Bìoball air-loidhne

1 KƆ̀RƐ̀ŊTYƐŊ 1 - Bafia Nouveau Testament

Ɓɛ̀ Pol ɓɛ tògsiì ɓɔ

¹ Mɛ̀ Pol ànɛ ǹɗì ǹɗeŋiyɛn lɛ mɓa ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll, rì Sostɛn à geni wìs.

² Tì kàni kìseŋi ki Bɛ̀ll ki ki ri a Kɔrɛŋt, rì ɓumɓɛ ɓɛ ri ɓɛ̀tɛnɛn ɓi Yeesus Kiris ɓi ɗùm ɓɔ yɛɛ ri ɓɛ̀reŋiyɛn lɛ ɓɛɛ ɓa ɓɛ̀gherɛ̀n, rì ɓum ɓɛ̀cèm ɓɛ ɓɛɛ̀ rereŋi ɗii ɗi Kan wìs Yeesus Kiris ɓaa soo rì fe, lɛ Yeesus à rì Kan wàà, nyi tì Kan wìs.

³ Bɛ̀ll à Seŋi wìs ɓɛɛ̀ Kan Yeesus Kiris ɓɛɛ fa mìni lɛ rì geesɛ̀n rì fyòoog.

⁴ Mɛ̀ɛ nfafa Bɛ̀ll ɓìtògsɛ̀n kɛ̀ɛ nfɔy ɓisu win, lɛ geesɛ̀n ì Bɛ̀ll ìnɛ ì falɛ̀ngà a lɔ̀ŋkin ɓi Yeesus Kiris.

⁵ Rì tì lɛ ɓi Kiris, ɓì mɛ teɗ ɓɛmààgh ɓɛ̀cèm, à ɓiisɛ̀n ɓɛ ɓɛ seesee kìtòkì, rì rìyi ɗi ɓiɓan.

⁶ Lɛ rìrèsì ɗi ɓiɓan ɓi ɓi seesee cɛɓ ki Kiris ɗi mɛ ɓag gàŋ ri ìtèɗ a lɔ̀ŋkin.

⁷ Fɔlɔɔ nnɛ com kidɛŋ ki kaarɛɛ tì ɓi mini ɓi rìɓoŋ ɗi ɓi ɓoŋɓoŋ cààmɛ̀n ki Yeesus Kiris à Kan wìs à ri rèsɛn ti.

⁸ Nyi yɛɛ ri mìni ɓiì sììraagh à kpaŋ a rìsugtɛ̀n lɛ ɓi ɓa kɛ̀ɛ̀ kìɓan ki ɓɛ ri lɛ ɓɛ ɓɛy mìni miì, ɓi ŋwos a Yeesus Kiris à Kan wìs.

⁹ Bɛ̀ll ànɛ à reŋìghà mìni lɛ ɓi ghɛɓ ɓɛ̀ràrɛn ri Man wiì Yeesus Kiris ànɛ à rì Kan wìs, à rì Bɛ̀ll ànɛ à ti à roòzàg mɛ̀kàg mii.

Ǹlànag wu wu ri ɓi kìseŋi ki a Kɔrɛŋt

¹⁰ Ɓɔɔsoŋ̀, ǹtɔɔgh mìni ɓi ɗii ɗi Kan wìs Yeesus Kiris lɛ, wooghrɛɛna jɛ̀ɛ̀, yɛ̀ɛ gasɛ̀n yɛ̀ kɛɛ̀ ɓa ɓi nyìinyìm wìn, kìɓan kifog, ɓaana ɓɛ̀ràrɛn kɔɔ̀kɔɔ̀ à rìràrɛ̀n, ɓì ɓa nɗem wufog rì fèg bogtɛ̀n.

¹¹ Ɓɔɔsoŋ̀, ɓisuulɛ ɓum ɓɛdɛŋ ɓɛ ɓi naa ì Kilowee ɓɛ nkpaa mɛ̀ lɛ, ɓì rì rì ɓɛ̀paàzì ɓi nyìinyìm wìn.

