Tito 1 - Biblia ande chib Romani

Salami

¹ Me o Pablo, sluga e Devleko ta apostol e Jesukristoko, bichaldo letar te resen e llene kai si esvirime e Devletar kai o pachape ta kai o chachipe kai si ande so amen pacha,

² ta adurichara o zivoto ostade, soke o Del ni kojavel ta dia po alav omanglal ta phenda kai ka del amen gua zivoto,

³ ta akana kai si orta o vreme, sikada pe alava e orbaia kai mukla mange o Del kai braduil amen.

⁴ E Titoke, kai si sargo mo chaurro chachimaia ando pachape kai si amen. O Del amaro Dad, ta o Jesukristo kai braduil amen te den tut po volipe ta pi pas.

O rado e Titoko ande Kreta

⁵ Kana muklem tut ande Kreta, cherdem le te lachare so muklana bi lachardo ta ande suako foro te thove phuren ande khanlliri, gia sar phendem chuke.

⁶ Iekhe phure morabi te na dosarel le niko sar zivil. Morabi te avel le samo iek rromi, ta leke chaurre morabi te pachan ta te na phenen lendar kai cheren o bilachipe o kai ni kanden.

⁷ Soke gua kai inllarel angle e khanlliri leko rado si ande Devleke ezgode, ta goleke leko zivoto morabi te na avel dosardo nikatar, morabi te na istardon ta te na joliaol; te na aven matarne, ta te na marenpe, ta te na lel chari pe bilache ezgode.

⁸ Morabi te avel pachivalo e llenenchar kai aven te racharen ande leko cher, ta morabi te avel lacho, chacho, santo ta te llanel so cherel.

⁹ Morabi te pachal ande orba chachuni kai sikilo, te del zor i averen ando sasto sikadipe, ta te cherel te pachan e llene kai ni pachan ande so vou phenel.

E poraukura kojamne

¹⁰ Soke si but llene kai ni pachan, ta mai but gola kai cheren e sirkunsision kai phenen samo ezgode dile ta kojaven e llenen.

¹¹ Gole llenengo mui morabi te phanden le, soke diliaren sa e llenen katar iek familia, ta sikaven so ni trubul, ta cheren le te len chari bilachimaia.

¹² Isto ande Kreta iek profeta lengo phenda gia: E llene kai zivin ande Kreta si kojamne, dive, jan but ta ni radin.

¹³ Ta phenda o chachipe, goleke de pe lende zurale te sastol lengo pachape

¹⁴ ta te na pachan ande paramiche kai cheren e judiura, ta ni ande llene kai den e zea karing o chachipe.

¹⁵ E llene kai si chache sa e ezgode si lenge chache, a e llene kai inai chache ta ni pachan, niso inai lenge chacho, soke lengi golli ta lenge mislura si melale.

¹⁶ Phenen kai pinllaren e Devle, a prema e ezgode kai cheren phenen kai iok, den joli ta ni kanden ta nasti cheren ni iek lachipe.