Salmos 99 - Biblia ande chib Romani

O Del si o mai baro charo

¹ ¡O Del si Charo! ¡Leko trono si upral pe suechura kai ikhardon kerubin! Izdran e phuvia ta i sa e phuv.

² O Del si baro po burdo Sion, o Del si upral pe sa e forura.

³ Te avel blagosime leko anav, kai si baro ta glamno. ¡O Del si santo!

⁴ Tu san iek Charo zuralo kai volil o chachipe, isto tu thodan o chachipe tu avilan chacho ta orta e chavenchar katar o Israel.

⁵ ¡Blagosin e Gazda kai si amaro Del, ta den changenchar angla leke porrne! ¡O Del si santo!

⁶ O Moises ta o Aaron si maskar leke popura, o Samuel si maskar e llene kai blagosisarde leko anav. O Del dela len anglal kana von mangena letar te pomozil len.

⁷ O Del dia lenchar orba katar o oblako, ta von cherde so phenda lenge te cheren ta kandie o zakono kai dia len.

⁸ Devla, kai san amaro Gazda, ¡tu dea len anglal! Tu avilan lenge iek Del kai prostil, ta i dukhadan len pala lengo bilachipe.

⁹ Blagosin e Devle kai si amaro Gazda, ¡den changenchar angla leko burdo santo! ¡O Del amaro Gazda, si Santo!