1 KƆ̀RƐ̀ŊTYƐŊ 13 - Bafia Nouveau Testament

Ǹkɔ̀nɛ̀n

¹ Nsoò màa tòtòg ɓìtòkì lɛ rì ɓi ɓum, rì ɓi ɓum ɓɛ titom, i ǹ-yin ɗi ǹkɔ̀nɛ̀n ǹɗì lɔŋ yɛ̀ɛ ǹkeŋ wu wɛɛ̀ tòtòg, nsoò lɛ jeŋi inɛ yɛɛ̀ yooyòò.

² Nsoò màa rì rì rìfa ɗi Nghay ɗi lɛ nkpaàkpàŋzì ɓìɓan ɓi Bɛ̀ll, màa soo yii dàm yi ɓiɓan yicèm yi a rìnyam, ǹki yi ɓiɓan ɓìcèm, nsoò màa rì kɔm̀ ɗì rìgherɛ̀n ɗi ɗi ri lɛ ɗi pɛsì dòn lɛ yɛ̀ɛ, pɛsɛn jàŋ inɛ ì rì, i ǹ-yin ɗi ǹkɔ̀nɛ̀n, di ǹɗì lɔŋ com ki zɛy.

³ Màa soo teri ìkum wɛm̀ wùcèm, ǹkàɓsàg rì ɓɛ̀soghàsogha lɛ ɓɛɛ ɗiɗi miì, màa soo ki faa kɔm̀ nyoo yɛ̀m lɛ yɛ̀ɛ ɗig ɓi ɗuu, i ǹ-yin ɗi ǹkɔ̀nɛ̀n, fɔlɔɔ anɛ̀n àa ghɛɓsi ɓi mɛ com.

⁴ Ǹkɔ̀nɛ̀n à rì rìnìɗ ɗi nɗem, nyi rì kìpuɓì-ǹɗem, kɛ̀ɛ ɓa ri m̀mììghrɛ̀n; ǹkɔ̀nɛ̀n à yin ɗi kalɛn, kɛ̀ɛ ɓa ri kìrèeresɛ̀n.

⁵ Ǹkɔ̀nɛ̀n à ti kɛ̀ɛ kì kiɓan ki kitɛ̀ŋtɛ̀ŋ, ǹkɔ̀nɛ̀n à ti kɛ̀ɛ pàg ɓi kaagh, kɛ̀ɛ wog bim, kɛ̀ɛ ɓa ri mɛ̀nyaàkà,

⁶ ǹkɔ̀nɛ̀n à ti kɛ̀ɛ wog kirɔɔ jàŋ inɛ mɛ̀ɓèe mɛ ri, à ti à nyààràg lɔŋ ri ɓìɓan ɓi ɓi ri lɛ saaɗ.

⁷ Ǹkɔ̀nɛ̀n a cenag ɓìɓan ɓìcèm, à gheràg ɓìɓan ɓìcèm, à ɗyàɓàg ɓìɓan ɓìcèm, à ki nìɗki nɗem rì ɓìɓan ɓìcèm.

⁸ Ǹkɔ̀nɛ̀n à yin ɗi rìlèg; rìkpaŋzì ɗi ɓiɓan ɓi Bɛ̀ll ɗi ri lèg, rìtòtòg ɗi ɓìkènekènè ɓi ɓitòkì ɗi leg, rìyi ɗi ɓiɓan ɗi sugtɛ̀n,

⁹ ɓisuulɛ gàɓ ì ɓìɓan yɛ̀ɛnɛ tì yii, tì ki kpaakpaŋzì ɓìɓan ɓi Bɛ̀ll gàɓ ìdɛŋ yɔ̀riyɔ̀.

¹⁰ Kìɓan kifog, yɛ̀ɛ com ki ki rɔɔtɛɛ kɛ̀ɛ̀ kìɓan ki lɛ ɓɛ fen miì ki ɓiì kpaŋì, ki ki ri tàtà ki leg.

¹¹ Yɛ̀ɛ m̀ɓaghà ŋwɔɓti, kìtòkì kɛm̀, fèg wɛ̀m rì ɗyomzɛ̀n ɗyɛm̀, ɓi ɓaghà ɓìɓan ɓi riŋwɔɓti nni wɔ̀lɛ, yɛ̀ɛ ǹkpagà mum, ǹcàɗ ɓìɓan ɓi riŋwɔɓti ɓìn.

¹² Ɓigomìnɛ, ti seesee ɓyom lɛ rìiì lɔŋ yɛ̀ɛ rìghɛnɛ̀n ɗi ŋwaà ti à ghɛnàg ɓi ŋwii wɔ̀lɛ, ɓi cààmɛ̀n kiǹ, tì konaagh gɛ kì ghɛɛ̀ lɛ tɛntɛ̀ɛ̀n. Ɓigomìnɛ ǹ-yii kìden, wɔ̀lɛ ɓi cààmɛ̀n kiǹ ǹkonaagh gɛ nyi kì yiì, lɔŋ yɛ̀ɛ nyii yighà mɛ̀.

¹³ Ɓigomìnɛ, ɓìɓan ɓi ɓi kaka ɓi ri ɓiraa lɛ, rì rìgherɛ̀n, rì dyàɓɛn, rì ǹkɔ̀nɛ̀n, kìɓan kifog ɓi ɓìɓan ɓiǹ ɓìcèm, ǹkɔ̀nɛ̀n yɛɛ cee.