Salmos 92 - Biblia ande chib Romani

Iek llilabipe kai blagosil

Llilabipe e sabadoke.

¹ Devla kai san ando miloso, ¡gia sukar si te dav tut fala ta te blagosiv cho anav ande llilia!

² Te phenav thiarinako ta orachaia katar cho volipe ta cho chachipe,

³ ka cherav te basen e kuerde, ka basalav poloke ande arpa ta ando salterio.

⁴ ¡Ioi Devla! ¡tu veselisardan man e ezgodenchar kai cherdan! E ezgode kai cherdan che vastenchar pheren man veselia.

⁵ ¡Ioi Devla! ¡Gia bare si e ezgode kai cherdan! ¡Gia gurudine si che mislura!

⁶ ¡Samo e dile nasti acharen len ta gola kai inai len bizaipe ni llanen so si!

⁷ Te bariona e bilache ta e kochkaria sargo e char, ta te barvaona, gua si samo te aven zatrime ostade.

⁸ A tu, Devla, charoi ostade ando miloso.

⁹ Iek ezgoda si chachi Devla: kai che dusmanura ka aven zatrime, kai sa gola kai cheren o bilachipe ka aven rispime.

¹⁰ A tu ka de man e zor sargo e guruveki ta ka thove pe mande zeitino nevo.

¹¹ Ka dikhav sar peren me dusmanura, ¡ka asunav sar auchinpe gola llene bilache!

¹² E llene lache ka barion sargo e palmere ka barion sargo e kasta ando Libano.

¹³ Von ka aven thode ande phuv katar o cher e Devleko, ka barion ande bar amare Devleki.

¹⁴ I ande po phuripe ka den septelie, suako llive ka aven saste ta zelene

¹⁵ ta ka phenen kai o Del arakhel amen ta kai si chacho ta ni cherel o bangipe.