Sofonias 3 - Biblia ande chib Romani

O bilachipe katar o Jerusalem ta leko braduipe

¹ ¡Tesko chuke foro kai ni kande, makhlo, ta kai ustave averen!

² Ni asundan o avazi e Devleko ta ni kamlan te lachardol. Ni uzdisaila ando Del ta ni avilan pasa le.

³ Che gazda si sargo lionura kai basen. Che krisaria si sargo ruva kai llan orachaia ta thiarinako ni muken ni iek kokalo.

⁴ Che poraukura si dusmanura. Che popura ni chitilpe lenge so si santo ta so inai santo, phagle o zakono.

⁵ A o Del si ando foro, vou cherel so si lacho, a na so si bilacho. Ando villelo thiarinako chinel e kris, a o bilacho lleno ni pinllarel o lallao.

⁶ Gia phenel o Del: Zatrisardem e phuvien peradem e chera zurale kai sea pe zidura, cherdem te na avel niko pe lenge droma, te na avel niko te nakhel ande lende. ¡Ande lenge forura ni achel ni iek lleno!

⁷ Mislisailem: Gia ka daral mandar o Jerusalem ta ka lel mo sikadipe ta ni ka avel zatrime leko cher pala e duk kai diem le. A von sigarde te cheren suako bilachipe.

⁸ Goleke, aduricharen man, phenel o Del. Kana ka avel o llive kai ka ustav te krisiv tumen. Me ka chidav e phuvien ta e charoinen te chudav pe lengo soro mi joli, mi joli kai si sargo iag ka phabarel sa e phuv.

⁹ Ande gua vreme ka chistou e chibia katar e phuvia te sai blagosin mo anav kai si Jeova, te sai radin mange sa e llene ande iek mislo.

¹⁰ Katar ogoia rig katar e lena kai si ando Etiopia mo foro ka avel te molilpe mange. Mo foro kai si rispime ka anel mange ofrenda.

¹¹ Ande gua vreme ni ka ja lallao pala ni iek ezgoda kai ni kandian man, soke ka ikanav tutar e llenen kai istardon, ta nikada ios ni ka fali tut pe mo santo burdo.

¹² Me ka mukav ande tute llene kai inai barikane kai ka uzdinpe ande mo anav Jeova.

¹³ E llene kai ka achen ando Israel ni ka cheren ezgode bilache, ni ka kojaven, ta ande lenge muia ni ka avel o kojaipe. Von ka jan ta ka soven bi darako.

Llili veseli pala o Jerusalem

¹⁴ ¡Llilabe chorrie katar o Sion! ¡Veselisao, foro katar o Israel! ¡Veselisao, Jerusalem! ¡Veselisao sa che liea!

¹⁵ O Del ikanda e kris kai saia pe tute, ta chudia che dusmanen. O Del, o Charo e Israeleko si po maskaral tutar ta ni ka dara ios.

¹⁶ Ande gua vreme ka phenen e Jerusalemeke gia: ¡Na dara Sion, te na jasaren e zor che va!

¹⁷ O Del si po maskaral tutar ¡Vou si zuralo ta ka braduil tut! O Del ka avel veselo tutar. Pala po volipe ni ka phenel niso, ka llilabel veselimatar pala tu, sargo kana si eslava.

E tradine irinpe

¹⁸ O Del phenel: Me ka braduiv tut katar fisavo bilachipe kai ka avel pe tu, te na ja lallao.

¹⁹ Ande gua vreme ka dav pe llene kai dukhaven tut. Ka pomoziv e bakria kai ka llal bangi ta ka chidav gola kai si jasardi. E espurnia kai marde lendar, ka cherav ando glamnipe ta blagosipe ande sogo si e phuv.

²⁰ Ande gua vreme ka anav tumen, ka chidav tumen. Ka cherav te aven tumen but glamne ta pinllarde ande sa e forura katar e phuv. Me o Del phenav le.