Bìoball air-loidhne

1 KƆ̀RƐ̀ŊTYƐŊ 12 - Bafia Nouveau Testament

Mɛ̀faà mɛ Kìtɛntɛ̀ɛ̀n ki Nghay ki ti ki falàg ɓum

¹ Ɓɔɔsoŋ̀, ɓi kìɓan ki ki seesee ɓìɓan ɓi Kìtɛntɛ̀ɛ̀n ki Nghay ki ti ki falàg ɓum ìtèɗ wu kìyɛn, mɛ̀ ǹkɔ̀ni ɓi lɛ ɓi rɔɓ lɛ dùŋdùŋ.

² Ɓì yii lɛ, cààmɛ̀n ki ɓì ɓaghà di ɓì ka yi ɓi Bɛ̀ll, ɓɛ syoŋsyòŋgà mìni lɔŋ lɛ duri yaa tani, a ɓìnùn ɓi ɓi yin lɛ ɓi toòghrɛ̀n.

³ Kìɓan kiǹ kɛɛ̀ki ǹkpaa mìni lɛ, mum à yin lɛ à kpaà lɛ: Yeesus a teɗ ǹcɛ̀m di ki ri lɛ a tòtog ri ìtèɗ wu Nghay à Bɛ̀ll, mum à ki yin lɛ à kpaa lɛ: Yeesus à rì Kan, di ki yin lɛ Kìtɛntɛ̀ɛ̀n ki Nghay kɛɛ tinii nyi lɛ a kpaà fɔlɔɔ.

⁴ Mɛ̀faà mɛ Nghay mɛ ri mɛ̀kuu mɛ̀kuu, kìɓan kifog Ǹghay ànɛ a fafa mɔ, à rì lɔŋ bog.

⁵ Ɓìsay ɓi ri mɛ̀kuu mɛ̀kuu, kìɓan kifog Kan bog innɛ ɓɛɛ̀ sasày.

⁶ Ɓìɓan ɓi kìyɛn ɓi ri mɛ̀kuu mɛ̀kuu, wɔ̀lɛ Bɛ̀ll bog yɛ̀ɛ kìki ɓiɓan ɓiǹ ɓìcèm ɓi ɓum ɓɛ̀cèm.

⁷ Kìtɛntɛ̀ɛ̀n ki Nghay ki ti ki ghɛnàg yɛ̀ɛ mum bimiɗ ɓi bimiɗ à rìfa ànɛ à rì ɓi kìrɔɔ ki ɓum ɓɛ̀cèm.

⁸ Lɛ Nghay à ti à falàg ŋwaàdɛŋ ɗyomzɛ̀n, m̀bobog à Ǹghay ànɛ̀n à fa roàmbog ɓìtòkì ɓi riyi ɗi ɓiɓan.

⁹ M̀bobog à Ǹghay ànɛ̀n à fa roàdɛŋ rìgherɛ̀n, à fa roàmbog ìtèɗ wu wɔ̀ɔwɔɔ̀zìyɛ̀n ɓɛ̀roroɓ.

¹⁰ À fa ŋwaàdɛŋ ìtèɗ wu kìkiyɛn dàm, à fa roàmbog ìtèɗ wu kpaakpaŋzìyɛ̀n ɓìɓan ɓi Bɛ̀ll à rèsii nyi; à fa roàdɛŋ ìtèɗ wulɛ a yi rìghasì ɗi lɛ, rì ɓìɓeɓtàg ɓi mɛghay, rì syeesyee à Ǹghay, à fa tì roàdɛŋ ìtèɗ wu tòtoghɛn ɓìkènekènè ɓi ɓitòkì à ki fa roàdɛŋ ìtèɗ wulɛ a tɛɛ̀zi ɓìɓan ɓi ɓyɛɛ̀ kpaakpaàrɛ̀n ɓi ɓìtòkì ɓiǹ.

¹¹ Lɔŋ m̀bobog à Nghay ànɛ̀n nnyɛɛ̀ kìki ɓiɓan ɓiǹ ɓìcèm, à ki kàakàɓsì ɓyɔ lɛ rì ŋwaànɛ̀n miì à fa com ki à kɔ̀ni.

