Salmos 97 - Biblia ande chib Romani

¡O Del si Charo!

¹ ¡Veselisao phuv! ¡Veselin tumen e phuvia kai si truial katar e mora! ¡O Del si Charo!

² Truial letar si oblakura ta tufina, leko trono si upral pe kris ta po chachipe,

³ e iag llal angle le ta phabarel truial petar e dusmanonen.

⁴ Leke esterliche den villelo pe phuv, ¡ta e phuv izdral kana dikhel len!

⁵ E burdura bilaon sargo memeli angla o Del, soke vou si o gazda katar sa e phuv.

⁶ O miloso phenel katar leko chachipe, sa e phuvia dikhen leko baripe.

⁷ E llene kai pachan ande aver dela ta cheren baripe ande lende, achen ando lallao, ¡Sa e dela bangon angla Del!

⁸ ¡Ioi Devla! O Sion ta e forura katar o Juda veselinpe but pala che zakonura,

⁹ soke tu kai san o Del katar o miloso, san upral pe sa o sueto ta san mai upre katar sa e dela.

¹⁰ O Del volil golen kai murzin po bilachipe, ta arakhel o zivoto katar gola kai volin e Devle, vou ni mukel len te peren ande va katar e bilache.

¹¹ O villelo klichil e lache lleneke, e veselia si e llenenge kai lengo lio si lacho.

¹² ¡Veselin tumen ando Del e llene lache, ta blagosin leko santo anav!