Zakarias 3 - Biblia ande chib Romani

E poroka katar o baro popo o Josue

¹ Mapalal o suecho sikada mange e bare popo e Josuee, kai saia angla o suecho e Devleko. Ta pe leki chachi saia o satanas te dosarel le.

² Ta o Del phenda e Satanaseke: ¡Sem joliariko pe tu satanas. Me esvirisardem e Jerusaleme, ta gale llene braduisardem le katar e iag sargo iek angar phabardo. Goleke, me o Del sem joliariko pe tu!

³ Ta sar o Josue saia angla o suecho ta leke patave sea melale,

⁴ o suecho phenda golenge kai radina leke: ¡Ikanen letar e patave melale! Ta e Josueke phenda: Dik, me jaladem cho bilachipe, ta furiadem tut patavenchar barikane.

⁵ Mapalal phenda: Thoven pe leko soro iek dikhlo chisto. Ta thode iek dikhlo chisto pe leko soro, ta furiade le patavenchar barikane. Ta o suecho e Devleko saia pe porrne.

⁶ Mapalal o suecho e Devleko dia po Josue, ta phenda leke:

⁷ Gia phenel o Del kai si le sa e zor: Te llelan pe me droma ta te chere so me phenav, i tu ka gazdari ande mo cher ta ka arakhe me bar, ta ka dav tut iek than maskar e llene kai si kate.

⁸ Asun Josue, kai san o baro popo. Asunen che amala kai si popura, kai sa tumen si iek bari ezgoda Devlikani. Me ka cherav te avel me slugake e nevi patrin zeleni.

⁹ Dik po barr kai thodem angla tu kai si le efta akha. Me ka pisiv ande le iek pisipe. Ta samo ande iek llive ka ikanav katar e phuv o bilachipe.

¹⁰ Kana ka avel gua llive, suako iek tumendar ka ikharel pe pharnave te besel telal tala po kas drakhako, ta kas simochinengo.