1 KƆ̀RƐ̀ŊTYƐŊ 14 - Bafia Nouveau Testament

Pol à ɓùŋdii kìɓan ki mɛfaà mɛ Kitɛntɛ̀ɛ̀n ki Nghay

¹ Kaana ǹkɔ̀nɛ̀n; ɓì keesì girig mɛ̀faà mɛ Kitɛntɛ̀ɛ̀n ki Nghay, à ɓiisɛ̀n rìfa ɗi lɛ ɓi kpaàkpàŋzì ɓìɓan ɓi Bɛ̀ll à rèsii mìni.

² Ɓisuulɛ ŋwaànɛ a tòtog ɓìkènekènè ɓi ɓitòkì, à yin ɓiì tòtoogh ri ɓum, lɔŋ rì Bɛ̀ll nnɛ a tòtòg ɓisuulɛ à yin lɛ à wog com ki a kpaakpàà; rì ǹghay innɛ a kpaakpaa ɓiɓan ɓi rim.

³ Kɔm̀ lɛ ŋwaànɛ a kpaakpaŋzì ɓìɓan ɓi Bɛ̀ll a tòtog ri ɓum, à fafà ɓɔ ìtèɗ ɓi rìgherɛ̀n, à feèghfègsì ɓɔ, à ki fɔɔfɔɔ̀sì ɓɔ mɛ̀rem.

⁴ Ŋwaànɛ a tòtog ɓìkènekènè ɓi ɓitòkì, a faafàlɛ̀n nyimiɗ itèɗ ɓi rìgherɛ̀n, roànɛ a kpaakpaŋzì ɓìɓan ɓi Bɛ̀ll a kìki lɛ kìseŋi ki Bɛ̀ll kɛɛ ɓa rì ìtèɗ, ɓi rìgherɛ̀n.

⁵ Nkɔ̀nkɔn lɛ di mìni ɓɛ̀sɛ̀ɛ̀ ɓɛ̀cèm ɓyàa tòtoogh ɓìkènekènè ɓi ɓitòkì, wɔ̀lɛ m̀ɓiisɛɛ tì kìkɔ̀ni lɛ ɓi kpaàkpàŋzì ɓìɓan ɓi Bɛ̀ll lɛ ŋwaànɛ a kpaàkpàŋzì ɓìɓan ɓi Bɛ̀ll à cee ŋwaànɛ a tòtog ɓìkènekènè ɓi ɓitòkì, di ki cee ɓi lɛ roànɛ a tòtog ɓìkènekènè ɓi ɓitòkì à ghagsii ɓum com ki à kpaa, lɛ kɛɛ fa kìseŋi kìcèm ìtèɗ.

⁶ Nni ɓigomìnɛ, ɓɔɔsoŋ̀ gɛɓsɛ̀n aɗi yɛɛ̀nɛ ǹɗì lɛ mɓay mìni rì yɔ̀, di ǹ-yùu mìni kìtòtoogh ɓìkènekènè ɓi ɓitòkì jàŋ inɛ màa ghɛ̀ɛ̀sɛɛ lɛ ǹ-yùy mìni rì kìɓan ki Ǹghay à rèsii, nsoò lɛ rìyi ɗidɛŋ, nsoò lɛ kìɓan ki Bɛ̀ll à rèsii mɛ̀ lɛ nkpaŋzi, nsoò lɛ bimiɗ à rìrèsàg àdɛŋ?

⁷ I ɓyom ɓi zɛy (ɓi ɓi yin lɛ ɓi nyɛŋɗɛ̀n ɓi ɓɛ ri lɛ ɓɛ rɔŋ) fɛlɛ yɛ̀ɛ zàro rì fìloŋ ɓyaa yin mɛtòògh dɛŋ dɛ̀ŋ dɛŋ, di lannɛ ŋwaà rì lɛ à yi rìghasì ɗi ritòg ɗi zàro rì ɗi fìloŋ?

⁸ I ɗyam ɗi toòghrɛɛ ɓi lɛ tɛntɛ̀ɛ̀n ghɛn yɛɛ ɓuŋɛ̀n wɛ̀y?

⁹ Fɔlɔɔ yɛɛ ri girig ɓi ɓɛg wìn, lɛ i kìɓan ki ɓì kpaa ɓi kìkènekènè ki kitòkì ki resii ɓi com, lannɛ ɓum ɓɛ ri ɓiì yiì com ki ɓi kpaakpàà? Fɔlɔɔ a ɓa lɛ ɓi màmag jɛ̀ɛ̀ ɓi zi.

