1 KƆ̀RƐ̀ŊTYƐŊ 11 - Bafia Nouveau Testament

¹ Ɓaana ɓumɓɛ ɓɛɛ̀ nɔ̀ɔnɔɔ̀tì kìfèèghrɛnà kɛm̀ fɛlɛ yɛ̀ɛ mɛ̀ɛmiɗ mɛ̀ɛ nnɔ̀ɔnɔɔ̀tì ki Kiris.

Rìɓa ɗi giɓ a ghɛ̀ɛ̀sɛɛ kì ɓaà ɓi ntaŋzɛn wu ɓɛgherɛ̀n

² Ǹsɛɛgh mìni yɛ̀ɛ ɓi yiiyitàg mɛ̀ ɓyààmɛ̀n ɓìcèm, rì yɛ̀ɛ ɓi ɓèŋɓeŋ deɓ yɛm̀ lɔŋ yɛ̀ɛ mɛ̀ ǹfaghà mìni yɔ.

³ Nni nsoò fɔlɔɔ, kɛɛ̀ kɔ̀nkɔn mɛ lɛ di ɓyàa yii kìɓan ki: Kiris à rì rìfòm ɗi baŋì bimiɗ, baŋì ì ɓa rìfòm ɗi giɓ, Bɛ̀ll à ki ɓa rifòm ɗi Kiris.

⁴ Baŋì bimiɗ ìnɛ yɛɛ̀ kìki bɔ̀ŋzɛ̀n nsoò lɛ ìnɛ yɛɛ̀ kpaakpaŋzì ɓìɓan ɓi Bɛ̀ll à rèsii nyi, di ì rì rì tàm ɓi nto ì yin ɗi bɔgsɛ̀n ɓi san ànɛ yɛ̀ɛ rifòm ɗii.

⁵ Wɔ̀lɛ giɓ bimiɗ ànɛ a kìki bɔ̀ŋzɛ̀n, nsoò lɛ a kpaakpaŋzì ɓìɓan ɓi Bɛ̀ll à rèsii nyi, di à rì ǹto zɛy, à sɛɛtii rìfòm ɗii; ki ri lɔŋ yɛ̀ɛ giɓ anɛ à rì ǹkɛ̀ŋɗɛn kpuu.

⁶ Lɛ i giɓ a yin ɗi yeŋkesì ɓi nto, à ghɛ̀ɛ̀sɛɛ kì kɛ̀ŋɗɛɛ nto; nni i ki ri ǹtoòrìɗ lɛ giɓ a caà tyòŋ tii, nsoò lɛ a kɛŋɗɛn kpuu, à ghɛ̀ɛ̀sɛɛ min ki waatɛɛ yeŋkesì.

⁷ Baŋì ì ghɛ̀ɛ̀sɛɛ ɓi lɛ ì lɔɔghrɛ̀n nto ɓisuulɛ, ì rì kìfèèghrɛnà ki Bɛ̀ll, yɔ̀ tì rìkem ɗi Bɛ̀ll, kɔlɛ giɓ a rì rìkem ɗi baŋì.

⁸ Lɛ àa ɓi giɓ innɛ ɓɛ tekày com ki ɓɛ kighà baŋì rì kɔ, lɔŋ ɓi baŋì innɛ ɓɛ tekà com ki ɓɛ kighà giɓ miì.

⁹ Rì tì lɛ, ɓɛ kighà ɓi baŋì ɓisuu giɓ, lɔŋ giɓ innɛ ɓɛ kighà ɓisuu baŋì.

¹⁰ Kìɓan kiǹ kɛɛ̀ki giɓ a ghɛ̀ɛ̀sɛɛ kì waatɛɛ com ɓi nto, ki kɛɛ̀ rèresi lɛ à rì ɓi rìlàmì ɗi yii, lɛ ɓum ɓɛ titom.

