Zakarias 1 - Biblia ande chib Romani

O Del ikharel pe foro

¹ Ando ojtoto chon katar o duito burs kai gazdarila o Dario, avilo o alav e Devleko kai o profeta o Zakarias, chavo katar o Berekias ta unuko katar o Ido, ta phenda gia:

² O Del si but joliariko tumare dadenchar.

³ Goleke phen e foroke gia: Gia phenel o Del kai si le sa e zor: Irin tumen mande, ta me ka iriv man tumende. Me o Del phenav le.

⁴ Te na aven tumen sargo tumare dada, kai e poraukura kai sea omanglal phenena lenge: Gia phenel o Del kai si le sa e zor: Irin tumen katar tumare bilache droma, ta katar e bilache ezgode kai cheren. A von ni thode sama ta ni asunde man. Me o Del.

⁵ ¿A kai si akana tumare dada? ¿Zivin akana e poraukura?

⁶ ¿A e alava kai diem me slugen e poraukura ni resle kai tumare dada? Goleke von irisaile mande, ta phende: O Del kai si le sa e zor, cherda amenge prema amare ezgode kai cherdam.

O sargo iek suno katar e llene kai llana pe gra

⁷ Ando bis ta starto llive katar o desuiekto chon, kai si o chon o Sebat, ando duito burs kai gazdarila o Dario, o alav e Devleko avilo kai o Zakarias chavo katar o Berekias, unuko katar o Ido, ta phenda gia:

⁸ Iek riat dikhlem kai iek lleno kai llala pe iek gra lolo. Vou saia ande bari umal maskar e kasta, ta pala le sea aver llene kai llana pe gra lole, galbene ta parrne.

⁹ Ta me puchlem: Mo glamno Gazda, ¿ko si gala llene kai llan pe gra? Ta o suecho kai saia manchar, phenda mange: Me ka sikavav chuke ko si gala llene.

¹⁰ O lleno kai saia maskar e kasta phenda: Gala si e llene kai o Del bichalda te llan pe sa e phuv.

¹¹ Ondaka e llene kai llana pe gra phende e suechoke e Devleko kai saia maskar e kasta: Llelam pe sa e phuv ta dikhlam kai voi si ande pas.

¹² Ta o suecho e Devleko phenda: Devla, cheren eftavardes burs kai san joliariko po Jerusalem ta pe forura katar o Juda. ¿Gachin vreme ios ka nakhel lligo ni ka avel chuke zalba lendar?

¹³ Ondaka o Del phenda ande sukar alava e suechoke kai dela orba manchar.

¹⁴ Ta o suecho phenda mange: Phen bare avazea: Gia vacharel o Del kai si le sa e zor: Me voliv but e Jerusaleme ta e Sione.

¹⁵ Sem joliariko e phuvienchar kai zivin esmiro, soke von cherde te bariol mi joli.

¹⁶ Goleke gia phenel o Del: Pale ka avel mange zao katar o Jerusalem, ta ka cherav te vazden pale mo cher, ta sa o foro. Me o Del phenav le.

¹⁷ Pale phen bare avazea: Gia phenel o Del kai si le sa e zor: Me forura pale ka aven barvale, a me o Del, ka dav zor e Sione ta pale ka esviriv e Jerusaleme.

E poroka katar e singa ta e llene kai radina ande kasta

¹⁸ Mapalal vazdiem me akha, ta dikhlem star singa.

¹⁹ Ta puchlem e suecho kai dela orba manchar: ¿A so si gala? Ta o suecho phenda mange: Gala si e singa kai rispisarde e Judae, e Israele ta e Jerusaleme.

²⁰ Mapalal o Del sikada mange star llene kai radina ande kasta,

²¹ ta me puchlem: ¿So aven te cheren gala llene? Ta o suecho phenda mange: E singa si gola kai rispisarde e Judae ta niko nasti vazdia po soro, a gala llene avile te peraven e singa katar e phuvia kai die po Juda ta rispisarde leke llenen.