¹⁰ Nsoò ɓìtòkì ɓyaa tèghɛɛ ɓi ziinɛ yɛ̀ɛ cɛ, kidɛŋ ki yin wɔɔ ki ɓɛ kpaa lɛ ki resii ɓi com.

¹¹ Nni fɔlɔɔ yɛɛ ri min lɛ, i màa rɔ̀ɓ kɛ̀ɛ nwog kitòkì ki ɓɛɛ̀ tòtog mɛ miì, ǹɗì ɓiì ɓaà kìgbɔ̀mgbɔ̀m ɓi mis mɛ ŋwaànɛ a tòtog ri mɛ̀, nyii ɓa girig kìgbɔ̀mgbɔ̀m ɓi mis mɛ̀m.

¹² Fɔlɔɔ nnɛ yɛ̀ɛ ɓi kaakaa mɛfaà mɛ Nghay, ɓì ghɛ̀ɛ̀sɛɛ kì kaà lɛ di ɓyàa ɓaa rì mɔ lɛɛ̀gwey wɔ̀lɛ kɛɛ ɓa fɔlɔɔ ɓisuulɛ kìseŋi ki Kiris kɛɛ ɓa rì ìtèɗ.

¹³ Kìɓan kiǹ kɛɛ̀ki ŋwaànɛ a tòtog kikènekènè ki kitòkì, à ghɛ̀ɛ̀sɛɛ kì ɓɔ̀ŋzaagh Bɛ̀ll lɛ, a yi rìghagsì ɗi ɓum com ki a kpaakpàà ɓi kìtòkì kiǹ.

¹⁴ Ɓisuulɛ cààmɛ̀n ki mɓɔ̀ɔɓɔŋzàg ɓi kìkènekènè ki kitòkì, lɔŋ nghay wɛ̀m wɛɛ̀ ɓɔ̀ɔɓɔŋzàg, ɗyomzɛ̀n ɗyɛm̀ ɗyɔɔ maamàà ɗyɛ̀ kɛɛ̀ kì com.

¹⁵ Ǹghɛ̀ɛ̀sɛɛ min ki kìi la? Ǹɗì ɓiì ɓɔ̀ŋzaagh Bɛ̀ll rì nghay wɛ̀m, kìɓan kifog m̀ɓɔ̀ŋzàg girig rì ɗyomzɛ̀n ɗyɛm̀; ǹɗì ɓiì kɛɛghraagh tyem rì nghay wɛ̀m kìɓan kifog ǹkɛɛghràg girig rì ɗyomzɛ̀n ɗyɛm̀.

¹⁶ Ɓisuulɛ i u fafa Bɛ̀ll ɓìtògsɛ̀n ɓi nghay wɔ rì wɔ, lannɛ ŋwaà zɛ̀y ànɛ à kɔ̀kɔrii ǹɗaŋ ri ɓumɓɛ ɓɛɛ̀ wowòg à rì lɛ à kpaa lɛ ààmɛ̀n ɓi ɓìtògsɛ̀n ɓi ù faa Bɛ̀ll kɔlɛ à yii ɓi com ki ù kpaa?

¹⁷ Ki ri lɔŋ saaɗ lɛ ɓìɓan ɓi u kakali Bɛ̀ll cààmɛ̀n ki u fafa nyi ɓìtògsɛ̀n fɔlɔɔ ɓi rɔɔtɛɛ yɛ̀ɛ mɛ̀nɔ̀ɓɔ̀, kìɓan kifog, ɓi yin ɓiì fafaa goni ìtèɗ ɓi rìgherɛ̀n.

¹⁸ Ǹfaa Bɛ̀ll ɓìtògsɛ̀n lɛ, ntòtog ɓìkènekènè ɓi ɓitòkì, ǹcee mìni ɓɛ̀sɛ̀ɛ̀ ɓɛ̀cèm.

¹⁹ Kìɓan kifog, cààmɛ̀n ki ǹɗì ɓi ntaŋzɛn wu ɓɛgherɛ̀n, ǹti m̀ɓiisàg kì kɔ̀ni lɛ nkpaa jɛ̀ɛ̀ yitaǹ rì ɗyomzɛ̀n ɗyɛm̀, à cee lɛ nkpaa jɛ̀ɛ̀ ɓɛ̀tɔɔsìm ǹtɛ̀ɗ ɓi kìkènekènè ki kitòkì.

²⁰ Ɓɔɔsoŋ̀, kɛ̀ ɓi ɓa yɛ̀ɛ ɓɔɓti ɓi rìfifìɓì ɗi ɓiɓan, wɔ̀lɛ ɓi kìɓe nnɛ ɓì ghɛ̀ɛ̀sɛɛ kì ɓaà yɛ̀ɛ ɓɔɓti; ɓì rìfifìɓì ɗi ɓiɓan, ɓì ɓa ɓɛ̀sɛ̀ɛ̀mɛn.

²¹ Ki ri kìkànɛn ɓi kaàtà à ɓìdɔ̀gsɛna lɛ: Ɓi myɔm mɛ ɓumɓɛ ɓɛɛ̀ tòtog ɓitòkì ɓidɛŋ, rì ɓi myɔm mɛ ɓɛ̀kèn, innɛ ǹɗì ɓiì tòòghrɛɛ ri kìlɔ̀ŋ ki; nni nsoò ɓi bee inɛ̀n, ɓaa wog ɓi mɛ. Fɔlɔɔ nnɛ Kan a kalàg.

²² Fɔlɔɔ nnɛ rìtòtòg ɗi ɓìkènekènè ɓi ɓitòkì ɗi resii com, àa ɓisuu ɓɛgherɛ̀n, wɔ̀lɛ ɓisuu ɓumɓɛ ɓɛ yin ɓɛgherɛ̀n, kɔlɛ rìkpaŋzì ɗi ɓiɓan ɓi Bɛ̀ll, ɗi resii com, wɔ̀lɛ àa ɓisuu ɓumɓɛ ɓɛ yin ɓɛgherɛ̀n lɔŋ ɓisuu ɓɛgherɛ̀n.

²³ I ki ri min lɛ, ɓi ntaŋzen wu kiseŋi kìcèm ɓum ɓɛ̀cɛ̀m ɓɛɛ̀ tòtog ɓi ɓitòkì, nni nnɛ ɓum ɓɛ ɓi kìlɔ̀ŋ, nsoò lɛ ɓumɓɛ ɓe yin ɓɛgerɛ̀n, ɓɛ ɗiŋii yì wɔɔ, ɓɛ ri ɓiì rɔ̀ɓi ɓɛ̀ kɛɛ kpaa lɛ ɓì ghali ɓìyɛ̀g di ki ɓaa là?

²⁴ Wɔ̀lɛ i ɓum ɓɛ̀cèm ɓɛɛ̀ kpaakpaŋzì ɓìɓan ɓi Bɛ̀ll, nni nnɛ ŋwaànɛ à yin ngherɛ̀n nsoò lɛ ŋwaànɛ à yùu lɛ a wog à ɗiŋii yì, ɓum ɓɛ̀cèm ɓɛ ri nyi ɓiì tinii lɛ a gherɛn kìɓe kii, ɓɛ̀sɛ̀ɛ̀ ɓɛ̀cèm ɓɛ ɓiì yɔ̀mi nyi.

²⁵ Ɓɛ̀fèg ɓɛ ɓɛ ri nyi ɓɛ̀nyamɛn ɓi nɗem ɓɛ ɓiì kpagii dan, à kpì ɓi zi ri ìsu, à ɓɔgsì Bɛ̀ll à kalì lɛ: Bɛ̀ll à rì lɔŋ ɓi nyìinyìm wìn a tààkaà.

²⁶ Ɓɔɔsoŋ̀ nni cɛ ɓì ghɛ̀ɛ̀sɛɛ min lɛ ɓì kìlàg? Ki ghɛɛ̀sɛɛ lɛ, cààmɛ̀n ki ɓì taŋzɛɛ, wàànɛ ù rì rì fyem, nsoò lɛ com ki rèsiyɛn, nsoò kìɓan ki Nghay à rèsii wɔ̀, nsoò lɛ u toòghrɛn kìkènekènè ki kitòkì, nsoò lɛ rìtɛɛ̀zì ɗi ɓiɓan ɓi ɓi kparɛɛ ɓi kìkènekènè ki kitòkì kiǹ, ɓìɓan ɓiǹ ɓìcèm ɓi ghɛɛ̀sɛɛ kìfaà ɓɛ̀gherɛ̀n ɓɛ̀cèm ìtèɗ ɓi nghay.

²⁷ I ɓum ɓɛɛ̀ tòtòg ɓìkènekènè ɓi ɓitòkì, ɓum ɓɛɓɛɛ̀ nsoò lɛ ɓɛraa, di ɓɛ teghɛɛ ɓɛɛ ghɛɛ̀sɛɛ lɛ ɓɛ toòghrɛ̀n lɛ i roànɛ à tòòghrɛɛ, roàmbog à tòòghrɛ̀n, mum ànɛ lɛ a ghaàghàgsì ɓìɓan ɓi ɓɛɛ̀ kpaakpàà à ghɛ̀ɛ̀sɛɛ wɔɔ ki ɓaà.

