Zakarias 5 - Biblia ande chib Romani

E poroka katar o lil

¹ Vazdiem me akha ta dikhlem iek lil kai furiala.

² Ta o suecho puchla man: ¿So dikhe? Ta me phendem leke: Me dikhav iek lil kai furial. Si le inia pole ando lungipe ta star pole ta dopas ando bulipe.

³ Ondaka o suecho phenda mange: Gala si e armaia kai ka perel pe phuv. Suako lleno chorano, ka ave zatrime, sar si pisime pe iek rig katar o lil. Ta suako lleno kai jal sovel bange, i vou ka avel zatrime, sar si pisime pe aver rig katar o lil.

⁴ Me cherav te perel e armaia po cher katar o chorano, ta po cher katar o lleno kai jal sovel bange. Ta e armaia ka achen sogo ni ka achen e kasta ta e barra katar gola chera.

E poroka katar e ezgoda kai phariavel ta e diskinia

⁵ Mapalal o suecho kai dela orba manchar phenda mange: Vazde che akha, ta dik so likel.

⁶ Ta me puchlem: ¿So si gaia ezgoda? Ta vou phenda mange: So likel si o molivi kai phariaven lea. Ta phenda: Gua molivi kai phariavel si lengo bilachipe ande sa e phuv.

⁷ Ondaka ikanda o kapako katar o molivi kai phariaven lea, ta andre saia iek diskinia besindo.

⁸ Ta o suecho phenda mange: Goia si o bilachipe. Samo phenda le, ta chudia e diskinia andre katar o molivi kai phariaven lea, ta ucharda la e kapakoia.

⁹ Mapalal dikhlem duie diskinien kai sea len pakha ta e balav inllarela len. E pakha sea sargo pakha chirikliake. Ta e diskinie vazdie o molivi kai phariaven lea ta inllarde la upre, maskar e phuv ta o miloso.

¹⁰ Ta puchlem e suecho kai dela orba manchar: ¿Kai inllaren o molivi kai phariaven lea?

¹¹ Ta o suecho phenda mange: Kai e Babilonia, kote ka vazden iek cher. Ta kana ka vazden le, ka thoven o molivi kai phariaven lea pe iek barr.