¹¹ Wɔ̀lɛ ɓi Kan ɓi ɗùm, giɓ a yin lɛ ɓɛ ghasì nyi rì baŋì, yɛ̀ɛ baŋì ì yin lɛ ɓɛ ghasì yɔ̀ ri giɓ

¹² ɓisuulɛ lɔŋ yɛ̀ɛ giɓ a kìlɛ̀ngà rì com ki ɓɛ tekày ɓi baŋì, fɔlɔɔ nnɛ baŋì ì ti ì yalàg yì ɓi ɗùm ɗi giɓ, ɓìɓan ɓiǹ ɓìcèm ɓi ti ɓi ɓalàg yì yɛ̀ɛ Bɛ̀ll.

¹³ Mìniìɓɔmiɗ fiɓiina kìɓan kiǹ; ki ghɛɛ̀sɛɛ nya lɛ giɓ a ɓɔŋzi Bɛ̀ll di à rì ǹto zɛy?

¹⁴ Rìɓa ɗi ɓum ɗyɔmiɗ ɗyɛɛ̀ rèresi mini lɛ, ki ri ntoòrìɗ lɛ baŋì yɛ̀ɛ raɓsi tyòŋ.

¹⁵ Kɔm̀ lɛ fɔlɔɔ a rì rìkem ɗi giɓ, ɓisuulɛ tyòŋ ti ràɓ ti falɛ̀ngà yɛ̀ɛ giɓ lɛ tyɛɛ ɓa nyi fɛlɛ yɛ̀ɛ kìlàà ki kɛɛ gheg nyi ǹto.

¹⁶ Wɔ̀lɛ i mum à kɔ̀ni ɓi lɛ a nyolɛn ɓi kìɓan kiǹ, à ghɛ̀ɛ̀sɛɛ kì yiì lɛ ɓìsii yin ɗi kìsyɔ̀ɔ̀ kiǹ, nsoò ɓìseŋi ɓi Bɛ̀ll ɓi yin girig rì kɔ.

Deɓ yi yi seesee kìɓan ki ɓiɗilàg ɓi Bɛ̀ll

¹⁷ Yɛ̀ɛ ǹcee ɓi kìɓan ki ǹɗɔ̀gsɛɛ mìni ki, ǹ-yin ɗi ìtèɗ wulɛ ǹsɛg mìni ɓisuulɛ mɛ̀ghàdà min mɛ maa ghɛ̀ɛ̀sɛɛ kì kìi lɛ ɓi koɓsɛn ɓìɓeɓtàg ɓin ɓi ɓisyɔ̀ɔ̀, mɛɛ̀ kìki ti com ki lɛ ɓi ɗyoŋ̀ à cee fɔlɔɔ.

¹⁸ Kìɓan ki asu ki ri lɛ, nwoki lɛ ɓì ti lɛ, i ɓì taŋzɛɛ rìghàdà, ǹlànag wu ɓa ɓi nyìinyìm wìn, mɛ̀ nki gherɛɛ kìɓan kiǹ gàɓ.

¹⁹ Ki ghɛɛ̀sɛɛ kɔmiɗ lɛ mɛ̀lànag mɛɛ ɓa ɓi nyìinyìm wìn, lɛ di ɓumɓɛ ɓi nɗaŋ win ɓɛ ɓɛ ri ɓɛ̀ sììrɛn ɓɛɛ yilɛn.

²⁰ Ɓì ti lɛ i ɓì taŋzɛɛ, àa ɓìɗilàg ɓi Bɛ̀ll ɓyɛɛ̀ɓi ɓì ti ɓì tekì.

²¹ Ɓisuulɛ mum ǹcèm à ti à rùnàg kì ɗiì ɓìɗilàg ɓii ɓi nyimiɗ ɓi lèg ànɛ lɛ ŋwaàdɛŋ à wowòg zày, roàmbog ǹŋwaŋɛn mɛrɔ̀g.

²² Ɓì yin gi ri mɛɛ mɛ ɓì rì lɛ ɓì kì lɛ, ɓì ɗi, ɓì nɔ wɔɔ? Gìn kìseŋi ki Bɛ̀ll kɛɛ̀ki ɓi sɛɛsɛɛ̀tì, ɓì ki kɔ̀nkɔn lɛ ɓi woòwògsì ɓumɓɛ ɓɛ ri kɛ̀ɛ̀ com ǹtoòrìɗ? Nni cɛ kɛɛ̀ki nkpaa min mini! Ǹghɛ̀ɛ̀sɛɛ nya lɛ nsɛg mìni? Àg! Mɛ̀ ǹ-yin lɛ ǹsɛg mìni ɓi kìɓan kiǹ.

