Zakarias 6 - Biblia ande chib Romani

E poroka katar e star bordona marimake

¹ Mapalal pale vazdiem me akha, ta dikhlem kai star bordona likena maskar e burdura. Ta e burdura sea tuchne.

² O purvo bordon inllarena le gra lole. O duito bordon inllarena le gra kale.

³ O trito bordon inllarena le gra parrne ta o starto bordon inllarena le gra kai dikhona sargo molivi.

⁴ Ta puchlem e suecho kai dela orba manchar, ta phendem leke: ¿Mo glamno gazda, so si gala?

⁵ Ta o suecho phenda mange: Gala si e star balavia e milosoke kai liken angla o Del sa e phuviako.

⁶ O bordon kai inllarena le e gra kale llelo karing e phuv kai si ando norte, ta o bordon kai inllarena le e gra parrne llelo pala le. O bordon kai inllarena le e gra kai dikhona sargo molivi llelo ando sur.

⁷ E gra kai dikhona sargo molivi likiste te llan pe phuv. Ta o suecho phenda: Llan pe sa e phuv. Ta von llele.

⁸ Mapalal o suecho ikharda man ta phenda mange: Dik, e gra likiste karing e phuv kai si ando norte, ta ka cheren te lelpe mandar e joli ande goia phuv.

⁹ O Del phenda mange, ta phenda mange:

¹⁰ O Jeldai, o Tobias ta o Jedaias sea phangle ande Babilonia, a irisaile kotar. Goleke lla isto allive kai o cher e Josiaseko chavo katar o Sofonias, ta le len.

¹¹ Le chuke rup ta sunakai ta cher korone. Thou iek lendar po soro katar o baro popo o Josue chavo katar o Josadak,

¹² ta phen leke: Gia phenel o Del kai si le sa e zor: Gava si o lleno kai leko anav si nevi patrin zeleni soke letar ka liken krangura zelene. Vou ka vazdel o cher e Devleko.

¹³ Ka vazdel o cher ta ka den le liubao ta ka besel po trono te sai charoil. Ta pasa le ka besel iek popo, ta maskar lende ka avel e pas.

¹⁴ Ta e korone ka achen ando cher e Devleko te sai denpe golli katar o Jeldai, o Tobias ta o Jedaias.

¹⁵ Ta gola kai si dur, ka aven ta ka pomozin te vazden o cher e Devleko. Gia ka llanen kai o Del kai si le sa e zor bichalda man. Gua ka avelpe te asunen e Devleko avazi ta te cheren leki volia.