1 KƆ̀RƐ̀ŊTYƐŊ 10 - Bafia Nouveau Testament

Pol à teri dàɗkì rì ɓɔn ɓɛ Isirayɛl ɓi-reɓ

¹ Ɓɔɔsoŋ̀, ǹkɔ̀ni ɓi lɛ ɓi rɔɓ kɛ̀ ɓi yi kiɓan ki; ɓɛ̀seŋi ɓis ɓɛ ɓɛsɛ̀ɛ̀ ɓɛ ɓaghà ɓɛ̀sɛ̀ɛ̀ ɓɛ̀cèm ɓi kìkwìɗ a zi, fɔɔnnɛ ɓɛ̀sɛ̀ɛ̀ ɓɛ̀cèm ɓɛ syaàghà rìɓày à m̀ɓàŋ.

² Fɔɔnnɛ ɓɛ̀sɛ̀ɛ̀ ɓɛ̀cèm ɓɛ ɓaɓtɛ̀ngà ɓi kìkwìɗ azi rì ɓi rìɓày ɓiɗùm, yɛ̀ɛ ɓɛ ɓaghà ɓɛ̀ràrɛn ɗi Moyis.

³ Ɓɛ̀sɛ̀ɛ̀ ɓɛ̀cèm ɓɛ ɗighà rìkuu ɗi ɓiɗilàg ɗi ɓi nghay ɗìfog.

⁴ Ɓɛ ki nɔ rikuu ɗi mɛnig ɗi ɓi nghay dìfog ɓɛ̀sɛ̀ɛ̀ ɓɛ̀cèm, ɓisuulɛ ɓɛ nɔnɔ̀ghà mɛ̀nig mɛ ɓi gɔ̀g ì nghay ìnɛ ì kɛ̀ɛ̀kɛ̀ɛ̀ghà rì ɓɔ; gɔ̀g ìnɛn yɛ̀ɛ ɓaghà Kiris.

⁵ Kìɓan kifog, kìgwey ki ɓi ɓɔ ki kighà ɓi ɓiɓan ɓi ɓyɛɛ rɔɔ̀ Bɛ̀ll. Kìɓan kiǹ kɛɛ̀ki ɓɛ raàrɛ̀ngà miì ɓìloŋ ɓi-reɓ.

⁶ Ɓìɓan ɓiǹ ɓi ri ɓìsi ɓìrèmzɛnà ɓi ɓiɓan, lɛ di tyɛ̀ ki ɓa ri zày ì ɓìɓeɓtàg ɓi ɓiɓan yɛ̀ɛ ìnɛ ɓɔɔ ɓaghà rì yɔ̀.

⁷ Kɛ̀ ɓi ghay ɓɛkìì-ɓìnùn fɛlɛ yɛ̀ɛ ɓum ɓɛdɛŋ ɓɛ ɓi nɗaŋ waa ɓɛ ɓaghà, lɔŋ yɛ̀ɛ ki ri kìkànɛn lɛ: Kìlɔ̀ŋ ki kɔrìghà ɓi zi lɛ kɛɛ ɗi, ki nɔ, ajɛ̀m ìnɛ̀n nnɛ ɓɛ pɛsɛ̀ngà aɗyoo lɛ ɓɛɛ nyuŋzɛn.

⁸ Nni tyɛ̀ ki falɛn ɓi cɛɓ ki tisɔ̀mɔ̀g fɛlɛ yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ falɛ̀ngà, fɔɔnnɛ ɓìloŋ ɓi kpighà ŋwos bog ɓum ɓɛ̀tɔɔsìm rìtin ɗì ɓɛraa.

⁹ Tyɛ̀ ki fèèghrɛn Kan fɛlɛ yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ feeghrɛ̀ngà nyi, ɓumɓɛ̀n ɓɛ cuughà di nyoo yi taɓkii ɓɔ.

¹⁰ Kɛ̀ ɓi ŋwɔ̀ŋwɔŋi Bɛ̀ll yɛ̀ɛ ɓum ɓɛdɛŋ ɓɛ ɓi nyìinyìm wàà ɓɛ ŋwɔŋwɔ̀ŋìghà nyi; ɓɛɛ̀ɓɛ ŋwaà-fìtom a rìwu à cuusìghà.

