Salmos 89 - Biblia ande chib Romani

O Del achel pe iek orba e Davidea

O sikadipe katar o Etan o esraita.

¹ Devla, sogo ziviva ka phenav ando llilabipe kai tu san posteno, me llilabimaia ka phenav suako llive kai tu san chacho.

² Ka phenav kai cho volipe si ostade, kai cho chachipe ni pharrudol nikada, sargo o miloso kai ni pharrudol.

³ Dian cho alav e Davide, jalan sovel che slugake gale alavenchar:

⁴ Ka cherav te charoil ostade cho porodo pe cho than.

⁵ ¡Ioi Devla! o miloso blagosil che glamne ezgode ta che santura phenen cho chachipe.

⁶ ¡Niko inai ando miloso sargo tu Devla! ¡Niko inai prema tu Devla maskar e dela!

⁷ Glamno Del kai daran tutar ando miloso, kai truial tutar si e santura.

⁸ Ioi Devla, kai si tut sa e zor, sa e zor si chiri ta cho chachipe si truial tutar, ¡inai niko sargo tu!

⁹ Tu gazdari pe mora divi ta achave lake bare valura.

¹⁰ Ustadan pe azdava e moraki sargo kana saia iek mulo, rispisardan che dusmanonen che zurale vastea.

¹¹ O miloso ta e phuv si chire, tu cherdan e phuv ta sa so si ande late.

¹² Tu cherdan o norte ta o sur, e burdura, o Tabor ta o Jermon llilaben vesele chuke.

¹³ Chiro si o va o zuralo, cho va o chacho si zuralo ta blagosime.

¹⁴ Cho trono si istardo po chachipe ta pe so si orta, o volipe ta o chachipe llan angla tu.

¹⁵ ¡Ioi Devla! Blagosime o foro kai llanel te blagosil tut veselimaia ta phirel po villelo kai tu de le,

¹⁶ kai veselilpe ande cho anav suako llive ta lel zor ande cho chachipe.

¹⁷ Soke tu san o villelo katar amari zor ta pala chi volia amari zor bariol mai but.

¹⁸ ¡Amaro eskudo si o Del! ¡Amaro Charo si o Santo katar o Israel!

¹⁹ Omanglal tu dian orba sargo ande iek suno che chache slugenchar ta phendan lenge: Esverisardem iekhe llene tromano katar mo foro, thodem le upre ta blagosisardem le.

²⁰ ¡Maladem me sluga e Davide! Mo santo zeitino thodem pe lete,

²¹ ta ka pomoziu le suako llive. Me vastea ka dav le zor.

²² Leke dusmanura ni ka den pe lete ta ni ka dobin le e llene bilache.

²³ Ka chalavav leke dusmanonen angla lete ¡ta ka raniu golen kai murzin pe lete!

²⁴ Mo chachipe ta volipe ka aven lea, ta cheres ma ka avel le mai but zor.

²⁵ Ka cherav te gazdaril pe vastea o stingo pe mora a e chachea pe paia.

²⁶ Ta ka phenel mange: Tu san mo Dad, tu san mo Del kai braduil man ta arakhel man.

²⁷ Ta me ka dav le o liubao katar o chavo o mai purano, o mai baro maskar e charura e suetoke.

²⁸ Mo volipe pe lete ka avel suako llive, ta ni ka phagav mo alav kai diem le.

²⁹ Leko porodo ka charoil pe leko than ostade, sogo avela o miloso.

³⁰ A leke chave te mukena mo zakono ta te na zivina prema me alava,

³¹ ta te mukena ando lallao mo sikadipe ta te na kandena me zakonura.

³² Ka dukhavav len soke ni kandie, ka chalavav len e bichoia pala lengo bilachipe.

³³ A mo volipe po David ni ka merel, ta ka avav lea chacho

³⁴ ta ni ka phagav mo alav, ta ka cherav so phendem.

³⁵ Iek drom jalem sovel pe mi santidad, ta ni ka kojavav leke:

³⁶ Leko porodo ka charoil pe leko than ostade, sogo avela o kham.

³⁷ ¡Zurale ostade sargo o chon! ¡Zurale ostade sogo avela o miloso!

³⁸ A tu, ni kamlan ta ni thodan sama e charoke kai tu esverisardan, ¡jolailan pe lete!

³⁹ Phaglan o alav che slugaia, chudian pe phuv leki korona.

⁴⁰ Muklan putardipe pe sa leke zidura, ¡muklan sa ando phagipe leke forura!

⁴¹ Kogo nakhel del ta lel peke sogo mangel, gola kai zivin pase asan peke letar.

⁴² Cherdan te vazden pe va veselimatar lenge dusmanura, soke dobisarde.

⁴³ Cherdan te na avel ostro lengo jarni, ta ni dian le zor kana marelape.

⁴⁴ Achadan lengo baripe, chudian pe phuv leko trono.

⁴⁵ Chikniardan e bursa katar leko zivoto ta muklan le ando lallao.

⁴⁶ ¡Ioi Devla! ¿Gachin ios ka gurudo? ¿Gachin ios ka phabol chi joli sargo e iag?

⁴⁷ Devla, de tut golli kai mo zivoto si minono, kai o manus kai tu cherdan zivil cherricha vreme.

⁴⁸ ¡Niko nasti zivil ta te na merel nikada! ¡Niko nasti kurtulilpe katar o meripe!

⁴⁹ Devla, ¿Kaitalo o volipe kai saia tut mai anglal, kana jalan sovel ande cho chachipe kai ka voli e Davide?

⁵⁰ Devla, de tut golli kai but llene maren espurnia katar che sluge, ta sar chidiem gola bilache alava ande mo lio.

⁵¹ ¡Ioi Devla! ¡Gia maren amendar espurnia che dusmanura! ¡Katar go llala gia maren espurnia katar cho lleno kai si thodo o zeitino pe lete!

⁵² Blagosime te avel o Del ostade. ¡Gia te avelpe! ¡Gia te avelpe!