1 KƆ̀RƐ̀ŊTYƐŊ 16 - Bafia Nouveau Testament

Kìɓan ki syɔ̀ɔ̀ à ɓyom ɓisuu ɓɛgh erɛ̀n ɓɛ a Yorisalɛm

¹ Ɓi kìɓan ki ki seesee syɔ̀ɔ̀ à ɓyom ɓisuu ɓɛgherɛ̀n ɓɛ a Yorisalɛm mìnii kìina girig yɛ̀ɛ ǹtɔkà ɓìseŋi ɓi Kiris ɓi a Galasi.

² Mum ǹcèm ànɛ ɓi mìni, à ghɛ̀ɛ̀sɛɛ kì pyerì gàɓ ì com ìnɛ à rì lɛ à pyeɗ a mɛɛ mii lɔŋ yɛ̀ɛ ìtèɗ wii wu ri, ŋwosi Sɔnɗì bimiɗ, lɛ kɛ̀ɛ ɓoŋ lɛ, ɓɛɛ tumɛn ɓɛ̀syɔ̀ɔ̀ di màa kpaŋ.

³ Yɛ̀ɛ mɓiì yùu ǹɗì ɓiì romì ɓumɓɛ ɓì ɓiì ɓɔ̀ni, ri ɓɛ̀kaàtà lɛ ɓɛɛ kɛǹ kìfaà ɓyom ɓi syɔ̀ɔ̀ a Yorisalɛm.

⁴ I ki ghɛnɛɛ lɛ mɛ̀ɛmiɗ ǹghɛ̀ɛ̀sɛɛ kì kɛ̀ɛ, di tì ri kɛ̀n nɗaŋ ri ɓɔ.

⁵ Ǹɗì ɓiì yùu a lɔ̀ŋkin di màa syàà kìlànà ki zi ki a Masedwan, lɛ ǹghɛ̀ɛ̀sɛɛ kì syàa kilànà ki zi kiǹ.

⁶ Ɓaàyi ɓi, ǹɗì ɓiì ghagsii cààmɛ̀n a lɔ̀ŋkin, i ki yii ɓi, cààmɛ̀n à bùmà bimiɗ, fɔɔnnɛ ɓì ri kɛ̀n min mɛ̀ jàŋ inɛ ki ri ɓa lɛ nkɛǹ.

⁷ Lɛ ǹkɔ̀ni ɓi lɛ nghɛǹ mìni mɛ̀rɛy ɓi rìghaàgh ɗyɛm̀ ɗi, wɔ̀lɛ ǹɗì rì ǹtyweeyi wulɛ ǹɗì ɓiì kɔ̀rii a lɔ̀ŋkin gàɓ, di Kan à gherɛɛ.

⁸ Wɔ̀lɛ ǹɗì ɓiì kɔ̀rii a Efɛɛzɛ à kpaŋ ŋwosi Pàŋtèkot.

⁹ Ɓisuulɛ syeesyee à kìtuɓi àa nghɛnɛɛ ɓisuu kisay ki nkìkì, nni ɓɛ̀bènàbena ɓɛ teghɛɛ.

¹⁰ I Timote à kpaŋi foo, ɓì kì com ki lɛ a ɓa kɛ̀ɛ̀ mɛ̀riighrikì ɓi nyìinyìm wìn ɓisuulɛ à rì ŋwaànɛ a kìki kisay ki Kan lɔŋ yɛ̀ɛ mɛ̀.

¹¹ Mum kɛ̀ɛ sɛɛti nyi, ghɛɓsiina nyi lɛ a sugtiì lɛ fyòoog a lɔ̀ŋkɛm̀, ɓisuulɛ mɓoŋɓoŋ nyi rì ɓɔɔseŋi ɓis.

¹² Ɓi ɓɛg ànɛ yɛ̀ɛ Apolos à geni wìs, maà totònì nyi lɛ a yuiy a lɔ̀ŋkin nɗaŋ ɗi ɓɛ̀geni ɓis ɓɛdɛŋ, kìɓan kifog à kɔ̀ni ɓi lɛ a ki fɔlɔɔ nsoò lɛsàg ɓigomìnɛ, wɔ̀lɛ à ɓiì yùu di à ghɛɛ cààmɛ̀n, ki lɛ a yu miì.

Deɓ yi siitòn, rì ɓìtɔkì

¹³ Ɓaana cem, ɓì sììrɛ̀n ɓi rìgherɛ̀n; ɓaana ɓum, ɓì tèèsɛ̀n.

¹⁴ Kìlaaghna ɓìɓan ɓìcèm ɗì ǹkɔ̀nɛ̀n, ɓi nyìinyìm wìn.

¹⁵ Ɓɔɔsoŋ̀ ǹsiŋ̀dɛɛ tì mìni kìɓan kidɛŋ; ɓì yii lɛ Sitefanas rì naa yìì i ɓum ɓɛɛ ɓaghà ɓum ɓɛ ǹtonto ɓɛ lɛ ɓɛɛ lɔɔ̀ghrɛn mɛ̀rem ɓi kìlànà ki zi ki lɛ Akayi, ɓɛ falɛ̀ngà lɛɛ̀gwey lɛ ɓɛɛ ghɛɛ̀ghɛ̀ɓsì ɓɛ̀gherɛ̀n.

¹⁶ Mɛ̀kuu mɛ ɓum mɛ fɔlɔɔ mɛɛ̀mɛ ɓì ghɛ̀ɛ̀sɛɛ kì kìi mɛwog, rì mum ǹcèm ànɛ à ti à tekì gàɓ ɓi kìsay ki ɓɛɛ̀ kìkì, à ki sasay ri ɓɔ.

¹⁷ Mɛ̀ nyààrɛɛ rì rìyù ɗi Sitefanas, rì Fɔrtunatus rì Akayikus; ɓɛ nɗoòzii kìkpaŋ ki ki ǹɗì mɛ̀ ɓi nɗem, lɛ rìɓa ɗi ɓì yin mɛ jàŋbog.

¹⁸ Ɓisuulɛ, ɓɛ nfɔɔsii lɛ rì nɗem wɛ̀m, rì wuŋkin. Ɓì ghɛ̀ɛ̀sɛɛ kì yiì rìsɛg ɗi mɛkuu mɛ ɓum yɛ̀ɛ mɛǹ.

¹⁹ Ɓìseŋi ɓi Kiris ɓi a Azii ɓi togsaagh yì mìni. Ɓɛ̀ Akilas ɓɛɛ̀ Pirisilya, rì kìseŋi ki ɓi naa yàà, ɓɛ togsaagh yì mìni ɓi Kan ɓiɗùm.

²⁰ Ɓɛ̀geni ɓin ɓɛ togsaagh yì mìni ɓɛ̀sɛ̀ɛ̀ ɓɛcèm; tòotògsɛɛna mìni rì mìni ɓì lɔ̀ɔ̀lɔ̀rɛ̀n ɓi nkɔ̀nɛ̀n à rìgeni.

²¹ Mɛ̀ Pol yɛɛ togsaaghiì mìni ɓi kaàtà ànɛ mɛ̀ɛmiɗ.

²² I mum à keesii ɓi Kan, à ghɛ̀ɛ̀sɛɛ kì terì ǹcɛ̀m! Màrànatà-Kan wìs yuiy!

²³ Geesɛ̀n ì Kan Yeesus yɛ̀ɛ ɓa rì mìni!

²⁴ Ǹkɔ̀nɛ̀n wɛ̀m à rì rì mìni ɓɛ̀sɛ̀ɛ̀ ɓɛ̀cèm ɓi Yeesus Kiris ɓi ɗùm.