¹¹ Ɓìɓan ɓiǹ ɓi kikìghà ɓɔ fɔlɔɔ, lɛ ɓyɛɛ ɓa ɓìrèmzɛnà ɓisuu ɓum ɓɛdɛŋ, fɔɔnnɛ ɓɛ kangà ɓyɔ ɓisuulɛ ɓyɛɛ reɓ ɓìsi lɛ tì mɛ wuɓsɛn cààmɛ̀n ki risugtɛ̀n.

¹² Fɔlɔɔ nnɛ ŋwaànɛ à yii lɛ à rì mɛ̀rɛy, à kɔ̀rì ɗyomzɛ̀n lɛ kɛ̀ɛ kpì.

¹³ Ɓì ka tulɛ̀ngà ɓi ri mɛ̀fèèghrɛn mɛdɛŋ, mɛ mɛ cee ìtèɗ wu mum. Bɛ̀ll à ti à roòzàg mɛ̀kàg mii, fɔɔnnɛ àa càɗ ɓi lɛ ɓi tulɛn rì mɛ̀fèèghrɛn mɛ mɛ cee mìni ɓi-tèɗ; wɔ̀lɛ i mɛ̀fèèghrɛn mɛ kpaŋi mìni, à rì mìni ɓiì rèsii bee inɛ ɓì rì lɛ ɓì cee mɔ miì, à ki fa mini ìtèɗ wulɛ ɓi cenɛn mɔ.

Kìɓan ki ɓyɛn ɓi nyàm yi ɓɛ funɛɛ ɓi rìɓɔgsì ɗi ɓìnùn

¹⁴ Kìɓan kiǹ kɛɛ̀ki, mìni ɓɛ̀geni ɓɛ̀m ɓɛ nɗem, cèliina ɓìnùn.

¹⁵ Ntòtog ri mìni yɛ̀ɛ ɓum ɓɛ ɗyomzɛ̀n, mìniìɓɔmiɗ fiɓiina ɓìɓan ɓi nkpaakpàà.

¹⁶ Ɓeŋ à ɓɛ̀mààgh ànɛ tì ti tì falàg Bɛ̀ll ɓìtògsɛ̀n lɛ nyi, à ti kɛ̀ɛ kì nya lɛ ti ɓa ɓɛ̀ràrɛn ɗi bwaɓ yi Kiris? Bìrɛs ìnɛ tì ti tì ɓɛkì, ì ti yɛ̀ kɛɛ̀ kì nya lɛ ti ɓa ɓɛ̀ràrɛn ɗi nyoo ì Kiris?

¹⁷ Nni yɛ̀ɛ bìrɛs ì rì lɔŋ bog, tyàa soo tèghɛɛ, tì rì lɔŋ nyoo bog ɓisuulɛ ɓìsiìcèm ti teteɗ gàɓ ɓi m̀bobog à bìrɛs ànɛ̀n.

¹⁸ Ghɛɛna ɓɔn ɓɛ Isirayɛl; ɓumɓɛ ɓɛ ti ɓɛ ɗilàg ɓìtuwe ɓi ɓɛ woli ɓi rìɓɔgsì ɗi Bɛ̀ll ɓɛ yin nya ɓɛ̀ràrɛn ɗi rìkùna ɗi ɓɛ ti ɓɛ tɔngì ɓyom ɓi ɓɛɛ̀ ɓɔɔɓɔgsì Bɛ̀ll miì?

¹⁹ Fɔlɔɔ a rèsii nya yɛɛ lɔɔ lɛ nkɔ̀nkɔn lɛ ɓyɛn ɓi ɓɛ funɛɛ ɓi ɓìnùn, nsoò ɓìnùn ɓyɔmiɗ, ɓi ri nya rì bimiɗ à rìɓa àdɛŋ?

²⁰ Àg! Wɔ̀lɛ ɓìɓeɓtàg ɓi mɛghay ɓyɛɛ̀ɓi ɓɛ ti ɓɛ funàg ɓyom ɓìn ɓisu waa àa ɓisuu Bɛ̀ll. Nni mɛ̀ ǹkɔ̀ni ɓi lɛ ɓi ɓa ɓɛ̀ràrɛn ɗi ɓìɓeɓtàg ɓi mɛghay.

²¹ Ɓì yin lɛ ɓì kì lɛ: di ɓi nɔ ɓeŋ à Kan, di ɓi nɔ ɓeŋ à ɓìɓeɓtàg ɓi mɛghay fɔɔnnɛ ɓì yin lɛ ɓì kì lɛ: ɓì ɗi ɓi teɓèrè à Kan, ɓì ɗi ɓi teɓèrè à ɓìɓeɓtàg ɓi mɛghay.

²² Ti kɔ̀nkɔn lɛ ti tini Kan lɛ a ki yɔ̀ɔ̀tì gìn? Ɓìsi yɛɛ cee nyi ɓi-tèɗ?

²³ Tì rì rì ìtèɗ wulɛ tì kì ɓìɓan ɓìcèm ɓi tì kɔ̀ni, nni àa ɓìɓan ɓìcèm ɓyɛɛ ri rì gɛɓsɛ̀n. Tì rì rì ìtèɗ wulɛ tì ki com kìcèm wɔ̀lɛ àa kìcèm kɛɛ kìki lɛ ŋwaa siìrɛn ɓi rìgherɛ̀n.

²⁴ Mum kɛ̀ɛ kaaghi kìrɔɔ kii ki nyimiɗ, à kaa lɔŋ ki ɓɛro ɓɛm̀bog.

²⁵ Ɓì rì rì ìtèɗ wulɛ, ɓi ɗi com kìcèm ki ɓɛɛ̀ kàkaɓ a fyèè, kɛ̀ɛ̀ mɛ̀riighrikì ɓi nɗem ɓisuu kiɓan ki righerɛ̀n.

²⁶ Ɓisuulɛ, zi rì ɓyom ɓìcèm ɓi miì, ɓi wooghrɛɛ rì Kan.

²⁷ I ŋwaànɛ à yin ngherɛ̀n à lààghraagh mìni, ɓì ki gherɛn lɛ ɓi kɛǹ, ɓì ghɛ̀ɛ̀sɛɛ kìɗiì com kìcèm ki ɓɛ faa mìni, kɛ̀ɛ̀ mɛ̀riighrikì ɓi nɗem ɓisuu kiɓan ki righerɛ̀n.

²⁸ Kìɓan kifog, i ŋwaà kpaa mìni lɛ, ɓyom ɓi, ɓi ri ɓyom ɓi ɓɛ nfùnɛɛ ɓi ɓìnùn, ɓì ghɛ̀ɛ̀sɛɛ ɓi ɓyɔ kì ɗiì, lɛ kɛ̀ ɓi kɛ̀ɓti ŋwaànɛ àa kalii mìni fɔlɔɔ fiɓàg rì tì lɛ, nɗem wɛ̀ kɛɛ̀ fa mini bɛ̀lɛn.

²⁹ Kìɓan ki nkpaakpaa ki, ki seesee ɓi nɗem win wu righerɛ̀n wɔmiɗ, ki ri ɓisuu nɗem wu righerɛ̀n wu ŋwaànɛ̀n. Nni ɓisuucɛ nnɛ rìɓa ɗyɛ̀m ɗi ǹɗì rì ìtèɗ wu kìyɛn com kìcèm ki ǹkɔ̀ni ɗi ri lɛ ɗi ɓa rì mɛ̀rèè lɛ nɗem wu righerɛ̀n wu ŋwaàdɛŋ?

³⁰ I mɛ̀ ǹfaa Bɛ̀ll ɓìtògsɛ̀n ɓisuu com ki nɗiɗì, ɓisuucɛ nnɛ ɓɛ ri lɛ ɓɛ totòg mɛ̀ kìɓe ɓi ɓìɗilàg ɓi m̀mɛ fa Bɛ̀ll ɓìtògsɛ̀n miì?

³¹ Ɓyàa soo ɗiɗì, ɓyàa soo nɔnɔ, nsoò cɛ kɛɛ̀ki ɓyàa kìkì, kìina ɓìɓan ɓìcèm ɓisuu rikem ɗi Bɛ̀ll.

³² Kɛ̀ ɓi ɓa gɔ̀g ìnɛ ì rì lɛ ì kɛ̀ɓtì nsoò muu Ɓɛ̀yudɛ̀n nsoò muu Gìrɛg nsoò kìseŋi ki Bɛ̀ll fìɓàg.

³³ Fɛlɛ yɛ̀ɛ mɛ̀ɛ ntèeteèsì nyoo lɛ mpuɓsi ɓum ɓɛ̀cèm mɛ̀rem ɓi ɓìɓan ɓicèm; mɛ̀ ǹ-yin ɓiì kaakaa kirɔɔ kɛ̀m ki mɛ̀ɛmiɗ, nkaakaa lɔŋ kirɔɔ ki ɓum lɛɛ̀gwey lɛ di ɓɛɛ ghɛǹ cɛɓ.