Sofonias 2 - Biblia ande chib Romani

E kris pe phuvia kai si pase

¹ Chidiniaon tumen llene kai inai tumenge lallao,

² mai anglal te avel pe tumende, sargo e char suki kai sumbilpe ande iek llive, mai anglal te avel pe tumende e joli e Devleki, mai anglal te avel pe tumende o llive katar e joli e Devleki.

³ Roden e Devle e llene kai inai barikane, e llene kai cherde so si orta. Roden so si o lachipe, soke sai te avel kai ka malaven kai te gurudon ando llive katar e joli e Devleki.

E patnia kai perel pe phuvia

⁴ Soke e Gaza ka achel chuchi, ta o Askalon ka avel peradino, ka choren e ezgode katar o Asdod ando dopas e lliveseko, ta ando Ekron ni ka achel niso.

⁵ ¡Tesko tumenge e llene kai zivin ande Kreta! O Del del pe tumende gale alavenchar: ¡Kanaan kai si phuv katar e filisteura, me ka zatriv tut ta ni ka mukav ande tute ni iek lleno!

⁶ E phuv kai si pasa e mora ka cherdol char e bakrenge, ta ka chidiniaon e chobanura ta ka cherdol rindura bakrenge.

⁷ E llene kai ka achen ande vicha e Judaeki ka len e phuv ta ka arakhen pe bakren. Orachaia ka soven ande chera katar o Askalon, soke o Del ka avel te pomozil len ta ka ikanel len katar o phandipe.

⁸ Gia phenel o Del e Israeleko kai si le sa e zor: Me asundem sar marela espurnia o Moab ta sar kusena e amonitura. Soke von kusle me foro ta cherdile zurale ande leki phuv.

⁹ Goleke jav sovel kai o Moab ka avel sargo e Sodoma ta e llene katar o Amon ka achen sargo e Gomorra, vostano karrnengo, phuv loneki kai ostade ka avel zatrime. Ta e llene me foroke kai ka achen, ka len e phuv.

¹⁰ Gia ka pochinen o Moab ta o Amon soke kusle e Devleke foro, ta soke pala le cherdile zurale.

¹¹ E joli e Devleki ka avel bari pe lende, soke ka zatril sa e delen katar e phuv, ta katar suako phuv ka den tenemava angla le.

¹² ¡Ta i tumen e llene katar e Etiopia me jarniaia ka mundarav tumen!

¹³ O Del ka inzarel po va po norte te sai zatril e Asiria, ta ni ka mukel niso ando Ninive, ta ka cherel la iek pusto kai niso ni bariol ande lete.

¹⁴ E stoke bakrenge ka inzon ande le ta sa e zivirinie dive. O puaucho, o kuervo ta e zivirinia karrnali ka zivin kote ka soven upral pe direkura ta e kuervura ka basen ande penllerave ta pe udara.

¹⁵ Gava si o foro veselo kai ni darala katar niso, kai leke llene phenena: ¡Inai aver foro sargo gava! ¡Sar achilo sa peradino, ta cherdilo o than kai gurudon e zivirinie dive! Kana ka nakhen pasa le ka maren espurnia letar, ta e vastea ka kusen le.