²⁸ I mum à gagsì à yin, mum à ghɛ̀ɛ̀sɛɛ kì maarɛɛ ɓi nyìinyìm à ǹtaŋzɛn wu ɓɛgherɛ̀n, à tòtòg wɔɔ ɓɛɛ̀ nyimiɗ, rì ǹɗem, à ki tòtog ri Bɛ̀ll.

²⁹ Ɓi ɓɛg ànɛ a ɓɛ̀kpaŋzì-ɓìɓan, ɓɛ̀sɛ̀ɛ̀ ɓɛɓɛɛ̀ nsoò lɛ ɓɛraa ɓɛ ghɛɛ̀sɛɛ kì tòòghrɛɛ, ɓɛ̀ro ɓɛmbog ɓɔɔ fifìɓì ɓìɓan ɓi ɓɛ̀roɓɛ̀n ɓɛɛ̀ kpaakpàà.

³⁰ I ŋwaàdɛŋ ànɛ a rìghàdà à rì rì kìɓan ki Nghay à rèsii nyi, ki ghɛɛ̀sɛɛ lɛ roàmbog ànɛ a tòtog a maàrɛn.

³¹ Ɓisuulɛ ɓì rì lɛ ɓì ɓɔ̀ɔ̀ɓɔ̀ɓsɛ̀n ɓi rìkpaàkpàŋzì ɗi ɓiɓan ɓi Bɛ̀ll ɓi lèg ànɛ lɛ ɓum ɓɛ̀cèm ɓɛɛ womzɛn lɛ rìrèsàg ɗiǹ, fɔlɔɔ nnɛ ɓum ɓɛ̀cèm ɓɛ teɗ cilag rì deɓ yi yɛɛ̀ fafa itèɗ.

³² Ǹkpaŋzì-ɓìɓan a ghɛ̀ɛ̀sɛɛ kì làmii ǹghay à rìkpaŋzì ɗi ɓiɓan anɛ a sasay ɓi nyi.

³³ Ɓisuulɛ Bɛ̀ll à yin Bɛ̀ll à kìɓùùsì, à rì lɔŋ Bɛ̀ll à fyòoog. Lɔŋ yɛ̀ɛ ki ti ki ɓalàg ɓi mɛ̀taŋzɛn mɛ ɓɛgherɛ̀n Bɛ̀ll mɛ̀cèm

³⁴ ɓɛ̀yiɓ ɓɛ ghɛɛ̀sɛɛ kì maarɛɛ ɓi mɛ̀taŋzɛn lɛ ki ri ɓɔ kìrèghɛn lɛ ɓɛɛ toòghrag ɓi nyìinyìm à ǹtaŋzɛn; ɓɛ ghɛɛ̀sɛɛ lɔŋ lɛ ɓɛɛ ɓa rì mɛ̀wog yɛ̀ɛ ki ri girig kì kaliyɛn ɓi ɓìdɔ̀gsɛna.

³⁵ I giɓ adɛŋ à rì rì zày ìnɛ lɛ a yi kìɓan kidɛŋ, à ghɛ̀ɛ̀sɛɛ kì tɔɔ̀gh yii wiì kɔ a mɛɛ ɓisuulɛ ki rɔɔtɛɛ ɓi lɛ ɓɛ̀yiɓ ɓɛɛ totog ɓi naà-Bɛ̀ll.

³⁶ A lɔ̀ŋkin innɛ jɛ̀ɛ̀ ì Bɛ̀ll ì pɛ̀sɛ̀ngày yɔ̀? Gìn mìni yɛɛ tekà yɔ̀ cɛ̀ncin?

³⁷ I mum a fèfeg lɛ à rì ǹkpaŋzì-ɓìɓan à ghɛ̀ɛ̀sɛɛ kì yiì lɛ kìɓan ki ǹkàni mìni ki, ki ri kìdɔ̀gsɛna ki Kan.

³⁸ I mum à còmɛɛ kɔ, di Bɛ̀ll à yii ɓi nyi.

³⁹ Fɔlɔɔ nnɛ ɓaana rì zày ìnɛ lɛ ɓi kpaàkpàŋzì ɓìɓan ɓi Bɛ̀ll, ɓɔɔsoŋ̀! Kɛ̀ ɓi ki règ ɓum lɛ ɓɛɛ totog ɓìkènekènè ɓi ɓitòkì.

⁴⁰ Kìɓan kifog, ɓìɓan ɓìcèm ɓi ghɛɛ̀sɛɛ kì kìlɛɛ yɛ̀ɛ kɛɛ̀ kɔ̀nkɔ̀n rì syeesyee à rìwòŋzàg.