¹² Ɓisuulɛ nyoo ì mum ì rì lɔŋ bog, wɔ̀lɛ ì teghɛ̀n ɓìkàɓ; kìɓan kifog, nsoò yɛ̀ɛ ɓìkàɓ ɓiǹ ɓìcèm ɓi teghɛɛ bàlì, ɓyɛɛ toŋi lɔŋ mbobog à nyoo, fɔlɔɔ nnɛ Kiris à rì girig.

¹³ Lɛ ɓìsi ɓɛ̀sɛ̀ɛ̀ ɓɛ̀cèm, tì ɓàɓtɛ̀ngà ɓi mbobog à Nghay, lɛ ti ɓa nyoo bogtɛ̀n nsoò Ɓɛ̀yudɛ̀n, nsoò ɓumɓɛ ɓɛ yin Ɓɛ̀yudɛ̀n, nsoò ɓɛ̀kpàn, nsoò ɓumɓɛ ɓɛ yin ɓɛkpàn, fɔɔnnɛ ɓìsiìcèm tì nɔghà m̀bobog à Nghay ànɛ̀n.

¹⁴ Fɔlɔɔ nnɛ nyoo ì mum ì yin lɔŋ kikàɓ kìfog, ì tèghɛɛ ɓìkàɓ.

¹⁵ I ìkòò waa rì lɛ wu kpaa lɛ: Yɛ̀ɛ mɛ̀ ǹ-yin càg, ǹ-yin kikàɓ ki nyoo, fɔlɔɔ a yin lɛ à règ wɔ lɛ wɛɛ ɓa lɔŋ kikàɓ ki nyòò.

¹⁶ I ìreè wu kpaa lɛ: Yɛ̀ɛ mɛ̀ ǹ-yin ɗis, ǹ-yin kikàɓ ki nyoo, fɔlɔɔ a yin lɛ à règ wɔ lɛ wɛɛ ɓa lɔŋ kìkàɓ ki nyòò.

¹⁷ I nyoo bimiɗ yàa rì lɔŋ lɛ ɗis, di mum àrì lɛ à wog ɓìɓan la? Gìn i nyoo bimiɗ yàa rì lɔŋ lɛ ìreè, di lannɛ mum àrì lɛ à wog mɛ̀rùù mɛ ɓyom?

¹⁸ Ɓi saaɗ Bɛ̀ll à fogà kìkàɓ kìcèm ɓi nyoo lɔŋ yɛ̀ɛ ki kɔngà nyi.

¹⁹ I kìkàɓ kɛɛ ɓa lɔŋ kifog di nyoo ì yin gi lɛ ì ɓa.

²⁰ Nni ɓigomìnɛ, ɓìkàɓ ɓi ri ɓìtèghɛn, nyoo ì ɓa lɔŋ bog.

²¹ Fɔɔnnɛ ɗis ɗi yin lɛ ɗi kpaa càg lɛ: Ǹtɔɔgh ɓi com rì wɔ̀; nsoò ǹto, wu yin lɛ wu kpaa mɛ̀kòò lɛ: Ɓì yin mɛ rì gɛɓsɛ̀n.

²² Kìɓan kifog, ɓìkàɓ ɓi ɓi nyoo ɓi ɓyɛɛ̀ seeseèrɛ̀n yɛ̀ɛ ɓi ri kɛ̀ɛ̀ ìtèɗ, ɓi ri rì coo gɛɓsɛ̀n.

²³ Ɓìkàɓ ɓi tì ɓiisɛɛ ɓi ki kuughraagh lɛ ɓi ri bimiɗ à com, ɓyɛɛ̀ɓi tì ti tì ɓiisàg kì ɓèŋi lɛ syeesyee; ɓìsii ri lɔŋ lɛ, ɓìkàɓ ɓi ɓi yin loò ɓìkàɓ ɓi lɛ ɓɛ ɓuŋɓùŋ ɓyɛɛ̀ɓi ɓìsii ɓiisɛ̀n kì ɓèŋɓeŋi ri ɓyoo tikɛɗ.

