Zakarias 4 - Biblia ande chib Romani

E poroka katar o kandelabro ta e maslinke

¹ O suecho kai dela orba manchar, pale avilo ta llungada man, sargo kana llungadon katar iek suno,

² ta phenda mange: ¿So dikhe? Ta me phendem leke: Me dikhav iek kandelabro sunakuno ta upral pe lete iek taso e zeitinoke. Efta lampare si upral, ta suako iek si la efta va.

³ Pasa o kandelabro si dui kasta maslinkenge, iek pe chachi katar o taso e zeitinoke, ta aver po stingo.

⁴ Ta puchlem e suecho kai dela orba manchar: Gazda, ¿So si gava?

⁵ ta o suecho kai dela orba manchar phenda mange: ¿Ni llane so si gava? Ta me phendem leke: Iok, gazda.

⁶ Ondaka o suecho phenda mange: Gava si o alav e Devleko e Zorobabeleke, kai phenel leke: Man ni trubul ni e boñikura ni e zor, man trubul samo mo duo te cherav so mangav. Me o Del phenav le.

⁷ ¿Ko san tu, baro burdo? ¡Angla o Zorobabel ka ave sargo bari umal! Soke vou ka ikanel o barr mai preche ta e llene ka phenen urkindo: ¡Gia sukar o barr!

⁸ Mapalal o Del phenda mange:

⁹ O Zorobabel ka thovel e barra kai llan telal katar e zidura te sai vazden o cher, ta isto vou pe vastenchar ka gotovil o rado. Gia ka llanen kai o Del kai si le sa e zor, bichalda man.

¹⁰ Soke gola kai marde espurnia kana thovenape te vazden o cher, ka veselinpe kana ka dikhen kai o Zorobabel gotovil sa o rado. Gala si e efta akha e Devleke kai llan pe sa e phuv.

¹¹ Ta me puchlem le: ¿A so si gala dui kasta maslinkenge, iek pe suako rig katar o kandelabro?

¹² Ta i puchlem le: ¿A so si e krangura maslinkenge kai katar leke va perel o zeitino sargo sunakai?

¹³ Ta o suecho phenda mange: ¿Ni llane so si? Ta me phendem leke: Iok gazda, ni llanav.

¹⁴ Ta phenda mange: Gala si e dui llene esvirime te aven popura angla o Del katar sa e phuv.