²³ Ɓisuulɛ, rìrèsàg ɗi mɛ̀ ǹtekà yɛ̀ɛ Kan ɗyɛɛɗi mɛ̀ ǹghagsìghà mìni. Lɛ Kan Yeesus, ɓi-ru wu ɓɛ tɔkɛ̀ngà nyi, à tekà bìrɛs

²⁴ fɔɔnnɛ à ɓaghà lɛ, à mɛ fa Bɛ̀ll ɓìtògsɛ̀n nni à ɓɛkà yɔ̀, à kpaa lɛ: Nyoo yɛ̀m yɛ̀ɛ ri lɛ, yɛ̀ɛ ri ǹfayɛn ɓisu win, kìlaaghna kìɓan ki ɓì yitàg mɛ̀.

²⁵ Fɔlɔɔ nnɛ à tekà girig ɓeŋ di ɓaa lègsi ki ɗiì, à kpaa lɛ: Ɓeŋ ànɛ à rì nyɔɔnyɔn à rìràrɛ̀n ànɛ lɛ rì ɓum rì Bɛ̀ll ɓi bwaɓ yɛm̀; ɓì yitàg mɛ̀ cààmɛ̀n kìcèm ki ɓì nɔɔ nyi.

²⁶ Ɓisuulɛ cààmɛ̀n kìcèm ki ɓì ɗii bìrɛs ìnɛ, ɓì ki nɔ ɓeŋ ànɛ, ɓi kakali riwù ɗi Kan, à kpaŋ lɔŋ yɛ̀ɛ à ri yù.

²⁷ Kìɓan kiǹ kɛɛ̀ki, ŋwaànɛ à rì ɓiì ɗiì bìrɛs nsoò lɛ à nɔ beŋ à Kan yɛ̀ɛ ki ghɛɛ̀sɛɛ ɓi, à rì ɓiì terì bɛ̀lɛn ɓi nyoo, rì bwaɓ yi Kan.

²⁸ Nni mum ǹcèm a fiɓɓɛn nyimiɗ di fɔɔnnɛ a ɗi bìrɛs, à nɔ ɓeŋ,

²⁹ ɓisuulɛ ŋwaànɛ à rì ɓiì ɗiì, nsoò lɛ à nɔ, kɛ̀ɛ̀ kì fiɓii nyoo ì Kan, à kìi lɛ, à ɗi, à ki nɔ ncɛ̀m wìì a nyimìɗ.

³⁰ Kìɓan kiǹ kɛɛ̀ki ɓɛ̀roroɓ rì ɓɛ̀lɛnlɛm ɓɛ teghɛɛ miì ɓi nyìinyìm wìn; kɛɛ̀ki gàɓ ì ɓum lɛɛ̀gwey ì mɛ ki cuu.

³¹ I tyàa ti tì fiɓɓàg ɓìsiìɓɔmiɗ, di Bɛ̀ll à yiǹ lɛ à yɔ̀mdì ɓìsi.

³² Wɔ̀lɛ Kan à ti à yɔ̀mgì ɓìsi lɛ a reɓ ɓìsi, lɛ di tyɛ̀ ki teɗ bɛ̀lɛn nɗaŋ ri ziinɛ.

³³ Ɓɔɔsoŋ̀, fɔlɔɔ yɛɛ ri lɛ, cààmɛ̀n ki ɓì taŋzɛɛ ɓi ɓìɗilàg ɓi Bɛ̀ll, ɓì ghɛ̀ɛ̀sɛɛ kì ɓooɓoŋ̀ɗɛ̀n mìni rì mìni.

³⁴ I mum a wowog zày, à ghɛ̀ɛ̀sɛɛ kì ɗiì a mɛɛ mii, lɛ di kɛ̀ ɓi syòŋ yi mìniìɓɔmiɗ ncɛ̀m ɓi nyoo, di ɓì taŋzɛɛ. Ǹɗì ɓiì pègsɛɛ ɓiɓan ɓimbog yɛ̀ɛ ǹɗì ɓiì yùu.