¹² Nkɔ̀nkɔn lɛ nkpaà yɛɛ lɔɔ lɛ, ɓì rì lɛ: Rì wàànɛn miì ù kpaa lɛ: Mɛ̀ ǹɗì ŋwaà Pol; roànɛ lɛ: Mɛ̀ ǹɗì ŋwaà Apolos, roàmbog lɛ: Mɛ̀ ǹɗì ŋwaà Sefas, roàdɛŋ tì lɛ: Mɛ̀ ǹɗì ŋwaà Kiris.

¹³ Kiris à ti nya ǹlàngakɛn? Gìn Pol à wughà nya ɓi kɔrɔs ɓisu win? Nsoò lɛ ɓɛ ɓaɓtàkà nya mìni ɓi ɗii ɗi Pol gìn?

¹⁴ Ǹfaa Bɛ̀ll ɓìtògsɛ̀n lɛ m̀ɓàɓtìghà ɓi kibog ki ɓi mìni i ki cee ɓi lɛ ɓɛ̀ Kirispus ɓɛɛ̀ Gayus.

¹⁵ Fɔlɔɔ nnɛ wààdɛŋ ù yin lɛ ù kpaa lɛ ɓɛ ɓaɓtìghà mìni ɓi ɗii ɗyɛ̀m.

¹⁶ M̀ɓàɓtìghà tì girig naa ì ɓum ì Sitefanas ɓi ɓɛg ànɛ a ɓɛ̀ro ɓɛmbog, ǹ-yii ɓi nkòo m̀ɓàɓtìghà tì ŋwaàdɛŋ.

Ɗyomzɛ̀n ɗi ɓi ziinɛ, rì ɗyomzɛ̀n ɗi Bɛ̀ll

¹⁷ Ɓisuulɛ Kiris à romgày ɓi mɛ lɛ mɓààɓàɓtì ɓum, wɔ̀lɛ à romgày mɛ̀ lɛ nkakali Syeesyee à Ɓɔlɛ, ǹki kì kiɓan kiǹ kɛ̀ɛ̀ ɗyomzɛ̀n ɗi ɓitòkì, lɛ di kɛ̀ kɛɛ̀ ɓa yɛ̀ɛ kɔrɔs à Kiris à rì com ki zɛy.

¹⁸ Ɓisuulɛ rìlààlàmɓɛ̀n ɗi kɔrɔs ɗi ri kìɓan ki kiyèg ɓisuu ɓumɓɛ ɓɛ ghɛɛ̀sɛɛ kì ɗyaŋì, wɔ̀lɛ ɓisuu ɓisi ɓɛ tì rì rì cɛɓ, ɗi ri ìtèɗ wu Bɛ̀ll.

¹⁹ Lɛ ki ri kì kànɛn lɛ: Ǹɗì ɓiì yogsii ɗyomzɛ̀n ɗi ɓumɓɛ ɓɛ wom̀zɛɛ, ǹki tììsi riyi ɗi ɓɛyiì-ɓìɓan.

²⁰ Nni ŋwaà ɗyomzɛ̀n im̀be? Ǹɗèsàg ɓìdɔ̀gsɛna im̀be? Nni ǹkìì-nyoey anɛ ɓi ziinɛ à rì fe? Bɛ̀ll à rèsìghà lɛ ɗyomzɛ̀n ɗi ɓumɓɛ ɓi ziinɛ ɗi ri kìyèg.

²¹ Lɛ yɛ̀ɛ ɓumɓɛ ɓi ziinɛ ɓɛ ɓaghà ɓi lɛ ɓɛ yi Bɛ̀ll rì ɗyomzɛ̀n ɗyaa jàŋ inɛ ɗyomzɛ̀n ɗi Bɛ̀ll ɗyɛɛ̀ rèeresɛ̀n, nni Bɛ̀ll à kɔ̀ngà lɛ a ghɛɓsi ɓumɓɛ ɓɛ gherɛɛ nyi, rì kìyèg ki kiɓan ki ɓìsiì làalamɓɛ̀n.