²⁴ Kɔmiɗ lɛ ɓìkàɓ ɓi ɓi ri ɓyoo ɓikàɓ ɓyɔɔ tɔɔgh ɓi lɛ ɓɛɛ nyaànyààsì ɓyɔ fɔlɔɔ; kìɓan kifog Bɛ̀ll à kìghà nyoo lèg ànɛ lɛ ɓyom ɓi ɓi yin ɗi rìkem, à fa ɓyɔ coo rikem,

²⁵ lɛ di gasɛ̀n yɛ̀ kɛɛ̀ ɓa ɓi nyoo ì mum, ɓìkàɓ ɓìcèm ɓyɛɛ ɓa lɔŋ ɗi zày ìnɛ lɛ ɓyɛɛ ɓeèɓèŋɗɛ̀n ɓyɔ rì ɓyɔ.

²⁶ I kìkàɓ kìfog ki ɓi nyoo ì mum kɛɛ̀ wowog rikɛŋ, ɓìkàɓ ɓìcèm ɓi wog rìkɛŋ nɗaŋ ri kìkàɓ kiǹ. I ɓɛɛ̀ nyaanyaàsì kìkàɓ kìfog ɓi nyoo ì mum, ɓìkàɓ ɓimbog ɓi kaɓɓɛ̀n kìnyàà ki kìkàɓ kiǹ kɛɛ̀ wowòg.

²⁷ Ɓì rì nyoo ì Kiris, mum ǹcèm ànɛ ɓi mìni à rì kìkàɓ kii lɛ rì mum, à ɓa ɓi rìɓa ɗii.

²⁸ Nni Bɛ̀ll à rɛsàkà ɓum ɓi kìseŋi kii fɛlɛ̀: Asu ɓɛ̀kɛ̀nì-fìtom, ɓɛ̀kpaŋzì-ɓìɓan ɓɛ ɓɔ̀ɓ, ɓɛ̀rèsàg ɓɛ yuiy ɓi nɗɛli wu kiraa, ajɛ̀m ìnɛn, rìfa ɗi lɛ ɓum ɓɛɛ kiki dàm ɗi nɔɔ̀tì, mɛ̀faà mɛ yɛ̀ɛ mɛ riwɔ̀ɔ̀wɔ̀ɔ̀zì ɗi ɓɛ̀roroɓ, rì rìghɛɛghɛ̀ɓsì ɗi ɓum ɓɛ nyìinyìg, rì ɗìyi ɗi rilàmì, rì rìtòtòg ɗi ɓitòkì mɛ̀kuu mɛ̀kuu.

²⁹ Ɓì ghɛɛ foo di ɓɛ̀sɛ̀ɛ̀ ɓɛ̀cèm ɓɛ ri ɓɛ̀kɛ̀nì-fìtom? Gìn ɓɛ̀sɛ̀ɛ̀ ɓɛ̀cèm ɓɛ ri ɓɛ̀kpaŋzì-ɓìɓan? Ɓɛ̀sɛ̀ɛ̀ ɓɛ̀cèm ɓɛ ri nya ɓɛ̀rèsàg? Gìn ɓɛ̀sɛ̀ɛ̀ ɓɛ̀cèm ɓɛɛ ti ɓɛ kilàg dàm?

³⁰ Ɓum ɓɛ̀cèm ɓɛ ri nya rì rìfa ɗi lɛ ɓɛɛ wɔɔ̀wɔ̀ɔ̀zì ɓum? Ɓɛ̀sɛ̀ɛ̀ ɓɛ̀cèm ɓɛɛ̀ tòtog nya ɓìtòkì mɛ̀kuu mɛ̀kuu? Gìn ɓɛ̀sɛ̀ɛ̀ ɓɛ̀cèm ɓɛɛ ri nya rì ìtèɗ wulɛ ɓɛ tɛɛ̀zì ɓum ɓìtòkì ɓiǹ?

³¹ Fɔɔnnɛ ɓi ghɛ̀ɛ̀sɛɛ kì ɓaà zày rì mɛ̀faà mɛ mɛ ɓiisɛɛ kì rɔɔtɛɛ. Ǹki rì tì mìni ɓiì rèsii bee inɛ ì ɓɛghɛɛ kìrɔɔ.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan