Sofonias 1 - Biblia ande chib Romani

¹ O alav e Devleko kai avilo kai o Sofonias, chavo katar o Kusi, chavo katar o Gedalias, chavo katar o Amarias, chavo katar o Ezekias, ande llivesa katar o Josias chavo katar o Amon, charo katar o Juda.

² Me ka zatriv sa e ezgode kai si ande phuv, phenel o Del.

³ Ka zatriv e manusen ta e zivirinien. Ka zatriv e chiriklien ta e machen, ka chudav e llenen bilache ta ka mukav manusen ande phuv, phenel o Del.

⁴ Ka inzarav mo va po Juda ta pe sa e llene kai zivin ando Jerusalem. Ni ka mukav ande phuv niso katar o del Baal, ta e anava katar leke popura,

⁵ ta ka zatriv golen kai liken upral katar lengo cher ta blagosin e cheraien, ta golen kai jan sovel ande mo anav ta i ando anav katar o del Milkom.

⁶ Ka zatriv golen kai mukle e Devle, kai ni rodie le ta ni puchle le.

⁷ ¡Na de orba angla o Del, soke o llive e Devleko si pase! O Del lacharda iek kurbano ta chistosarda pe gostonen.

⁸ Ta ando llive e kurbanoko katar o Del ka dukhavav e llenen mai preche, ta e chaven katar o charo, ta suakone kai si furiade ande patave katar aver phuvia.

⁹ Ta ande gua llive ka dukhavav sa e llenen kai juten e udara, kai pheren e chera katar lenge gazda ando choripe ta kojaipe.

¹⁰ Ande gua llive ka asundol urkipe katar o Udar e Machengo, ta baro kukipe po duito udar. Ta katar e burdura ka asundol sar urkin pala e nuzda.

¹¹ Kukin llene katar o Maktes, soke sa e llene kai chinen ta bichinen ka meren. Sa e llene kai anena love ka meren.

¹² Ande gua vreme ka lav iek lampara ta ka dikhav so si ando Jerusalem, ta ka dukhavav e llenen kai besen esmiro sargo e mol kai ni miskon la, kai mislinpe: ¡O Del ni ka cherel niso, ni lacho ni bilacho!

¹³ Goleke ka choren lengo barvalipe ta ka zatrin lenge chera. Ka vazden chera ta ni ka zivin ande lende. Ka bariaren vostanura drakhake, ta ni ka pien lengi mol.

¹⁴ ¡O llive e Devleko si pase! ¡Avel, sigardo avel! ¡O avazi katar o llive e Devleko si cherko, llik o murus tromano ka urkil!

¹⁵ O llive katar e joli katar e patnia ta e bari dar, o llive katar e zatrania, katar o truniariko, e oblakura ta e senke bare,

¹⁶ o llive kana ka asundol e tuturuga pe forura, pe chera zurale ta pe zidura bare.

¹⁷ Ka dukhavav e llenen, ka llan sargo e korre soke cherde o bilachipe angla o Del. Lengo rat ka chordol sargo e chik, ta lengo mas sargo e pogastia.

¹⁸ Ni lengo rup ta ni lengo sunakai ka braduin len ando llive katar e joli e Devleki, soke e phuv ka phabol e iagaia katar leki joli. ¡E zatrania ka avel sigardi pe sa e llene katar e phuv!