Salmos 94 - Biblia ande chib Romani

O Del si o krisari e suetoko

¹ ¡Devla, sikado, tu kai pochine e manusenge prema e ezgode kai cheren!

² Tu san o krisari e suetoko, ¡vazdiniao pe llene kai istardon ta pochin lenge so si te len!

³ ¿Gachin ios Devla, gachin ios ka veselinpe e bilache llene?

⁴ Sa gola llene kai cheren o bilachipe den orbe bi malade ta si but barikane, ¡istardon so von inai!

⁵ ¡Ioi Devla! von zatrin che foro, ¡ta den ando lallao che llenen!

⁶ Mundaren e phivlien ta golen kai aven katar aver phuvia, mundaren e minonen kai inai len dad ni dei.

⁷ Ta phenen kai o Del ni dikhel ta kai o Del katar o Israel ni thovel sama.

⁸ ¡Mangav te acharen mange dilalen! ¿Kana ka acharen gaia ezgoda?

⁹ ¿Sar ni ka asunel gua kai cherda e kan? ¿Ta sar ni ka dikhel gua kai cherda e akha?

¹⁰ ¿O ni ka dukhavel gua kai ortol e phuvien? ¿O ni ka llanel gua kai sikavel e manusen te sai llanen?

¹¹ O Del llanel kai o manus mislilpe samo ande so ni mol le niso.

¹² ¡Ioi Devla! blagosime o manus kai tu orto le ta kai sikave le ande cho zakono

¹³ te na avel leke briga kana ka avel e nuzda, a e bilacheke lacharen leke o limori.

¹⁴ O Del ni ka mukel pe foro, ta ni ka mukel korkorre golen kai si leke.

¹⁵ O chachipe pale ka avel ande krisa, ta suako lleno chacho ka llal pala o chachipe.

¹⁶ ¿Ko ka ustel te arakhel man katar e bilache llene? ¿Ko ka avel manchar pe llene kai cheren o bilachipe?

¹⁷ Te na pomozisardaia man o Del, avilema mulo.

¹⁸ Kana me phenava: Mo sinzal, tu ande cho volipe istardan man te na perav.

¹⁹ Kana me mislura ni dena ios katar e brige, tu dian man zor ta veselisardan man.

²⁰ Tu nasti ave amal katar iek krisari bilacho, kai ni llal orta prema o zakono,

²¹ kai thovenpe te cheren o bilachipe e llenenge kai si lache ta chache, ta chinen lenge o meripe.

²² A o Del arakhel man, vou si o barr kai gurudivav pala lete.

²³ O Del ka cherel te aven zatrime e llene bilache isto pala lengo bilachipe. ¡Amaro Del ka zatril len!