Zakarias 2 - Biblia ande chib Romani

E poroka katar o solo kai llindon lea e pole

¹ Pale vazdiem me akha, ta dikhlem iekhe llene kai ande po va inllarela iek solo te llinel e pole.

² Ta puchlem le: ¿Kai lla? Ta vou phenda mange: Llav te llinav e pole katar o Jerusalem, te dikhav gachin pole si le ando bulipe ta ando lungipe.

³ Ta kana llalatar o suecho kai dela orba manchar, avilo lete aver suecho,

⁴ ta phenda leke: Praste ta phen gale terneke: Ando Jerusalem ka zivin gachin llene, ta ka aven gachin zivirinie, kai e foro ni ka avel le zidura truial.

⁵ Me ka avav sargo iek zido iagako truial letar, ta ande le ka sikavav mi dragostia. Me o Del phenav le.

O Del ka braduil pe foro

⁶ ¡Liken akana katar goia phuv kai achel ando norte! Phenel o Del. ¡Me rispisardem tumen pe star riga kai phurden e balavia! Phenel o Del.

⁷ Sion, tu kai zivi e chorraia katar e Babilonia, ¡Nas akana!

⁸ Gia phenel o Del kai si le sa e zor, ta kai bichalda man te phenav e phuvienge kai lie tumendar sa: Vareko te dodila tumen, dodil andre ande me akha.

⁹ Me ka vazdav me va pe lende, ta ka cherav te choren len isto lenge sluge. Gia ka llanen kai o Del kai si le sa e zor bichalda man.

¹⁰ Llilabe, veselisao chorri katar o Sion, soke me ka avav tute, ta po maskaral tutar ka ziviv. Phenel o Del.

¹¹ Kana ka avel gua llive, but phuvia ka aven mande, ta ka aven mange sargo foro, ta po maskaral tutar ka ziviv.

¹² Ta o Del pale ka cherel te avel o Juda leki ezgoda mai sukar ande leki phuv santa, ta i ka esviril e Jerusaleme.

¹³ ¡Sa o sueto te na phenel niso angla o Del, soke vou amende katar po santo than kai zivila!