²² Ɓɛ̀yudɛ̀n ɓɛɛ̀ tɔtɔg dàm yi ɓiɓan, Gìrɛg yɔ̀ɔ̀ tɔtɔ̀g ɗyomzɛ̀n.

²³ Wɔ̀lɛ ɓìsiì làalam̀ɓɛ̀n Kiris ànɛ ɓɛ kpangà ɓi kɔrɔs aɗyoo, kìɓan kiǹ ki ri kìɓan ki kɛɛ̀ kɛ̀ɛkɛɓtì Ɓɛ̀yudɛ̀n fìɓàg, ki ɓa kìɓan ki kiyèg ɓisuu ɓumɓɛ ɓɛ yin Ɓɛ̀yudɛ̀n.

²⁴ Wɔ̀lɛ ɓi ɓɛ̀roɓɛ Bɛ̀ll à reŋighà, à tumɛ̀n lɛ Ɓɛ̀yudɛ̀n à kpaŋ lɛ ɓumɓɛ ɓɛ yin Ɓɛ̀yudɛ̀n, Kiris à rì lɛ nyi ìtèɗ wu Bɛ̀ll, nyi ɗyomzɛ̀n ɗi Bɛ̀ll.

²⁵ Ɓisuulɛ kìɓan kicèm ki Bɛ̀ll à kìi ki pisɛ̀n kìyèg ki kiɓan, ɓi rìghɛn ɗi ɓum, ki cee ɗyomzɛ̀n ɗi ɓum, ki ɓɛ ghɛɛ ìkɔ̀g wu Bɛ̀ll miì, ki cee ìtèɗ wu ɓum.

²⁶ Ɓɔɔsoŋ̀, ghɛɛna lɛ, ɓi mìni ɓɛ Bɛ̀ll à reŋìghà, ɓum ɓɛ ɗyomzɛ̀n ɓɛ tɔɔ ɓi, ɓi rìghɛn ɗi ɓum, ɓɛ̀tèteɗ ɓɛ̀ kɛɛ̀ tɔɔ, ɓum ɓɛ mii ɓɛ̀ kɛɛ̀ ki tɔ̀ɔ̀.

²⁷ Wɔ̀lɛ Bɛ̀ll à ɓɔ̀ngà ɓìɓan ɓi ziinɛ yɛɛ̀ seesee lɛ ɓìyèg ɓi ɓiɓan, lɛ a fa ɓum ɓɛ ɗyomzɛ̀n ǹtoòrìɗ, à ɓɔ̀n ɓyom ɓi ɓi ri kɛ̀ɛ̀ ìtèɗ, lɛ a fa ɓɛ̀tèteɗ ǹtoòrìɗ.

²⁸ Bɛ̀ll à ɓɔ̀ngà ɓyom ɓi nnyuŋì ɓi ɓi ziinɛ, rì ɓyom ɓi ɓum ɓɛɛ̀ sɛɛsɛɛ̀tì, ɓi ɓi yin ɓɛ bimiɗ ɓɛ ɓyom lɛ, a ghaasi ɓyom ɓi ɓi ri lɛ gìn i ɓyom, ɓyom ɓi zɛy.

²⁹ Lɛ di mum kɛ̀ɛ nyìnɛn càg ɓi dwey ɓi mis mɛ Bɛ̀ll.

³⁰ Wɔ̀lɛ Bɛ̀ll à ràɗkà mìni rì Yeesus Kiris à ki kì lɛ Kiris a ɓa ɗyomzɛ̀n ɗis, fɔɔnnɛ tì ti ɓum ɓɛ saaɗ ɓi mis mii lɛ Kiris; tì ti ɓi nɗɛli wulɛ ti ghɛɓ cɛɓ ki tɛnɛn, tì ki ɓa ɓumɓɛ ɓɛ ti ɓɛ̀kòrɛn ɓi kìɓe.

³¹ Fɛlɛ yɛ̀ɛ ki ri kì kànɛn lɛ: Ŋwaànɛ à kɔ̀ni kalɛn, a kaàkàlɛ̀n ɓi Kan ɓi ɗùm.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan