii mɛ ɓɔg mɛfòm, ɓìsi kɛ̀ɛ̀ kìɓɔɔ̀gh, i ɓyàa rì kɔm̀ lɛ ɓì ɓa mɛ̀fòm mɛncèm lɛ ɓìsi girig ti lami nɗaŋ ri mìni.

⁹ Lɛ mɛ̀ɛ nfèki lɛ, ɓìsi ɓɛ̀kɛ̀nì-fìtom ɓɛ Yeesus Kiris, Bɛ̀ll à faghà ɓìsi ìkɔ̀ɔ̀ wu siitòn fɛlɛ yɛ̀ɛ ɓumɓɛ kìɓan kaa ki ti kìrenɛn lɛ ɓɛ ghɛɛ̀sɛɛ ɓɔ kì wolì. Tì rì ɓumɓɛ Bɛ̀ll à rɛsìghà lɛ ziinɛ, rì ɓum ɓɛ titom rì ɓɛ̀ro ɓum ɓɛɛ seèsee yɛ̀ɛ ti yɛɛyɛɓɛ̀n.

¹⁰ Tì rì ɓɛ̀ghalɛn ɓiyèg lɛ Kiris, wɔ̀lɛ mìnii ri rì ɗyomzɛ̀n ɓi Kiris ɓi ɗùm; ɓìsii ri ɓɛ̀kɔ̀kɔg, mìni ɓɛ̀tèteɗ; ɓum ɓɛ nyaànyààsì mìni, wɔ̀lɛ ɓɛ sɛɛ̀sɛ̀ɛ̀tì ɓìsi.

¹¹ Ɓìsii wowog lɛ rì zày, rì kìnɔli, ɓìsi nyoo zɛy, ɓɛ kukwìy ɓìsi, tì ki rereni zi, à kpaŋ ɓi cààmɛ̀n ki.

¹² Ti woowolɛ̀n ɓìsiìɓɔmiɗ ri ntɔɓ lɛ ti say rì ɓyàg ɓis, jàŋ inɛ ɓum ɓɛɛ̀ sɛɛsɛmgì ɓìsi, ɓìsii maŋmàŋ ɓɔ, ɓɛ ri yeeyeesì ɓisi, tì sììsììrì lɔŋ nɗem.

¹³ Ɓɛ ri tòtog ɓisi kìɓe ɓi nyoo, ɓìsii fɔɔfɔ̀ɔ̀sì ɓɔ mɛ̀rem, à kpaŋ ɓigomìnɛ, ɓìsii mɛ ghay fɛlɛ yɛ̀ɛ ɓìsògtɛ̀n ɓi ziinɛ rì ɓìgham ɓi ɓum ɓɛ̀cèm.

¹⁴ Nsoò ǹkàniì mìni fɔlɔɔ, ki yin lɛ nfa mìni ǹtoòrìɗ, ki ri lɔŋ lɛ nɗeɓ mìni yɛ̀ɛ ɓɔn ɓɛm ɓɛ nɗem.

¹⁵ Ɓisuulɛ nsoò ɓyàa rì rì ɓɛ̀rèsàg ɓɛ̀tɔɔsìm ǹtɛ̀ɗ ɓi cɛɓ ki ɓi ghɛghɛɓ ɓi Kiris ɓi ɗùm, ɓì yin lɛ ɓì ɓa rì ɓɛ̀seŋi kìtuu, lɛ mɛ̀ yɛɛ yali mìni ɓi Yeesus Kiris ɓi ɗùm, rì Syeesyee à Ɓɔlɛ ànɛ ǹghagsìghà mìni.

¹⁶ Fɔɔnnɛ ǹtɔɔgh min mini lɛ, ɓi pisɛn mɛ̀.

¹⁷ Ɓisuu kiɓan kiǹ nnɛ ǹɗomgày mìni Timote á man wɛm̀ à ǹɗem ànɛ ǹɗì rì ǹtyweeyi ri nyi ɓi rìgherɛ̀n; nnyɛɛ ri mìni biì yitii ɓiɓan ɓi mɛ̀ɛ nnɔ̀ɔnɔɔ̀tì ɓi cɛɓ kɛ̀m ki ɓi Kiris, ɓìɓan ɓi nki rèresi jàŋ bimiɗ ɓi ɓìseŋi ɓi Kiris ɓìcèm.

¹⁸ Ɓum ɓɛdɛŋ ɓɛ ɓi nyìinyìm wìn ɓɛ ntumɛɛ rìkìkì ɗi ɓidaŋà rì fèg ànɛ lɛ màa kpaŋdi ɓi a lɔ̀ŋkin.

¹⁹ Wɔ̀lɛ i ki kɔni Kan, di ǹɗì ɓiì fyaŋzii foo ki kpaŋì; fɔɔnnɛ máa yi ɓi lɔŋ lɛ ɓìɓan ɓi ɓɛ̀daŋàdaŋa ɓɛǹ ɓɛɛ̀ kpaakpàà, ǹɗì girig ɓiì yiì com ki ɓɛ ri rì ìtèɗ wulɛ ɓɛ ki.

²⁰ Ɓisuulɛ kìlɔ̀ŋ ki Bɛ̀ll ki yin kiɓan ki ɓitòkì ɓi rì ŋwɔm, ki ri lɔŋ kiɓan ki mɛkìkì.

²¹ Cɛ ɓi kɔ̀ŋkɔn kɔm̀ lɛ twiɗ? Ɓi kɔ̀ŋkɔn lɛ n-yu a lɔ̀ŋkin ri nkpas gìn n-yuiy lɛ rì ǹkɔ̀nɛ̀n rì nɗem wu tɛ̀tɛ̀rɛ̀ɛ̀?