Salmos 9 - Biblia ande chib Romani

Blagosipe pala o chachipe e Devleko

Katar o lleno kai sikavel te llilaben. Basaldi ande firura ta ande arpe. Llili e Davideki.

¹ ¡Ioi Devla! mangav te blagosiv tut sa me liea, ta mangav te phenav katar cho baripe.

² Ioi Devla kai san baro, mangav te urkiu veselimaia, ¡mangav te llilabav chuke!

³ Me dusmanura nasen angla tu, peren ta meren.

⁴ Tu san iek krisari chacho, bese pe cho trono te chine mange kris.

⁵ Dian pe llene kai ni pachan ande tute, zatrisardan e bilache llenen, ¡nikada ni ka denpe golli lendar!

⁶ O dusmano mulo, ta lea mule leke forura. Tu zatrisardan len, ta ni achila lendar ni o mislo.

⁷ A o Del si charo ostade, vou besel pe po trono te chinel e kris.

⁸ Ka krisil e sueto chachimaia, ka chinel iek kris orta e phuvienge.

⁹ O Del arakhel e llenen kai nakhen patnia, vou arakhel len ando vreme katar e nuzda.

¹⁰ Devla, gola kai pinllaren tut si len vera ande tute, tu nikada ni muke e llenen kai roden tut.

¹¹ Llilaben e Devleke kai charoil ando Sion, phenen e phuvienge so cherda vou.

¹² O Del dikhel pe llene kai nakhen patnia, ta ni bristarelpe katar lengo roipe. Dukhavel golen kai si lenchar silne.

¹³ Devla, te avel chuke zalba mandar, dik sar dukhaven man gola kai murzin pe mande, ¡ikan man katar e udara e merimake!

¹⁴ Ta gia angla e udara katar o Jerusalem, ka phenav sa e suetoke kai tut si te blagosi, ta kai sem veselo soke braduisardan man.

¹⁵ E llene kai ni pachan ando Del, peren isto ande po kojaipe, lenge porrne achen istarde ande mreza kai isto von gurude.

¹⁶ O Del cherda te pinllaren le. ¡Cherda o chachipe! O bilacho achel phanglo ando kojaipe kai isto vou thoda.

¹⁷ E bilache llene ta gola kai ni pachan ando Del, gola kai bristarenpe katar o Del, ka achen ando meripe,

¹⁸ soke e chorre ni ka aven bristarde ostade, ta nikada ni ka jasaren so aduricharen.

¹⁹ Uste Devla, cher te na dobin e manusa, ¡krisisar e llenen kai ni pachan ande tute!

²⁰ Cher te avel lenge dar Devla, ¡cher len te llanen kai von si samo manusa!